Qırım ealisiniñ ve müsülman ummasınıñ birligini bozmaq ıntıluvlarıñız, bir sıra ibadethanelerimizni zapt etilmesini teşkil etkeniñiz munasebeti ile QMDİ sizge muracaat ete.
Özüñizni Ukraina müftisi olaraq ilân etip, soñki 11 yıl devamında qırım müsülmanlarınıñ añlarına biri-birine nefret ğayesini aşlamağa isteysiñiz. Qırımdaki hadimiñiz Veliyev Ridvan ve onıñ tarafdarları sizge baqıp, özlerini Qırım müsülmanlarınıñ Diniy Merkezi olaraq ilân ettiler.
Bütün dünyad atanılmağan habaşizm sektasınıñ er biz azası kibi, Siz ve Qırımdaki hadimiñiz akimiyteni zapt etmek ıntıvuvlarında İslam degerliklerinden çoqtan uzaqlaştıñız. Ukrain memurlarınıñ rüşevtçiliginen faydalanıp, Siziñ habaşist qurumıñız ukrain ve Qırım müsülmanlarınıñ öz liderlerini seçmek aqqını körmemezlikke ala.
Daa iç bir vaqıt esasen qırımtataralrdan ibaret olğan Qırım müsülmanlarınıñ başında arap ülkeden kelgen insan turmağa ıntılmağan edi. Halqımıznıñ çoq asırlı adetlerinde qırımtatarlarnıñ bir de bir idolğa, şu cümlede habaşizm ideologı Al-Harari al-Habaşige baş eggenleri misali yoq.
Ukraina Müftisi olaraq ilân etilmeñizden ğayrı, “qazançlarıñız”ğa bularnı da qoşmaq kerek:
1. 2008 senesi Ukraina müsülmanları içün Hacğa kvotalar bermek aqqınıñ uzurpatsiyası, bunıñ içün Ukraina ve Qırım müsülmanlarından çoqusı Hacğa barıp olamadı;
2. 2008 senesi qırımtatar teatrinde kütleviy qarşılıqnıñ teşkil etilmesi;
3. Kezlev şeeriniñ İsmail-bey qasabasında ve Bahçisaray rayonınıñ Malosadovoye köyünde ibadethanelerniñ zapt etilmesi ve bizim din adamlarımıznıñ çıqarılması;
4. Kezlev şeerinde İsmail-bey qasabasınıñ müsülman mezarlığında adları, ölüm sebepleri ve keçmişi belli olmağan insanlarnıñ cinaiy defn etilmesi;
5. İdeologiyañıznen razı olmağan qartlarımıznıñ köteklenmesi, QMDİ temsilcileriniñ öldürüv ile qorqutmaları;
6. Müsülmanlarnıñ biri-birine qarşı qoyulması, kâfirlikte qabaatlanuv yolu ile ailelerniñ bozulması, imidj uydurmaq ve müsülmanlarnı bölmek içün, bir köyde ve qasabada aynı insanlardan ibaret olğan bir qaç muhtar din cemiyetlerniñ teşkil etilmesi.
Habaşizmniñ sekta iseologiyasına qırımtatarlarnıñ adetleri hususiyetini bermek isteysiñiz, amma yuqarıda aytılğanlardan iç biri qırımtatarlarda iç bir vaqıt yoq edi.
Kiyev ve Qırımnıñ ayrı memurları ile belli munasebetleriñiz yardımınen yaqın vaqıtqa qadar yapılğan areketleriñiz içün mesuliyelikten qaçına bile ediñiz, amma endiden soñ Qırm müsülmanlarınıñ cemiyetine fitne kirsetüv boyunca er bir adımıñız bizim qarşılığımızğa rastkelecek.
Sizni ve tarafdarlarıñıznı mesuliyetlikke celp etmek içün, em İslam çerçivesinde, em ukrain qanuncılığı çerçivesinde bütün ğayretlerimizni sarf etermiz.
Ümüt etemiz ki, İslam degerliklerni hiyanet maqsadlarda qullanğan habaşizm ve başqa sektalarnıñ ideologiyalarınen küreşimizde Allah bizge yardımcı olur.
QMDİ Yuqarı Keñeşi
______________________________________________________________________________
QIRIM, ÖZBEKİSTAN, QIRĞIZISTAN, TACİKİSTAN, AZERBAYCAN MÜSÜLMANLARINA MURACAAT
Qırım müsülmanlarınıñ diniy idaresi (QMDİ) Qırım ve çetel müsülmanlarına Kezlev şeerinde yerli mezarlıqta defn etilgen belgisiz insanlarnıñ aqrabalarınıñ qıdıruvı boyunca muracaat ete.
İdaremizge belli olğanı kibi, 2006-2011 seneleri din sektalardan biriniñ temsilcilerniñ cinaiy niyetleri neticesinde 18 belli olmağan insan defn etildi, tahminen Özbekistan, Qırğızıstan, Tacikistan ve Azerbaycandan işçiler. Defn etilgenlerden biriniñ adı belli oldı – Qırğızıstan vatandaşı, özbek Fayziyev Rustam, 2009 senesi 551 sanı altında defn etildi.
Qalğan insanlarnıñ adları, ölümlerniñ sebepleri belli degiller, mahsus öldürülgenleri tahmin etile. Aqrabaları mezarlarını ziyaret etmeyler, demek, yaqınlarnıñ vefat etkenleri aqqında haberleri yoq.
2006-2011 seneleri Qırımda ve Cenüp Ukrainada ğayıp olğan Orta Asiya ülkelerniñ emek migrantlarnıñ aqrabaları ve tanışlarına muracaat etemiz. Belki, ğayıp olğan yaqınlarıñız Kezlev şeeriniñ İsmail-bey qasabasınıñ yerli müsülman mezarlığında defn etilgenler.
Yazıq ki, belli olmağan insanlarnıñ tek defn etilgen tarihını bilip oldıq.
Bu mesele dair bir de bir malümatı olğan ya da öz yaqınlarını qıdırğan er bir insannı seslenmege rica etemiz.
Muracaat içün adres: Ukraina, Qırım Muhtar Cumhuriyeti, Aqmescit ş., Kurçatova soq. 4.
Tel +30652274353
e-mail: muftiyat@qirimmuftiyat.org.ua.