Meclis delegatsıyası 28 iyün künü Almaniya nazirler şurasınıñ şarq işbirligi boyunca Referatnıñ yolbaşçısı Süzanna Şütts ve Almaniya nazirler şurasınıñ Ukraina boyunca referenti Barbara Kviknen körüştiler.
Körüşüvde Meclisniñ Almaniyadaki azası Ahmet Ozay, Kelna şeer şurasınıñ deputatı Erhan Kara, Şarq Avropağa destek Cemiyetiniñ temsilleri İldar Harisov ve Miste Hotopp-Rike de iştirak ettiler.
Almaniyada çetel işler Nazirliginiñ vekilleri Ukraina ve Qırımda olıp keçken vaqialarını diqqatnen közeteler ve olardan bazıları olduqça telükeli olğanını qayd ettiler. Aynı zamanda da Almaniyada Ukraina Avropa Birliginen yaqınlaşmağa ğayretlerine müsbet qıymet kese ve ağımdaki seneniñ soñunda Ukraina AB azası olur degen ümütini bildireler.
İnsan haqları demokratiyanıñ esası olğanını qayd etip, Şütts hanım Qırım akimiyetiniñ Aqmescitte Cuma Cami qurulması içün Yaltinskya, 22 adresi boyunca topraq ayırğanlarını müsbet adım olaraq tanığanlarını qayd etti. Ukraina ve Qırımda soñki yıl içersindeki siyasiy-içtimaiy vaziyetini izaat eterek, Mustafa Cemilev bu qırımtatar meselesiniñ çezilmesinde müsbet adımlar, yazıq ki, körünmegenini qayd etti. Bundan da ğayrı, qırımtatarlarnıñ avdeti ve abadanlaşuvı programmasınıñ devlet teminlevi, idare organlarında ve temsil akimiyetiniñ strukturasında(qurulışında) temsilcilik seviyesi, qırımtatar KHV devlet tarafından maddiy desteklenilmesi kibi meselelerde keçken senege baqqanda seviyeniñ eksilmesi közetilmekte.
Qırımtatar haqlarınıñ tiklenilmesine bağışlanğan Halqara forumnıñ azırlanılması ve keçirilmesine ayrıca diqqat ayırıldı. Refat Çubarov ve Ali Hamzin halqara cemaatçılığınıñ destegi olmasa qırımtatar halqı adaletsizlik, haqsızlıq ve inkişaf içün şaraitsizlik vaziyetinde bulunmağa devam ete bilecegini qayd ettiler.