Refat Çubarov: Qırım akimiyeti memlekette yüz bergen deñişmelerni tolusınen añlap olamay

11.05.20160:19

Meclis başı Refat Çubarov, 2014 senesi fevralnıñ 23-de aqşam, bir çoq semetdeşleri ile telefon vastası ile subetleşkeni aqqında bildirdi, olar cümhüriyet nazirler Şurasınıñ reisi Anatoliy Mogilövnıñ, Bütünqırım matem mitinginde seslendirilgen talaplar boyunca cevabı sebebinden açuvlı olğanları aqqında haber etkenler.

Bundan da ğayrı, R. Çubarovnıñ bildirgenine köre, birçoq insanlar yañıdan miting toplap, ‘Mogilövnıñ taqımından’ neden memnün olmağanları ile meraqlanmaq talap etmekte ediler. Bu aqta Meclis başı 2014 senesi fevralnıñ 24-de matbuat konferentsiyasında haber etti.

‘Menfiy qarşılandı. İlk evelâ, insanlar Qırım nazirler Şurasınıñ reisi qırımtatarlarğa dos-doğrudan degil de, vastalı şekilde olsa da, özleri azırlağan vaqialarnıñ esiri ola bilirsiz dep qorqutqanından memnün qalmadılar, — dep añlattı Meclis başı. – Ve ekinciden, Nazirler Şurasınıñ reisi, o ve ‘bütün Qırım taqımı qırımtatarlar ile beraberlikte episi qıyınlıqlar em de meselelerni çezmek tırışacaqları ve kelecek kün aqqında tüşünecekleri aqqında’ bildirgeni insanlarnı daa ziyade açuvlandırdı’.

Meclis başınıñ sözlerine köre, mitingge kelgen 15 biñden ziyade insanlar, ve tünevin mitingge kelmek çaresini tapmağan on biñlerce insanlar şimdiki akimiyet taqımınıñ işinden razı degildir.

‘Tünevin mitingde biz ‘bu taqımnıñ iş usulları aqqında çoq ve tafsilâtlı laf ettik. Adamlarnı milliy alâmetke köre ‘öz’ ve ‘yabancı’larğa ayırılması, regionlar fırqasınıñ diktatı, devlet hızmetçileriniñ zorbalığı, — dep tamamladı R. Çubarov. – Ve aynı zamanda, QMC-niñ Nazirler Şurasınıñ başı Mogilöv ‘taqım’ ileride de bahtımız oğrunda küreşecegi aqqında kene de tekrarlay.

‘Memurlarğa, Qırımdaki alnı talil etip, 23 fevralde Bütünqırım mitinginde seslendirilgen insanlarnıñ talaplarını eşitip, insanlar istegenlerini añlamaq kerek olğanlarını kene de bildirmek istedik, — dep qayd etti Meclis başı, ve ilâve etti ki, 24 fevralden başlap regional meclislerniñ episi reisleri miting talaplarınıñ ve Meclis başı bergen vazifeleriniñ eda etilmesine tutundılar.

Boyleliknen, Qırım regionlarında, ‘Qırımtatarlar temsilcileriniñ şuraları’ olmağan em de iç bir türlü dialogğa kirmegen rayon devlet memuriyetlerinde, işte boyle şuralarnıñ meydanğa ketirilmesi aqqında qararlar qabul etile. Bu şuralar terkibine yerli sakinler tarafından saylanğan regional meclislerniñ azaları kirecektir. Boyle Şuralar formal şekilde teşkil etilgen rayon ve şeerlerde, olarnıñ faaliyetini ğayrıdan canlandırmaq.