Kastamonu, Sinop ve Çankaradan musafirler

11.05.20160:19

Qırımda resmiy ziyaret ile Şimal Anadolunıñ inkişafı agentliginiñ delegatsiyası bulundı, onıñ terkibine Kastamonu, Sinop ve Çankırı (Türkiye) şeerleriniñ merleri ve gubernatorları, resmiy şahıslar kirdiler.

20 iyül künü başlanılğan öz ziyaretiniñ çerçivesinde türk delegatsiyası Odessada Türkiye Cumhuriyetiniñ Baş konsulı Hüseyin Ergani ve Qırımda Türkiye Cumhuriyetiniñ Fahriy konsulı Seyran Osmanov ile 21 iyül künü Qırımtatar Milliy Meclis Reisi Mustafa Cemilev, Bütündünya qırımtatar kongressiniñ Prezidenti, Meclis Reisiniñ birinci muavini Refat Çubarov ve Meclisniñ tış işler bölüginiñ yolbaşçısı Ali Hamzin ile körüştiler.

Türk musafirleri tarif etkenleri kibi, Qırımğa iş ziyaretleri devamında bir sıra resmiy körüşüvler planlaştırıla – QMC Nazirler şurasınıñ yolbaşçılığınen, Qırım şeerleriniñ merlerinen. Bu körüşüvlerde Qırım ve Ukraina arasında içtimaiy-iqtisadiy ve medeniy işbirlik sualleri, şu cümlede Türkiye ve Qırımnıñ deñiz yalısında yerleşken şeerleri arasında naqliye bağı sualleri, muzakere etilecekler. Sinop vilâyeti gubernatorı Ahmet Cengizniñ sözlerine köre, Sinop-Yalta deñiz marşrutınıñ ve Aqmescit-Kastamonu aviareysiniñ teşkil etilmesi boyunca teklifler azır.

Öz nevbetinde, Qırımtatar Milliy Meclis reisi Mustafa Cemilev olarnıñ diqqatını ömürge keçirilgen leyhalarda insanlıq ölçüviniñ qıymetine celp etti. Qırım inkişafı ve qırımtataralr içün eñ aktual meselelerni seslendirip, Mustafa Cemilev ve Milliy Meclisniñ diger azaları qırımtatar halqınıñ iqtisadiy ve maneviy inkişafınen bağlı suallerde toqtaldılar.

Taraflar öyle kibi ziyaretler Ukraina ve Türkiye arasında dostane munasebetlerniñ pekinmesine yardımcı olacağında eminlikni bildirdiler.