Nam qazanğan artist

11.05.20160:19

Qırım Muhtar Cumhuriyeti Yuqarı Şurasınıñ 2010 senesi 18 oktâbr künü qararı ile qırımtatar milliy medeniyeti inkişafına büyük isseleri, yüksek mutehassıs ustalıqları, semereli icadiy faaliyetleri içün ve “Qırım” qırımtatar folklor ansambli” Qırım cumhuriyet teşkilâtınıñ 20-yıllığı munasebeti ile “Qırım Muhtar Cumhuriyetinde nam qazanğan artist” Fahriy unvanı Bekirov Arsen Enveroviç, Anafiyeva Maye Dlâverovna, Bikbulatova Leviza Rustemovna ve Ziyadinov Elmar Eskenderoviçke berildi.

2010 senesi 5 noyabr künü Qırım Muhtar CumhuriyetiYuqarı Şurasınıñ medeniyet, yaşlar işleri ve sport boyunca Daimiy komissiyası Reisi Fiks Yefim Zisyeviç tantanalı sürette bu unvanlarnı berdi. Bu tedbirde Qırım Muhtar Cumhuriyeti Medeniyet ve sanatlar naziri Yermaçkov Aleksandr Leonidoviç, Nazir muavinleri Novoselskaya Arina Vadimovna ve Yerinâk Vadim Nikolayeviç, Qırım Muhtar Cumhuriyeti Medeniyet ve sanatlar nazirliginiñ Sanatlar idaresiniñ müdiri Tereşçenko Andrey Nikolayeviç ve fahriy musafirler – Rus medeniy merkezniñ müdiri Golubev Mihail Mihayloviç, belli Qırım şairesi Olga Golubeva. Musafirler içün küçük kontsert berildi, episi artistler öz ustalığını kösterdiler.

ZİYADİNOV ELMAR ESKENDEROVİÇ

Ziyadinov E.E., P.İ. Çaykovskiy adına aqmescit muzıka oquv yurtunı bitirip, 1995 senesi öz emek ve icadiy faaliyetini Bala ve gençler icadınıñ qırım cumhuriyet merkeziniñ kemane sınıfı boyunca bala muzıka studiyasınıñ ocası olaraq başladı. 2004 senesinden bugünge qadar “Qırım” qırımtatar folklor ansambli” Qırım cumhuriyet teşkilâtınıñ orkestrinde artist olaraq çalışmaqta. 2005 senesi S.S. Prokkofyev adına Donetsk devlet muzıka akademiyasını “Muzıka sanatı” zenaatı boyunca bitirdi.

Ziyadinov E.E. yüksek icra medeniyeti ve kemane çaluvınıñ tehnik serbestligine saiptir. Muzıkant büyük duyğusallıq, romantizm ile çala. Farqlı usullar ile faydalanıp, çeşit trel ve tremolo icra ete. Onıñ repertuarında İ.S. Bah, İ. Brams, D. Şostakoiç, M.Skorik, B. Polevoy, N. İşçenkonıñ eserleri bar.

E.E. Ziyadinovnıñ icadında ayrı yerni qırımtatar folklor sanatı tutmaqta. Halq muzıkasınıñ ritm zenginligini ve renkligini ifade etmek ustalığı artistke farqlı janrlarda eserlerni icra etmege imkân bere: dramatik – “Yüksek minareden”, “Qara deñiz üstünde”; lirik – “Nazlı da nazlı”, “Qarşıdan kördim seni”; şaqa – “Qaynana”, “Qalaylı qazan”. “Tım-tım” eski halq nağmesini icra eterek, muzıkant çalmanıñ husisiy bir usulnı işlete – pizzikato, eserni nağme güzelliginen yaraştıra. E.E. Ziyadinovnıñ icadı yüksek ğayeler ve büyük emotsional küçke maliktir. Kemaneciniñ solosı “Qırım” folklor ansamblniñ kontsert programmalarını yaraştıra.

Ziyadinov E.E. keñiş kontsert ve muzıkalı-içitmaiy faaliyet alıp barmaqta. “Qırım” ansamblniñ terkibinde büyük emiyetli kontsertlerde iştirak ete. 2004 senesi “Qırım” ansamblinen Urfa şeerine (Türkiye) “Kelaynak” halq muzıkası festivalinde iştirak etmek içün barğan edi. 2005 senesi “Kraina mriy” III halqara etno-festivalinde (Kiyev ş.), 2006 senesi “Sotsvetiye” Bütünukraina milliy medeniyetler festivalinde iştirak etti. Ziyadinov E.E. Cumhuriyet qırımtatar sanatlar muzeyinen işbirlik tutıp, sergi ve ekspozitsiyalar prezentatsiyalarınıñ muzıka eşligini teşkil ete.

