Qırım ve Litva müftiyatları işbirlik quracaqlar
Litvada Qırımtatar Milliy Meclisiniñ temsili, litva tatarlar cemiyetler Birliginiñ reisi doktor Adas Yakubauskas 21 sentãbrde Aqmescitte Qırım müsülmanlar müftisi haci Emirali Ablayevge Litva müftiyatınen işbirlik aqqında añlaşmanı imzalamağa teklif etti. Qırım müftisi teklifni qabul etip, böyle kibi añlşamalarnıñ imzalanması Poloniya, Latviya, Belorusiye müfityatlarınen közde tutula.
Bağçasarayda ‘Alma oquvları’ keçirildi
Bağçasarayda keçken ‘Alma oquvları’ ilmiy konferentsıyasında Ukraina ve Rusiye alimleri yarımadamıznıñ tarihı, Parij añlaşmasınıñ imzalanması, Qırım cenkinden soñ Rusiye imperiyasınıñ vaziyetinen bağlı meselelerni muzakere ettiler. Ayrıca da nevbetteki maruzalar diñlenildi: ‘ Razvedka ve Alma özeniniñ arheologik tetqiqatları’, ‘Tarihiy savaş alanları miras obyektleri olaraq’, ‘Alma savaşınıñ efsaneleri’.
Malümat: Qırım, ya da Şarq cenki 1853-1856 ss. Rusiye imperiyası ve Britaniya, Frenkistan, Osman imperiyası ve Sardin qırallığı terkibinde koalitsıya arasında cenktir. Savaşlar Kavkaz, Dunay kinazlığı, Baltiya, Qara deñiz, Barents deñizlerinde, Kamçatkada yüz berip, Qırımda eñ kergin noqtasına keldiler. Alma uruşı 1854 senesi 8(20) sentãbrde yer aldı ve Qırım cenkiniñ birinci büyük uruşı oldı. İttifaqdaşlarnıñ şübesiz ğalebesine baqmadan, uruş Aqyarğa yollarını kestirdi. Bu sebepten qamaçavğa azırlanmağa biraz vaqıt bar edi.
Yaltada ‘Şarq bazarı’ halqara estrada konkursı olıp keçti.
22-26 sentãbr künleri Yaltada, ‘Yubiley’ sarayında VII ‘Şarq Bazarı’ halqara televizion estrada konkursı keçirildi.
Yarışta Ukraina, İspaniya, İtaliya, Rusiye, Latviya, Litva, AQŞ, Şvetsiya, Türkiye, Poloniya, İzrail, Ermenistan, Azerbaycan, Gurcistan, Belorus, Moldova, Qıbrız, Qazahstan, Kirgiziya, Tacikistan, Özbekistan, Afganistan, Almaniya, İndoneziya, İrlandiya, Gvineya, Serbiyadan icradılar iştirak etmek isteklerini bildirdiler. Qırımtatarlarnı ise Qırımda nam qazanğan artist Lenara Osmanova taqdim etecek. Konkursnıñ finalı ve gala-kontsertiniñ canlı numayışı 25 sentãbrge planlaştırılğan.
Belli şarqşınaslar Bağçasarayda
‘İslamiy teksti ve arab hurufat ananesi’ halqara konferentsıyası 20-22 künleri Bağçasarayda Zıncırlı medrese esasında çalıştı.
Konferentsıyanı Bağçasaray tarihiy-medeniy qoruğınıñ Baş müdiri Valeriy Naumenko ve belli alim-arheolog, Bağçasaray arheologik ekspeditsıyanıñ reisi Aliye İbragimova açtılar.
Konferentsıyada Rusiye, Ukraina, Ermenistan, Litva, Özbekistan, Latviya, Dagestan ve Bulğaristandan alim ve mutehassıslar iştirak ettiler.
İslamşınas, farsişınas, felsefe ilimler namzeti Pavel Başarin ‘A.S. Firkoviçniñ elyazma fondundan anonim tassavufiy yehudi-arap metinleri’ mevzusında maruza ile çıqışta bulundı.
