Milliy sanatımız, medeniyetimiz büyük coyuqqa oğradı: devamlı hastalıqtan soñ tek Qırımda degil, Ukrainada ve onıñ tışında belli, çoq özgün ve siyrek istidat saibi olğan ressam Ramiz Netovkin vefat etti.
Bu kederli haber 16 iyülniñ gecesi Türkiyeniñ Antaliya şeerinden keldi: o mında iyünniñ başından bulunıp, şu aynıñ soñki künü yürekke ameliyat keçirdi. Bundan üç afta evel ressam 51 yaşını toldurğan edi.
Ramiz bey Taşkent vilãyetiniñ Almazar qasabasında doğdı. 1975 senesi onıñ qorantası Qırımğa, Otarköyge köçti. Soñra daima rayon merkezinde-qadimiy Qarasuvbazarda yaşadı.
1980 senesi o, Aqmescitte Samokiş adına bediy oquv yurtunı bitirdi. İcadiy faallik neticesinde doquz yıldan soñ Ukraina ressamlar birliginiñ azası oldı.
R.Netovkin özüne esas usul olaraq grafikası, şekil olaraq manzaranı, mevzu-Qırımnı seçip aldı. Şübesiz, o bu üç yönelişte de şahsiy muelliflik üslübini tapıp, onı yüksek ve özgün seviyege köterip, büyük muvafaqiyetke irişti.
Ressamnıñ onlarnen şahsiy sergileri ötkerildi. Olarnıñ yerleri izaatnı talap etmey, çünki dünyaca tanılğan medeniyet merkezlerinde teşkil olunğan ediler: Kiyev, Varşava, Tartu, Moskva, Nyü-York ve il. Türkiyede Kastamonu şeerindeki olıp keçken onıñ sergisine büyük medeniy adise dep qıymet kesilgen edi.
Vatan-Qırımnen sırlaşmaq, dertleşmek, onıñ ömrünen yaşamaq, taqdirini qayğırmaq, onı candan ziyade sevmek,daima alğışlamaq Ramiz bey içün çoq adiy, teren, tabiiy al ve icadiy temel olıp qaldı. Ressamğa milletperverligini isbatlamağa sıra tüşmey- onıñ eserlerinde qurşun qalemniñ her bir sızığı, fırçısınıñ ayalaması bunı açıq-aydın köstermekte ve tasdiqlamaqta. Tasviriy sanatımıznıñ parlaq temsillerinden biri R.Netovkin vefat etkeni munasebetinen onıñ qorantasına teren taziye bildiremiz ve baş sağlığı tileymiz.
Elvida, Qırım ve onıñ asıl halqı ebediyligini mucizeli ustalığı ile aks etken ressam. Elvida, büyük istidatlı vatandaş. Elvida, Ramiz.
Allah rahmet eylesin.
Qırımtatar Milliy Meclisi.