Ziyadinov E.E. televizion muzıka yayınlarında sıq buluna. Türkiye milliy televideniyesinde “Dünya halqlarnıñ muzıkası” (İstanbul ş., 2008) ve “Gönül bağı” (Ankara ş., 2009) yayınlarında iştirak etken edi, artistniñ icadına dünyanıñ çoqusı ülkelerniñ folklorcı-muzıkantları yüksek qıymet kestiler, em de Qırımnıñ halq sanatınıñ yayılmasına isse qoşuldı. ATR Qırım televizion kompaniyasınıñ “Yırla, sazım” programmasında muzıkantnıñ iştiragi ananeviy oldı.

Semereli icadiy faaliyeti ve mutehassıs ustalığı içün Ziyadinov E.E. Qırım Muhtar Cumhuriyetiniñ Medeniyet ve sanatlar nazirliginiñ Fahriy yarlığınen (2007 s.), Qırım Muhtar Cumhuriyetiniñ Nazirler Şurasınıñ Teşekkürnamesinen (2010 s.) mukâfatlandırıldı. 2010 senesiniñ oktâbr ayında Ziyadinov Elmar Eskenderoviçke “Qırım Muhtar Cumhuriyetinde nam qazanğan artist” Fahriy unvanı berildi.

ANAFİYEVA MAYE DLÂVEROVNA

Anafiyeva M.D. öz emek ve icadiy faaliyetini 1994 senesi Qarasuvbazar rayon Medeniyetler eviniñ “Yeşil ada” halq ansamblniñ balet artisti olaraq başladı, aynı zamanda Qırım medeniyet oquv yurtunda horeografiya bölüginde oquy edi. 1997 senesinden bugünge qadar “Qırım” qırımtatar folklor ansambli” Qırım cumhuriyet teşkilâtınıñ balet artisti olıp çalışmaqta. 2004 senesi Kiyev milliy medeniyet ve sanatlar universitetiniñ horeografiya bölügini bitirdi.

Mutehassıs ustalığı, acayıp sana hususiyetleri, büyük temperament ve talapkârlığı M.D. Anafiyevanı başqalardan ayıra. Çeşit eski janr oyunlarında artist farqlı obrazlarnı yarata bildi: “Telli turna”, “Variraç”, “Tat qızı”. “Navrez bayramı” mevzu sanalaştırmasında Anafiyeva M.D. farqlı janrlarnı birleştire: oyuncı ve mimika ustalığı, söz ve atta yır. Oyuncığa ait olğan ekspressiya bütünley “Çoban” erkek oyunınıñ şaqa interpretatsiyasında aks etile. Oyuncınıñ köstergen çoban obrazı de toplanğan ve pek kergin, de kene de yengil ola, serbest oyun peyda ola.

Anafiyeva M.D. oyunlarnı da sanalaştıra. “Oyna, güzel”, “Mavı deñiz” horeografik kompozitsiyaları, Ukraina ve Tatarstan cumhuriyetinde nam qazanğan sanat erbabı Server Kakuranıñ muzıkasına qoyulıp, özgünlikleri ile ayırılıp turmaqtalar. Halq horeografiyasını estrada oyunnıñ elementleri ile bağlap, yañılıq kirsettiler ve milliy sanatnıñ inkişafına büyük isse qoştılar.

Anafiyeva M.D. çoq memleketlerni gastroller ile ziyaret etti – Rusiye, Belorusiya, Türkiye, Romaniya, Poloniya. Halqara festival ve yarışlarda iştirak etip, ğalebe qazanğan edi: “Tatarstan Cumhuriyetinde qırımtatar medeniyeti künleri” festivalinde (Kazan ş., 2002 s.); Silifke şeerindeki Halq icadınıñ XXX halqara folklor festivalinde Gran-pri (Türkiye, 2003 s.); “Veselkova Terpsihora” V dünya halqları oyunlarınıñ halqara festival-yarışında kümüş medal (Kiyev ş., 2005 s.); “Kraina mriy” Halqara etno-festivalniñ yarlığı (Kiyev ş., 2005 s., 2006 s.); “Derviza – Gezlev qapusı” qırımtatar ve türkiy medeniyetleriniñ IV halqara festivali (Kezlev ş., 2007 s.); “Solhat minaretleri” IV halqara festivali (Eski Qırım ş., 2009 s.); Pavel Virskiy adına halq horeografiyasınıñ II, III bütünukraina festival-yarışı (Aqyar ş., 2007 s., 2010 s.).

