Aqmescitke niayet onıñ skif ve qırımtatar tamırları qaytarılacaq.

11.05.20160:19

Qırım medeniy mirasını qoruv boyunca cumhuriyet komitetniñ reisi Sergey Tur Aqmescit şeer başı Viktor Ageyevge şeerniñ peyda oluv tarihını yañıdan baqıp çıqmaq ricası ile mektüp yolladı.

‘Segodnã’ (‘Bugün’) gazetasınıñ malümatlarına binaen, Tur şeerniñ peyda oluv tarihını milãdımızdan evel 185 senesini saymağa teklif ete. Aynı bu tarihte skif devletiniñ paytahtı- Niapol Skifskiy meydanğa ketirilgen edi.

‘Mezkür abideniñ tetqiqi neticesinde küçlü imaye divarları, saraylar, çar dürbelerniñ qalımtıları keşf etilgen edi,-dep aytıla mektüpte. -Bütün mevcut malümatlar Niapol Skifskiy paytaht statusında Qırımnıñ eñ qadimiy mesken yeri sayılğanını tasdiqlay. Böyle etip, Aqmescitniñ resmiy yaşını 226 dan 2196-ğa kötermege mantıqlı olur dep sayamız’.

Şeer yaşını deñiştirmek ğayesine Aqmescit şeer şurasınıñ icra komiteti yanında cemaat keñeşi qoltuttı. KHVnen bağ tutuv boyunca mesuliyetli Georgiy Kogonoşvilliniñ aytqanına köre, Aqmescit yaşınıñ arttırılması şeerge ‘Yunesko’ cedvellerine kirip, halqara şeer-yadikãrlığına çevirilmege imkãn berecek, bunıñ neticesinde ise Qırım paytahtı turistlerni celp etip, şeerge sermiyalarını arttırmağa yardım etecek.

 

Aynı zamanda da, şeer gerbni deñiştirmek imkãnı da muzakere etile: şimdiki balqurt resimi yerine skif atlınıñ resmini qoymağa teklif etile.

Belli olğanı kibi, bu künge qadar Qırım paytahtınıñ peyda oluv tarihı olaraq şeerge yañı ad qoyuluv tarihı sayıla edi. Qırım Rusiye tarafından işğal etilgen soñ şeer adı qırımtatarca Aqmescitten suniy uydırılğan ‘Simferopol’ (‘ Fayda şeeri’) adına deñiştirildi. Böyle etip, şeerniñ Qırım hanlığı terkibindeki tarihı ile bağı üzülip, Rusiye imperiyasınen bağlı er şey yoq etile edi.

Qırımtatar Milliy Meclisniñ azaları şeerniñ adı deñiştirilgeniniñ yıllığını tantanalı qayd etilmesini şübege oğratıp, şeerge onıñ aqiqiy yaşı qaytarılmasını talap ete ediler.

Tarihçilerniñ malümatlarına köre, milãdımızdan evel daa III asırda şimdiki Aqmescit territoriyasında skif çarlığınıñ paytahtı- Niapol Skifskiy, milãdımıznıñ XV asırdan başlap ise qalğa sultannıñ yerleşken yeri ve Qırım hanlığınıñ esas merkezlerinden biri sayılğan Aqmescit yerleşe edi.