“Aqlını toplamasa, oğlumdan vazgeçmege azırım…”

11.05.20160:19

Qırım müsülmanlarınıñ Diniy İdaresi “İSLAH” programmasınıñ çerçivesinde öz halqınıñ taqdirine pervasız qalmağan Qırım ealisinden kelgen malümatnı olarnıñ razılıqları ile bastırmağa devam ete. Qırım ealisini öz kelcegine, añları din satıcılarnıñ elinde olğan öz balalarınıñ taqdirlerine pervasız olmamağa çağıramız.

Havfsızlıq içün, vaqialar iştirakçilerniñ adları ve soyadları deñiştirilecekler ya da aytılmacaqlar, amma QMDİ elinde muracaat etkenlerniñ yazı arizaları bar.

“Men Aqmescit rayonında yaşayım, ailemde yüz bergen meseleni çezmege yardım etmek ricası ile muracaat etem.

Bir qaç vaqıt evelsi eki oğlum Hizb-ut Tahrir partiyasına kirdiler, ondan soñ ailemizde davalar başlandı. Oğlularım er vaqıt bu sekta-partiyanıñ ğayelerini propaganda eteler, Ukrainada ve Qırımda Halifatnıñ qurulması aqqında aytalar, menim aytqanlarımı diñlemeyler.

 

Ortancı oğlum bu sene evlenmege istedi, amma olcaq apayına şart qoydı – hicab kiymek kerek. Olacaq kelinimniñ babasınen böyle şartlar qoyulmasına qarşı çıqtıq, çünki bizim toy adetlerimizde hicab kiyilmesi yoq. Neticede toy merasimi keçirlüvinde kene de qarşılıqqa keldik, oğlum oyun ve muzıka olmacağını dedi, amma kelinniñ tarafı da buña qarşı edi. Men, baba olaraq, halqımızğa ait adetler keçirilmese, toy asıl da olmacağını ayttım. Vaziyet o qadar kergin oldı ki, men sektağa kirgen oğlumnen bir evde endi oturıp olamayım. Er afta oğlularım Hizb-ut Tahrir partiyasınıñ izdeşlerinen Yalta şeerinde körüşeler, Yalta camisinden qartlarnı ketmege mecbur etip, anda öz körüşüvlerini keçireler. Ne qadar acınıqlı olsa da, amma aytmağa mecburım, aqlını toplamasa, oğlumdan vazgeçmege azırım. İç kimse bizge yardım etip olamay.

Men esli-başllı adamım, bu sektanıñ ğayelerine qarşı çıqam, olar ailemizniñ bozulmasına sebep oldılar. Halq birleşmek imkânını qıdırğanda, olar halqımıznı ayırmağa tırışalar.

Yuqarıda aytılğan vaqialar neticesinde ailemiz bozula, dualar ve bayram evimizde keçirilmey, çünki evimizge kimseni çağırıp olmayım, Hizb-ut Tahrir propagandası başlana, men kirişem, dav başlana. Öz oğlanlarımı Hizb-ut Tahrir içün östürdimmi, endi menden uzaqlaşsınlarmı dep?

Özümniñ misalimde QMDİ’ne halqımızğa KİV’dan yarıadamızda sektalar faaliyetini toqtatmaq kerekligini añlatmağa rica etem. Aileler bozulalar, oğullar babalarını diñlemeyler, milliy adetler yoq etileler, ve yaqın kelecekte farqlı sektalarnıñ azaları olğan qırımtatarlar arasında davalar çıqa bile. Hizb-ut Tahrir azaları olğan köyümizniñ sakinleriniñ çoqusı tasil bile almadı, olar sanki bir hastalıqqa oğrağanlar. Yazıq ki, Vatanğa qaytqanınen halqımıznıñ küreşi bitmedi, eñ ağır devri başlandı – özgünligimizni saqlamaq ve farqlı yabancı ideologiyalardan qorçalanmaq kerek.

Rica etem, arizamnı “İslah” programmasına qoşuñız ve Qırımda farqlı sektalarnıñ faaliyetini toqtatmaq içün er şeyni yapıñız”.