Qırım vatandaş cemiyetiniñ qaviyleştirme programmasınıñ meneceri
‘İslãhlar oğrunda birleşemiz’ leyhası (UNITER)
Menim esas maqsadım- Qırımda vatandaş(grajdanlıq) cemiyetini inkişaf etmek, cemaat teşkilãtlarını ileri ketmesine yardım etmek. İnsanlarnen çalışmaq yengil degil, amma aynı zamanda zevqlıdır. Bu işten keyflenem. Men bugünki hayatımızda aqiqaten bir şeyler deñiştirmege ğayret etkenler, kreativ, meraqlı ğayelerni amelge keçirmege tırışqanlarnen çalışam.
İdeal planlar olmağanına eminim. Niyetler amelge keçirilmese, bu niyet etkenniñ problemasıdır. Daa da güzel planlaştırmaq kerek.
Devlet hızmetinden ketkenime peşmanımmı? Bu qararğa kelmek menim içün yengil degil edi. Bunıñ sebebi devlet hızmetinden ketkenim degil de, güzel, dostane kollektivden ketkenimdir. Men 7 yıl devamında Qırım parlamentiniñ vitse-spikeri ve soñra da Bağçasaray rayondevlet memuriyetiniñ reisi İlmi Umerovnen çalıştım. Bu insan teşebbüske qoltuta, er vaqıt tevsiye bere, inkişaf etmege imkãn yarata. Bundan da ğayrı, men daa devlet hızmetine qaytarım kibi duyam.
Bağçasaraynı, anda yaşağan, çalışqan insnalarnı sağınam.
İşimden dolayı maña çoq yerlerge, şu cümleden çetel yerlerge sıq-sıq barmağa kerek ola. Bir çoq memleketlerde oldım, çeşit medeniyetlernen tanıştım, amma Şarq ve Ğarpnı birleştirgen özgün medeniyetke saip İspaniya eñ çoq teessurat qaldırdı.
Men mına endi 4 yıl devamında ev quram. Qurucılıq soñuna kelmekte. Men evni aşıqmayıp quram ve mümkün olğanı qadar tabiy malzemelerni işletmege tırışam.
Evimni qırımtatar mimarcılıqnıñ unsurlarınen quram. Eminim ki, qırımtatarlar öz mimarcılıq adetlerini ileriletmeliler. Zaten etnik mimarcılığından daa tabiy daa mod şey ne ola bilir? Avropada soñ yıllarda etnik mimarcılıq ep populãr ola, etnouslüpte evler qurmaq ise nezaket alãmeti sayıla. Semetdeşlerimiz evlerini qırımtatar üslübinde qurğanlarını ister edim. Bugünde böyle evlerniñ leyhalarını yapqan mimarlarımız bar. Böyle etip, biz öz mimarcılığımıznı kütleviyleştirmekten ğayrı Qırım şeer ve köylerniñ obrazını bizge yaqın ve aziz sıfatına ketirermiz.
Er bir insannıñ maqsadı olmaq kerek ve o onı amelge keçirilmesine ıntılmalı.
Qadınnıñ aqılı, nezaketi, terbiyesi, qoranta ve balalarğa sevgisi onı misalsiz yapa. Kerek daqqada susa bilgen, öz ziyrekligini numayış ete bilgen, erkegine qoltutqan, aile ocağını qorçalağan qadın- misalsizdir.
Çeşit silãlarnen qullanmağa ögrenmege istey edim.
Ömürarqadaşım Elvinanen institutta huquq fakultetinde tanış olğan edik. Biz artıq 16 yıl berabermiz. 3 yıl toydan evel körüşken edik ve 13 yıl evlimiz. Ömürarqadaşım pek dülber qadın ve yuqarıda añğan keyfiyetleriniñ saibidir. Onıñ kök kibi mavı közlerini ilk körgende begendim.
Elimden kelseydi, paralarnı yoq eter edim. Aqça peşinden ketkenler zayıf olalar. Aqçasız yaşamaq içün zarur şeylerni alıp alamazsıñ ebet. Onıñ içün para menim içün, maqsat degil de yaşayış seviyesini eyiliştirgen bir vastadır.
Eñ tüşünmeyip yapqan areketlerimden biri Qırımğa köçip kelgenimni saymaq mümkün. Men 16 yaşında edim, men daa 11 sınıfnı bitirmey edim, amma ana-babama Vatanğa qaytacağımnı bildirdim. Qurman rayonı Amurskoye köyüne tuvğanlarıma kelip, mektepni, soñki çerigini bitirdim, institutqa kirip, onı bitirdim, evlendim, çalıştım… Ana-babam ise Qırımğa tek 8 yıldan soñ keldiler.
Men tarihnen bağlı er şeyni begenem. Kitap oqumaq, teleyayinlarnı seyir etmek, arheologiya ve tarih sevdalarınen qonuşmaq. Bir vaqıtları men arheologi olmağa pek istey edim, amma ne içündir adliyeci oldım.
Soñki vaqıtta men tüş körmeyim.
Men er kes kibi hatalar yapam. Amma er vaqıt olarnı talil etmek ve hulãsalar çıqarmağa tırışam. Hatanı tüzetmege ağır, amma onıñ aldını almaq mümkün.
Sağlıqnı saqlamaq, özüne diqqatlı olmaq kerek. Yazıq ki, ekseriyetnen insanlar sağlıq aqqında tek onı coyğan soñ tüşüneler.
Hayatımda bütün istegenlerimni amelge keçirip yetiştirmem dep qorqam.
Dünyada sevgige eñ çoq muhtac olğanlar- balalardır. Amma aynı zamanda da, sevginiñ eñ küçlü menbası da balalardır. Olar seniñ sevgiñe toysalar, o sevginen sennen de paylaşalar!
Malümat:
Ayder Halilov
1977 senesi 11 fevralde Taşkent vilãyeti, Kibray köyünde dünyağa keldi. Babası- arbiydir, yaşağan yerlerini sıq-sıq deñiştirgenleri içün Ayder 7 mektepni deñiştirmehe mecbur oldı. 2000 senesi Odessa Milliy huquq akademiyasınıñ Qırım filialını bitirdi. Qırımtatar Meclisiniñ siyasiy huquqiy bölüginde, çeşit cemaat teşkilãtlarında, QMC Yuqarı Şurasınıñ reis muaviniñ yardımcısı, Bağçasaray rayon devlet memuriyetiniñ reisi olaraq çalıştı. Qırımtatar qurultayınıñ delegatı, Qurultay Teftiş komissiyasınıñ azası. QMC Yuqarı Şurası reisiniñ ve QMC Nazirler Şurası reisiniñ minnetdarlıqları ile taqdirlengen edi.
Ay-Melevşe azırladı