Qırımtatar Milliy Meclis reisiniñ birinci muavini Refat Çubarov Qırımtatar milliy bayraq kününiñ qayd etilmesine bağışlanğan tedbirlerniñ planını muzakere etmek içün, “Mecal” qırımtatar yaşlar teşebbüs gruppası ve başqa yaşlar teşkilâtlarnen körüşti.
İş körüşüvi Aqmescitte 23 aprel künü olıp keçti. Körüşüv ketişatında Aqmescit şeerinde Qırımtatar milliy bayraq kününiñ teşkil etilmesi ve keçirilmesi suali muzakere etildi. Em de “Mecal” teşebbüs gruppasınıñ esasında “Mecal”nıñ yolbaşçısı Ayder Acimambetovnıñ yolbaşçılığında ve “Vatandaş cemiyetiniñ institutı” Qırım Cumhuriyet içtimaiy teşkilâtnıñ reisi Rustem Ablâtifniñ koordinatsiyasında teşkiliy komitetniñ qurulması da muzakere etildi. Farqlı teşkilâtlarnıñ temsilcilerini kirsetilmesi közde tutula.
Qırımtatar milliy bayraq künü 26 iyunde, II Qırımtatar Milliy Qurultaynıñ işi başlağan künü, keçirilmesi aqqında qarar çıqarıldı. Tantanalı tedbir Aqmescit şeeriniñ merkeziy meydanında, Sovetskaya meydanında olıp keçecek.
İnformatsion yardım “Qırım Haber Ajansı” tarafından berilecek. Teşkilâtçılarnıñ sözlerine köre, tedbir keçirilüviniñ maqsadı – qırımtatar halqınıñ birleşmesine, qıırmtatarlarda vatanperver duyğularınıñ şekillenmesine yardım etmek, öz vatanperverligini ve milliy ananelerge sadıqlığını köstermek ve bu duyğularnı Qırım yarımadasınıñ qalğan sakinlerine de yaşatmaq.
Meraqlısı şunda ki, qırımtatar halqınıñ 1944 senesi sürgünliginden ve Vatanğa avdetinden soñ, böyle kibi umumhalq seviyedeki tedbirler ilk defa keçirilecekler.
“Mecal”nıñ malümatına köre, bayram tedbirleri çerçivesinde halq esnafcılıqnıñ ve elâl mahsulatlarnıñ sergi-yarmalığı, “Bizim taraf” bala resimleri yarışı, qırımtatar milliy küreşi keçirilecek, qırımtatar yırcıları ve oyun ansambllerniñ kontsertleri olacaq. Ondan da ğayrı, bayramnıñ teşkilâtçıları Qırımtatar milliy bayraq kününiñ çerçivesinde “Bayrağım” fotoyarışınıñ keçirilecegini ilân eteler.
QHA