BMTİP PRİK qırımtatar cemiyetine yardım etmege devam eter

11.05.20160:19

Meclisniñ körüşüvleri

BMTİP PRİK qırımtatar cemiyetine yardım etmege devam eter

BMT Koordinatorı, Ukrainada BMT İnkişaf Programmasınıñ Daimiy vekili Olivye Adam 14 sentâbr künü Qırımtatar Milliy Meclisni ziyaret ettiler.

Körüşüvde BMTİP PRİK koordinatorı Adelin Gone, Ukrainada BMT temsilciligi yolbaşçısınıñ insan inkişafı boyunca mesleatçısı Gaspar Bergman, Qırımda BMT İnkişaf Programması temsilciliginiñ programma menedjeri Kurtmolla Abdulganiyev iştirak ettiler. “Meclis yolbaşçılığınen körüşüvimizniñ maqsadı, — dedi Ukrainada BMT temsilciliginiñ Başı Olivye Adam, Mustafa Cemilevge muracaat eterek, — Ukrainada ve, ebet, Qırımda, BMT inkişaf programması faaliyetini devam etmek. Belli olğanı kibi, BMTİP Qırımda öz programmalarını 90-ci senelerniñ ortalarından berli amelge keçire ve maksimal derecede sürgünlik yerlerinden öz Vatanına qayta yatqan qırımtatar halqınıñ ihtiyacları köz ögüne ala. Tabiiy ki, ileride de Qırımnıñ inkişafına yonelgen farqlı leyhalar ile qırımtatar halqına yardım etmege planlaştıramız”.

Sübet devamında taraflar çoq sualler boyunca fikirlernen paylaştılar – Qırımda BMTİP ömürge keçirgen leyhalarnıñ, İnsaniy ölçüv boyunca keneşi faaliyetiniñ effektivligi, qırımtatarlarnıñ yerleşüvi ve aq-uquqlarınıñ tiklenüvinde halqara yardımınıñ keñişletmesi içün kerekli tedbirler keçirilmesi kibi sualler muzakere etildiler.

 

Meclisniñ yolbaşçılığı Ukrainada BMTİP Başınıñ ricası ile Qırımdaki içtimaiy-siyasiy vaziyeti aqqında tafsilâtlı tarif etti, ayrı diqqat qırımtatarlarnıñ yerleşüvi suallerine celp etildi. “Nevbetteki yıl endi bite yatır, qırımtatarlarnıñ yerleşüvi programmasına ise para öyle de ayırılmadı. Ondan da ğayrı, devlet tarafından içtimaiy programmalarğa asıl da para berilmey”, — dedi Qırımtatar Milliy Meclisniñ reisi Mustafa Cemilev.

Cemilev Olivye Adamnıñ diqqatını “kazak” teşkilâtlarnıñ provakatsion faaliyetlerine celp etti. “Öyle faaliyetniñ misallerinden biri Qırımnıñ er yerinde “temenna” haçlarnıñ qoymaq ıntıluvlarıdır. Bunınen beraber, birni raatsızlağan daa bir mesele – Qırım Nazirler Şurasınıñ şimdiki yolbaşçılığınıñ olarnıñ areketlerini körmemezlikke alğanıdır. Qırımda öyle mantıqsız siyaset, resmiy din pravoslavlıq olğan devri, çar Rusiyede bile olmağan edi”, — dedi Mustafa Cemilev.

Meclis reisiniñ birinci muavini, Qırım Yuqarı Şurasınıñ deputatı Refat Çubarov, Qırımda BMT ve Avropa Birligi ülkeleri tarafından ömürge keçirilmesi planlaştırılğan içtimaiy-iqtisadiy programmlar keñişletilmesiniñ müimligini qayd eterek, aynı vaqıtta qırımtatar halqınıñ qaytuvınen bağlı siyasiy-uquqiy suallerniñ çezilüviniñ kerekliginde toqtaldı. “Bugün endi er kes añladı ki, halqara teşkilâtlar iştirak etmeseler, bu saada iç bir deñişmeler olmaz”, — dedi Refat Çubarov.

Öz nevbetinde, Olivye Adam Halqara forumnıñ keçirilüvine qol tuttı, oña köre, forum yardımı ile qırımtatar halqınıñ aqları tiklenüvi yonelişte çezilüv yolları tapıla bile.

Bunınen beraber Olivye Adam ağımdaki seneniñ oktâbr 5 künü Kiyevde olacaq Qırımtatar Milliy Meclis yolbaşçılığınıñ diplomatik missiyalar ve halqara teşkilâtlar missiyalarnıñ yolbaşçılarınen körüşüvde iştirak etecegini tasdiqladı.