Anafiyeva M.D. daima devlet tedbilerinde iştirak ete: devlet bayramlarına, şeer kününe bağışlanğan kontsertler.

Sıñırsız icadiy energiya, yüksek mesuliyetlik duyğusı, parlaq individualligi yardımı ile seyircilerniñ sevgisini ve zanaatdaşlarnıñ ürmetini qazandı.

Çoq yıllıq semereli icadiy faaliyeti, yüksek mutehassıslığı içün M.D. Anafiyevağa Qırım Muhtar Cumhuriyetiniñ Medeniyet ve sanatlar nazirliginiñ fahriy yarlığı (2005 s.), Qırım Muhtar Cumhuriyeti Nazirler Şurasınıñ fahriy yarlığı berildi (2005 s.). 2010 senesi 18 oktâbr künü Qırım Muhtar Cumhuriyeti Yuqarı Şurası Prezidiumı Qararı ile Anafiyeva Maye Dlâverovnağa “Qırım muhtar Cumhuriyetinde nam qazanğan artist” fahriy yarlığı berildi.

 

BİKBULATOVA LEVİZA RUSTEMOVNA

Bikbulatova L.R. öz emek ve icadiy faaliyetini 1992 senesi Qırımtatar muzıkalı-drama teatrinde başladı. 1997 senesinden bugünge qadar “Qırım” qırımtatar folklor ansambli” Qırım cumhuriyet teşkilâtınıñ balet artisti olıp çalışmaqta. 2008 senesi Qırım medeniyet, sanat ve turizm universitetini “Horeografiya” zenaatı boyunca birtirdi.

Mutehassıs ustalığı, acayıp sana hususiyetleri, büyük temperament ve talapkârlığı L.R. Bikbulatovanı başqalardan ayıra. Artistniñ icadiy ösüvinde Tacikistanda nam qazanğan artist R.Bakkalnıñ mektebi ve Ukrainada nam qazanğan artist C. Osmanova ile işbirlik büyük rol oynadı.

Farqlı üslüp ve yonelişlerni birliştire bilgen Bikbulatova L.R. öz repertuarına icra tehnikada ağır olğan horeografik folklor kompozitsiyalarını kirsetti: “Ağır ava”, “Emir Celâl”, “Telli turna”; üslüpleştirilgen estrada sanalaştırmalarında: “Oyna, güzel”, “Bekleyim seni”, “Simferopol blüzü”. Oyuncı eski üslüpteki oyunlarnı icra etip, zemaneviy oyun tehnikadan da vazgeçmey.

Bibulatova L.R. öz tekrarlanmaz hususiyetleri, öz tabiatı olğan bir sıra obrazlarnı yarattı. Bu şeñ ve temperamentli kelin “Navrez bayram” sanalaştırmasında, sade köy qızı “Köyde bayram” horeografik kompozitsiyasında. Oyuncı farqlı halq oyunlarını da icra ete: ukrain, rus, özbek.

“Qırım” ansambli terkibinde Bikbulatova L.R. Rusiye, Belorusiya, Romaniya, Poloniya, Türkiyede gastroller ile bulundı. Bikbulatova farqlı yarış ve festivallerde iştirak etken edi: “Tatarstan Cumhuriyetinde qırımtatar medeniyeti künleri” festivalinde (Kazan ş., 2002 s.); Silifke şeerindeki Halq icadınıñ XXX halqara folklor festivalinde (Türkiye, 2003 s.); “Kraina mriy” Halqara etno-festivalniñ yarlığı (Kiyev ş., 2005 s., 2006 s.); “Derviza – Gezlev qapusı” qırımtatar ve türkiy medeniyetleriniñ IV halqara festivali (Kezlev ş., 2007 s.); “Solhat minaretleri” IV halqara festivali (Eski Qırım ş., 2009 s.); Pavel Virskiy adına halq horeografiyasınıñ II, III bütünukraina festival-yarışı (Aqyar ş., 2010 s.).

Bikbulatova L.R. devlet bayramlarına bağışlanğan kontsertlerde daima iştirak ete.

Bikbulatova L.R. yüksek mutehassıs ustalığını “Altınbaşlı Kiyev birleştire…” (Kiyev ş., 2003 s.) Bütünukraina medeniy aktsiyasında kösterdi. “Veselkova Terpsihora” V dünya halqları oyunlarınıñ halqara festival-yarışında (Kiyev ş., 2005 s.) “Qırım” ansambli kümüş medal qazanğanında büyük issesi bar.

