Ne içün biz kendimizden ğayrı er kesni qabaatlaymız?
Qırımtatarlarnıñ, deyerlik, er bir kütleviy tedbirinde akimlerniñ adına qırımtatar halqınıñ problemlerine lãqayd yanaşqanları içün aqlı qabaatlavlar yañğıray. Amma, aydıñız, öz-özümizge sual bereyik- ya bizden ğayrı kimse yapıp olamaycaq işlerniñ eda etilmesine biz özümiz daima namusnen yanaşamızmı, tırışamızmı?
Söz qırımtatar tiliniñ ğayet kergin vaziyeti aqqında, öz ana tilinde serbest laqırdı etip olğan qırımtatarlarinıñ sayısı ep eksilgeni hususında yürsetile.
Doğru, mektepler yoq, sınıflarnı açmağa zor, derslikler, luğatlar yetişmey…
Lãkin tilimizni qurtarmaq, qorçalamaq, saqlap qalmaq içün biz barmız…amma bu saada iç bir şey yapmaymız, çünki ne kendimizni çekiştiremiz, ne de balalarımıznı ana-tilinde laf etmege ögretemiz.
Ya baqıñız, 2009 senesi 2000 qırımtatar ailesi (yani 2,9 %) ‘Yañı dünya’, 4000 aile (yani 5 %)- ‘Qırım’ ğazetasına, 1200 (yani 0,7%) ‘Yıldız’ mecmuasına abune oldı. Amma rus tilinde neşir etilgen gazetalarğa bıltır 10000(yani 14%) qırımtatar qorantası yazılğan.
Yoq, canım, qırımtatar diger tillerde de gazetalarğa abune olğanına kimse qarşı degil. Amma qırımtatarlar aynı zamanda öz ana tilindeki neşirlerine ne içün abune olmağanları ve bunıñnen tuvğan tillerini öldürgenlerini añlamağa küç.
Tilimizniñ taqdiri endi kimseni telãşlandırmaymı? Bizge episi birmi? Olmasa, ne içün biz kendimizden ğayrı er kesge qabaat taşlaymız?
Neden başlamalı?
Yalıñız kendimizden!
Bu işte, birinci nevbette, yerli meclislerniñ azaları, köy, rayon ve şeer şuralarınıñ deputatları, ocalar, müsülman cemiyetlerniñ azaları ibret köstermeliler. Bu ise artıq bir qaç biñ insandır!
Lütfen, iç olmadım, mına bu konkret işnen halqqa hızmet etmege azır olğanıñıznı numayış etiñiz! Tek, ne içün yapmağanıñızğa manaçıq qıdırmañız. Tabiy ki, gazetanıñ tışqı qıyafetini begenmeyim, maqalelerini oqumağa zor, tili añlaşılmay kibi manaçıqlar daima tapılır.
Lãkin biliñiz ki, eger siz abune olıp, bu gazetalarğa qoltutmasañız, olarnıñ muarririyetlerinde çalışqan jurnalistler de professional seviyelerini yükseltip olamazlar. Eger de qırımtatar tilinde neşir etilgen gazetalarğa abune olsañız, öz evlãtlarıñız ve yaqınlarıñız ögünde borcuñıznı ödegen olursız, olarnı ana tilinde qonuşmağa celp etip, qomşularıñıznı da böyle yapmağa çağırmağa aqqıñız olur.
Mezkür muracaatınen çıqışta bulunğan ‘Avdet’ gazetasınıñ muarririyeti de eñ-evelã özünden başlay- 2010 senesiniñ ortasından, yani jurnalistler ştatını şekillendirgen soñ, maqaleleriniñ yarısını qırımtatar tilinde derc etecekmiz. Bunıñ kibi de, biz, gazetamıznıñ saifelerinde 2010 senesi ‘Qırım’, ‘Yañı dünya’, ‘Hidayet’, ‘Maarif işleri’ gazetaları ve ‘Yıldız’ mecmuasına abune olğanlarnıñ adı ve soyadlarını da basmağa azırmız. Bunıñ içün adresimizge abune kvitantsıyañıznıñ kopiyasını(köçürme nushasını) yollamañız yeterlidir.
‘Avdet’ gazetasınıñ muarririyeti