Qırım variantında “Qulaq pahlava” da denilir

11.05.20160:19

Pahlava

Qırım variantında “Qulaq pahlava” da denilir

Hamur basmaq içün:

750 g un;

2-3 yımırta;

300 g yahşı margarin (sarı yağ kelişmey – qavurğanda, yana);

1 qaşıq raqı;

Sütni suvnen 3:2 proportsiyasında qarıştıramız.

 

Temiz sütten hamur açıq tüste olmay. Birisi süt yerine ırımçıq suvı qullana, qavurğanda, hamurğa yağ azca siñe. Amma ekşimegen ırımçıq suvını qullanmaq kerek, aksi alda pahlava ekşice olacaq.

Hamurnı basqan soñ, pek ince yayamız. Yayımnı biraz qurutamız. Onıñ içün pahlava yazda daa yahşı ola. Men qurucılıq fenni qullanam, mahsus aşhanede çalışmaq içün. Tevsiye etem.

Hamur biraz quruğan soñ, yarısını oqlavğa saramız. Ekinci yarısını yımırtanen yaqıp, bütünley oqlavğa saramız. 10’dan az qat olmamaq kerek. Soñra oqlavnı çıqarıp, sarılğan hamurnı keseklerge kesemiz. Çoq yağ içinde qızartamız.

Türkler, meselâ, pahlavanı qoy yağında qızartalar. Türk pahlavanı aşağanlar, belki, duyğandırlar, lezzetinde “qoy ses”i bar. Qızartılğanınen, suvutmayıp, pahlavanı bal şerbetine batıramız. Şerbet qaynap turmağa kerek.

Şerbetni olğan balğa köre yapamız. Eñ yahşı – mayıs balı, o şingen ola, demek, suvnı azca qoşmağa kerek olur. Azır pahlavanı şerbet içinde 5 saniyeden 5 daqiqağa qadar tutmaq mümkün – kim nasıl istese.

Soñra pahlava üstüne ceviz sepemiz…

ATO!

P.S. Eliñizde olğan eski, unutılğan yemek tariflerinen biznen paylaşsañız, pek minnetdar olurmız. Öz sevimli retseptlerni de yollañız: 95017 Aqmescit ş., Şmidta/Naberejnaya soq., 2/27 ya da e-mailge: avdet2003@mail.ru ya da irus2006@mail.ru.