E.Ametov ise İslãm III Giray ve Qaplan I Giraynıñ şved qıralları Karl XI ve Karl XII-ge yollanılğan mektüplerniñ tercimesi aqqında ikãye etti.
Konferentsıya çerçivesinde ‘Marcani’ fondunıñ kollektsıyasından basma şamailniñ ve Zıncırlı mederese kitaphanesinden elyazma kitabınıñ sergisi açıldı. Konferentsıya Bağçasaray tarihiy-medeniy qoruğı ve ‘Marcani’ fondu tarafından Qırım Hanlığı devirine ait malümatlarnıñ ögrenilmesine mutehassıslarnı celp etmek maqsadınen teşkil etildi.
Camala MTV Europe Music Awards 2011 mukãfatına namzet olaraq kösterildi.
Dünyada eñ prestij mukãfatlarından birisi sayılğan MTV Europe Music Awards 2011 Camalanıñ namzetligi kösterilgen. Mukãfat berilmesiniñ merasimi Belfasta 6 noyabrde olıp keçecek. Belli malümatlarğa köre, Camala, Sirena, İvan Dorn, Kazaky, Maks Barskih kibi ukrain icracılarnen bir sırada Best Ukrainian Act(eñ güzel ukrain icracısı) unvanına namzetler olaraq taqdim etilgen.
Ğalip, merasimniñ resmiy saytında keçirilgen rey berüvniñ neticelerine binaen belgilenecek.
Büyük Cuma-Cami leyhaları boyunca ekinci tur ilãn etildi.
Büyük Cuma-Caminiñ qurucılığı boyunca nezaret keñeşi leyhalarnı seçüv boyunca yarışnıñ birinci turını yekünlemege qarar berdi ve ekinci turğa azırlıqnı başladı. Keñeşiniñ toplaşuvında ekinci turğa 3 leyha kirecegi aqqında qarar alındı. Ekinci saylavlar neticelerine binaen, ekinci turğa keçecek leyhalar belgilendi-bular №2, №4, №7 leyhalardır.
Ekinci tur içün Cuma Cami leyhalarına yañı şartlar işlenilecek.
Bir qaç kün içersinde Keñeş azaları yazılı şekilde ekinci turğa keçken mimarlar
içün öz teklif ve tevsiyelerini yazıp berecekler.
Teklif ve tevsiyelerini mahsus iş gruppası toplaycaq ve umumiyleştirecek. Mezkür gruppağa Qırımtatar milliy meclisiniñ birinci muavini Refat Çubarov, Qırımda Ukraina prezidentiniñ daimiy temsilciniñ muavini İbraim Mamutov, QMDİ-niñ muşaverecisi Arsen Alçikov, QMDİ-niñ camiler bölüginiñ reisi Ruslan Burnaşev, QMDİ-niñ temsilcisi Cemil Bibişev, qırımtatar mimarı Zarema Nagayeva kirdiler.
Nezaret keñeşiniñ nevbetteki toplaşuvını 28 sentãbrde keçirmege közde tutula.
Nyu-Yorkta İ.Gasprinskiy adına mektep
24 sentãbr künü Nyu-Yorkta İ.Gasprinskiy adına mektep çalışmağa başlaycaq. Bu aqta AQŞ qırımtatarlar Assotsıatsıyası bildire. Aytqanlarına köre, dersler er afta cumaertesi künleri 11:30-13:30 qadar keçirilecek. Dersler din bilgilerinden başlanılacaq. Bundan da ğayrı, balalar qırımtatar, türk tillerini, milliy oyunlar ve tasviriy sanatnı ögrene bilirler. Assotsıatsıyada qayd etkenlerine köre, oqutuvnıñ fiyatı böyle olacaq: bir bala içün ayda 200 dolar, ekinci bala içün 175, ve üçüncisi içün 150 dolar.