Qırımtatar Meclis reisi Mustafa Cemilev ve onıñ birinci muavini, Refat Çubarov Meclis ofisinde Ankara qırımtatar derneginiñ Merkeziy ofisiniñ baş kãtibi Tücer Kalkay rehberligi altında Türkiyede Qırımtatar yardımlaşma ve medeniyet derneginiñ merkeziy ofis vekillerinen körüşti. Musafirlerniñ aytqanına köre, olar Qırımda 21-28 iyün künleri bulunıp, Ahmed İhsan Qırımlınıñ adına edebiy yarış ğalipleriniñ mukãfatlandırma tedbirinde iştirak etecekler. Bundan da ğayrı, türkiyedeki qırımtatar merkeziy derneginiñ delegatsıyası ‘Yeşil ada’ kompleksinde 21 iyünde ‘Közaydın’ resurs-informatsıon merkezi, ‘Nenkecan’ qadın-qızlar klubu’, ATR telekanalı, Meydan radiosınıñ destegi ile keçirilgen qırımtatar cemaatçılığınen adetiy toplaşuvda iştirak ettiler. Mezkür körüşüv ketişatında ‘Ayneni’ cıyıntığı taqdim etildi.
Delegatsıya Kezlev, Bağçasaray, Qarasuvbazar, Sudaq milliy mekteplerini ziyaret etti, Qırımtatar milliy bayraq künü bayramında iştirak ettiler.
Şunı da qayd etmeli ki, Türkiyede Qırımtatar yardımlaşma ve medeniyet derneginiñ merkeziy ofis vekilleri bu yıl infarkt keçirgen belli qırımtatar ressamı Ramiz Netovkinniñ Türkiyede tedaviylenmesini teşkil ettiler.