Poloniyada oqutıcı ziyaretler programması qırımtatar talebeleriniñ oquvına yardım etmege azır
2010 senesi 20 sentâbr künü Qırımtatar Milliy Meclis ofisinde Qırımtatar Milliy Meclis Reisi Mustafa Cemilevniñ Yan Novak-Yezöranskiy adına Şarq Avropa Kollegiyasınıñ Poloniyada oqutıcı ziyaretler programmasınıñ müdiri Yeji Reyt ile körüşüvi olıp keçti.
Yeji Reyt Poloniyada oqutıcı ziyaretler programması faaliyetiniñ esas printispleri aqqında haber berdi, bu programma farqlı saalarda mütehassıslar stajında Poloniyanıñ islâh tecribesini ögrenmek içün qullanıla. O, işletilgen başqa programmalar aqqında da haber etti, hususan Poloniya aliy oquv yurtlarında oqumaq içün başqa ülkelerden studentler alınması. Bu leyhada Qırımdan qırımtatarlar talebelerine de iştirak etmege teklif etildi.
Mustafa Cemilev Poloniyanıñ bu leyhasına yüksek qıymet kesti, qayd etti ki, Poloniya ve qırımtatar haqlarını çoqasırlıq tarihı birleştire. Poloniya ve Qırımnıñ tasil müessiseleri arasında munasebetler ile bağlı suali ayrıca muzakere etildi, hususan Meclis Reisi Yeji Reytke Qırım müendislik-pedagogika universitetine (QMPU) diqqat ayırmağa tevsiye etti, anda esasen qırımtatar yaşları oquy, rektorı – professor Fevzi Yakubov.
Körüşüvniñ neticeleri boyunca Yan Novak-Yezöranskiy adına Şarq Avropa Kollegiyasınıñ Poloniyada oqutıcı ziyaretler programması ve Meclis arasında muntazam bağlar tizilmesi aqqında añlaşıldı.
Aynı künü Yeji Reyt Qırımtatar Milliy Meclisniñ tasil idaresiniñ yolbaşçısı, “Maarifçi” qırımtatar tasil hadimleri assotsiatsiasınıñ reisi Safure Kacametova ile körüşti. O, qırımtatar balaları içün ana tilinde tasil meseleleri aqqında tafsilâtlı malümat berdi.
2010 senesiniñ 21 sentâbr künü Qırım müendislik-pedagogika universitetiniñ kollektivi Poloniyada oqutıcı ziyaretler programmasınıñ müdiri Yeji Reyt ile körüşti. Ziyaretniñ ketişatında QMPU’niñ birinci prorektorı Eskender Lümanov, Qırımtatar Milliy Meclisniñ halqara munasebetler bölüginiñ yolbaşçısı Ali Hamzin, Meclis Kâtibliginiñ yolbaşçısı Zair Smedlâyev, qırımtatar ve türk filologiyası fakultetiniñ dekanı Enise Abibullayeva musafirni qırımtatar halqınıñ tasil meseleleri, universitet inkişafınıñ tarihı, “Vozrojdeniye” (“Tiklenüv”) monumenti ve “Nobel laureatına” stelası ile tanış ettiler.
Y. Reyt qırımtatar ve türk filologiyası fakultetini ziyaret etti, QMPU ocaları tarafından çıqarılğan qırımtatar tilindeki oqutuv-usulşınaslıq edebiyatınen tanış oldı, qırımtatar tiliniñ inkişaf meseleleri, halqara studentler almaştırıluv programmaları muzakere etildiler.
Yeji Reyt qırımtatar tiliniñ, Avropanıñ medeniy mirası olaraq, inişafında ve saqlanlmasında halqara yardımınıñ emiyetligini qayd etti. QMPU’niñ birinci prorektorı Eskender Lümanov tarihiy bağlarnıñ inkişafı ve ögrenilmesi içün, eki taraflama poloniya ve qırımtatar tilleri mütehassıslarınıñ azırlanması aqqında konstruktiv tevsiyesini bildirdi.
QMPU’daki körüşüvde Meclis Kâtibliginiñ daveti ile yaşlar teşkilâtlarınıñ temsilcileri de iştirak ettiler – Ayder Acimambetov (“Mecal”) ve Dilâver Akiyev (“Qırımtatar vatanperver gruppası”).
Meclisniñ Matbuat hızmeti