Semereli icadiy faaliyeti ve mutehassıs ustalığı içün Bikbulatova L.R. Qırım Muhtar Cumhuriyetiniñ Medeniyet ve sanatlar nazirliginiñ Fahriy yarlığınen (2007 s.), Qırım Muhtar Cumhuriyetiniñ Nazirler Şurasınıñ Teşekkürnamesinen (2010 s.) mukâfatlandırıldı. 2010 senesiniñ oktâbr ayında Bikbulatova Leviza Rustemovnağa “Qırım Muhtar Cumhuriyetinde nam qazanğan artist” Fahriy unvanı berildi.

BEKİROV ARSEN ENVEROVİÇ

Bekirov Arsen Enveroviç öz icadiy faaliyetini 1991 senesi “Fidanlar” bala ansamblinde başlap, soñra “Teselli” ansamblinde devam etti. Öz emek faaliyetini 2004 senesi “Qırım” qırımtatar folklor ansambli” Qırım cumhuriyet teşkilâtında vokalist olaraq başladı.Aynı senesi P.İ. Çaykovskiy adına Aqmescit muzıka oquv yurtunıñ “Muzıka sanatı” fakultetiniñ vokal bölügini bitirdi. 2010 senesi S.S. Prokofyev adına Donetsk devlet muzıka akademiyasınıñ Aqmescit fakultetiniñ “Hor dirijorı” bölügini bitirdi.

A.E. Bekirovnıñ icadı vokal istidatı, yüksek mutehassıs ustalığı ile ayırıla. Lirik tenorğa saip olğan yırcı ulu klassik bestekârlarnıñ eserleri yer almaqta: E.Kurtis, C.Verdi, S.Saturi; ukrain, rus, yunan halq yırları; estrada janrı.

A.E. Bekirovnıñ icadında ayrı yerni qırımtatar halq yırları ala. Milliy folklor ögrenüvinde Ukrainada ve Tatarstan cumhuriyetinde nam qazanğan sanat erbabı S.Kakuranıñ mektebi emiyetli rol oynadı. Artistniñ icra etken eski halq yırları – “Gidin bulutlar”, “Mecbur oldım”, “Qara qızlar” – seyircini ayrette qaldıralar. Qırımtatar halq şaqa yırları “Noğay beyitleri”, “Yazğa çıqsam”, “Alçaq evniñ töpesi” A.E. Bekirovda pek original olıp çıqalar.

A.E. Bekirovnıñ istidatı oyuncı ustalığında da aks oluna. Bunı “Toyğa davet etemiz” sanalaştırmadaki baş rolü köstere. Bu sanalıştarmada eski qırımtatar adeti – toy kösterile. Artist milliy tabiatqa ait olğan temperamentli kiyev obrazını yarattı.

“Qırım” ansambliniñ terkibinde Bekirov A.E. devlet seviyesinde keçirilgen tedbirlerde iştirak ete. İcadiy aktsiyalar ve festivallerniñ daimiy iştirakçisidir – Türkiyede Qırımtatar medeniyeti künleri (İstanbul ş., 2004 s.), “Kraina mriy” V halqara etno-festival (Kiyev ş., 2005 s.), “Sotsvetiye” Milliy medeniyetlerniñ bütünukraina festivali (Aluşta ş., 2008 s.).

Bekirov A.E. vokal yarışlarınıñ ğalibi oldı: “Yunıy virtuoz” (Aqmescit ş., 2001 s.) – I derece diplomı; “Jivıye rodnki” (Aqmescit ş., 2001 s.) – Fahriy yarlıq; “Muzıkalnaya Tavriya” (Herson ş., 2005 s.) – III derece diplomı, “Zolotoy hit” (Aqmescit ş., 2005 s.) – I derece diplomı; “Altın beşik” milliy sanatnıñ V halqara yarışı (Yalta ş., 2007 s.) – I derece diplomı, “Nasledniki Süyümbike” V halqara türk-tatar festivali (Yalta ş., 2010 s.) – I derece diplomı. Yırcı “Eminim” adlı solo kontsertini keçire, aynı adlı albom de 2006 senesi çıqa.

Semereli icadiy faaliyeti, yüksek mutehassıslığı ve qırımtatar milliy sanatnıñ inkişafına qoşqan issesi içün A.E. Bekirovnı Qırım muhtar Cumhuriyeti Medeniyet ve sanatlar nazirliginiñ Fahriy yarlığı (2006 s.), Aqmescit şeer şurasınıñ Fahriy yarlığı (2009 s.), Qırım Muhtar Cumhuriyeti Nazirler Şuarsınıñ Teşekkürnamesi (2010 s.) ile taqdirlendi. 2010 senesiniñ oktâbr ayında Bekirov Arsen Enveroviçke “Qırım Muhtar Cumhuriyetinde nam qazanğan artist” Fahriy unvanı berildi.