Yanukoviç içün Graçnıñ usulı

11.05.20160:19

Nariman Celãl

Viktor Yanukoviçniñ qırımtatar vekiller Şurası ile körüşüv formatı deñiştirilip, anda şübeli teşkilãtlarınıñ azaları olğan bir qaç qırımtatarı davet etilgeni akimiyet Ukrainanıñ eñ büyük milliy cemiyetlerinden biri ile devlet içün müim olğan meseleler boyunca munasebet qurmağa istemegenini daa bir kere numayiş etti. Artıq qaçıncı sefer saylavlardan evel keçirilgen taktik siyaset devamlı devlet strategiyasından, dağılğan SSSRden qalğan problemlerinden eñ ufağını bile çezmek zarurlığından üstün çıqa.

Körüşüvde qırımtatarlarnıñ bulunmasından degil de, olardan qaysıları davet etilgeninden böyle fikirler aqlına kele. Ne içün körüşüvde misal olaraq, Safure Kacametova, Erecep Hayredinov, Fevzi Kubedinov, Sinaver Kadırov, Safinar Cemileva, Eskender Bariyev kibileri ve diger Milliy Firqa ve qırımtatar halqınıñ içtimaiy- siyasiy küçleriniñ Koordinatsıon Keñeşinden daa çoq nufuzlı ve ürmet qazanğan cemaat teşkilãtlarınıñ azaları yoq edi.

Ne içün aceba? Bu sualge bir qaç cevap ola bilir? Birinciden, körüşüvge Meclisniñ oppozitsıyacılarını davet etip, onıñ teşkilãtçıları qırımtatar temsil organınıñ reaktsıyasını aldından körip,(Prezidentniñ bundan aslı haberi olmasa kerek) Prezident ile körüşüvge Meclis azalarınıñ kelmemesini mahsus teşkil ettiler.

Ekinciden, yañı akimiyetniñ Meclis areketlerini aksakallar keñeşi, ya da qırımtatar bloku kibi siyasiy küçlerni aşlap ve aşatıp nezaret etmege istegi duyula. Akimiyetke loyal olğan Meclis oppozitsıyanıñ şekillenmesi tek bir maqsat ögüne qoya bile- devlet destegine saip olıp, Meclisniñ Qırımdaki protsesslerine tesirini sıñırlamaq, halqara cemaatçılıq içün ise qırımtatar meseleleri çezilgeni kibi köz boyamasını numayiş etmek. Böyle imkãn aqqında bir yıldan ziyade ‘2000’ gazetası yazğan edi: ‘ Böyle yardım NDKT, ya da Milliy Firqa kibi konstruktiv teşkilãtlar arqalı amelge keçirile bilir edi. Bu da em Milliy Meclis, em de radikal islamistlerniñ tesirini azaltır edi.’ Prezidentnen Körüşüvde bulunğan qırımtatar ‘vekilleriniñ’ sözlerini eşitkenler, ya da oquğanlar olsa, qırımtatar meselesini çezmek içün bulardan da ‘konstruktiv’ teşkilãtlar tapılmaycağına er alda şübe qalmaz.