Meclis akimiyet organlarına öz namzetlerini belgiledi

11.05.20160:19

Qırımtatar Milliy Meclisiniñ Aprel 1 künü olıp keçken kenişletilgen toplaşuvında Qurultay delegatları, regional meclis reisleri, qırımtatar cemaat teşkilâtlarınıñ vekilleri iştirak ettiler.

Toplaşuv devamında mart 29 künü ötkerilgen Qırımtatar Qurultayında Mecliske berilgen cumhuriyet icra akimiyet organlarına işke namzetlerni tevsiye etmek avalesine mart 30 künü Meclis alğan qarar leyhası muzakere olundı.

Seslendirilgen fikir ve teklifler közge alınıp qabul etilgen "Qırımnıñ kerçek şaraitte qırımtatar halqınıñ yerleşmesinen bağlı ameliy meselelerniñ çezimi aqqında" qararnı Meclis reisi R. Çubarov imzaladı.

Bu qararğa binaen Meclis qırımtatar halqınıñ yerleşmesinen bağlı ameliy meselelerni çezmek maqsadında Qırım Nazirler Şurasınıñ erkânında çalışmağa Qırım baş naziriniñ muavini vazifesinde Lenur İslâmovğa ve Cumhuriyet milletlerara munasebetler ve sürgün etilgen vatandaşlarnıñ işleri boyunca komitet reisligine Zaur Smirnovğa razılıq berdi.

R.Çubarov qayd etkenine köre, mezkür qarar Qırımda tamır halq olğan qırımtatar halqınıñ istegi ve razılığısız amelge keçirileyatqan siyasiy, iqtisadiy ve uquqiy deñişmelerni tanımay. Bundan da ğayrı Meclis reisi şuña da emiyet berdi ki, Meclis şimdilik ancaq 2 namzet kösterdi ve bu, akimiyetniñ qırımtatarlarnıñ meselesini çezmek oğrunda areket ve niyetlerini körmek içün yeterlidir.

"Lenur İslâmov ve Zaur Smirnov siyasetçi degiller, icra akmiyetinde olar siyasetnen meşğul olmaycaqlar, — dedi R. Çubarov – Siyasiy qarar almaq ve qıymet kesmek Qırımtatar Milliy Meclisi ve Qurultayınıñ işidir"

Qırımtatar Milliy Meclisiniñ qararı


"Qırımnıñ kerçek şaraitte qırımtatar halqınıñ yerleşmesinen bağlı ameliy meselelerniñ çezimi aqqında"

Qırım sakinleriniñ kündelik ömürini belgilemek içün tadbiq etileyatqan siyasiy, uquqiy, iqtisadiy ve diger deñişmeler Qırımnıñ tamır halqı qırımtatar halqınıñ buña razılığı ve istegisiz yapılmaqta.

Qırımda olıp keçken vaqialar içün mesüliyetni boynuna alğan akimleriniñ qırımtatar halqına nisbeten qapa-qarşı niyetlerni bildirgeni olar tarafından qırımtatar halqınıñ aqları ve menfaatları qorçalanacağına şübe doğura.

Qırımtatar Milliy Meclisine Qurultaynıñ mart 29 künü alğan "Qırımtatar halqınıñ öz tarihiy toprağı Qırımda öz-özüni belgilev aqqını qullanmaq aqqında" Qararnıñ amelge keçirilmesi boyunca tedbirler planını işlemek avale etilsin.

Aynı zamanda bugünki şaraitte qırımtatar halqınıñ meselelerini çezüvnen bağlı çoqtan-çoq problemler operativ şekilde seslenüvni ve olarnıñ çeziminde Meclisten vekâletlik alğan qırımtatar halqı vekilleriniñ bivasta iştirakini talap ete.


Qırımtatar Milliy Meclisi qarar bere:

1. Qırımtatar halqınıñ yerleştirüvinen bağlı ameliy meselelerni çezmek maqsadında Qırım Nazirler Şurasınıñ erkânına

LENUR İSLÂMOVnıñ – Qırım Nazirler Şurası reisiniñ muavini vazifesinde;

ZAUR SMİRNOVnıñ — Milletler ve sürgün etilgen vatandaşlarnıñ işleri boyunca cumhuriyet komitetiniñ reisi vazifesinde kirmesini mümkün dep saymaq.

2. Lenur İslâmov ve Zaur Smirnovğa qırımtatar halqınıñ yerleşmesinen bağlı meseleler çezilmesiniñ ketişatı aqqında er afta Qırımtatar Milliy Meclisiniñ toplaşuvında esabat bermek avale etilsin.

3.Qırım Nazirler Şurasınıñ erkânına tevsiye etilgen Lenur İslâmov ve Zaur Smirnovnıñ eki aftalıq faaliyetleri neticelerine köre qırımtatar halqı vekilleriniñ Qırım Nazirler şurasında çalışmalarınıñ devam etmesiniñ maqsadğa uyğun ya da uyğun olmağanı Meclis toplaşuvında tekrar baqılsın.

4. Zaur Smirnovnıñ aprel 1-den itibaren Meclis azalığını toqtatıp turmaq ve soñra Qurultaynıñ nevbetteki sessiyasında istifa etmek aqqındaki arizası.

5. Meclisniñ mezkür qararı Qırımnıñ tamır halqı olğan qırımtatar halqınıñ razılığı ve istegi olmadan Qırımda tadbiq etileyatqan siyasiy, iqtisadiy, uquqiy deñişmelerniñ tanılması degildir.

Refat Çubarov

Qırımtatar Milliy Meclisiniñ reisi

2014 senesi aprel 01.

Aqmescit ş.

_____________________________________________________________________________________

Mustafa Cemilev akimiyet organlarına qırımtatar vekillerini namzet olaraq kösterilmesinen razı degil.

Ukraina hlaq deputatı Mustafa Cemilev Milliy Meclisniñ akimiyet organlarına öz namzetlerini yollamaq qararına qoltutmadı. Amma aynı zamanda da, meslekdeşlerini añlağanını ve kimseni mahküm etmege niyeti olmağanını da bildirdi.

“ Men bu qararnen, iç olmağanda şimdiki vaqıtta, razı degilim. Amma olarnı añlamaq mümkün, çünki 300 biñ insannıñ meselelerini nasıl olsa da çezmek kerek olacaq,”- dep añlattı qırımtatarlarnıñ lideri. Mustafa Cemilev şunı qayd etti ki, Meclisniñ Qırım Nazirler Şurasına öz vekillerini yollanılması Qırımnıñ statusını qabul ete demek degildir. Qırım işğal etilgen territoriya sayıla.

Milliy Meclisniñ sabıq reisi bu qararğa tam bir qıymet kesmek imkânsız olğanını da bildirdi.

“ Bu qarar 100% faiz doğrudır, ya da aksine 100% yañlıştır demek mümkün degil. Men Kiyevde yaşap, ayşığımnı alıp tursam, menim semetdeşlerim başqa vaziyetteler. Olar işğal etilgen territoriyada yaşaylar ve biz areket köstermesek, vaziyetimiz ne olacağı belli degil,”- dedi Cemliev.

________________________________________________

Ukraina Çetel işler nazirliginde Meclis qararını añladılar.

Ukraina Çetel işler Nazirligi qırımtatar Milliy Meclisiniñ yañı qırım akimiyetinen işbirlikte bulunmaq qararını añlap qarşıladı.

Bu aqta Çetel işler nazirliginiñ informatıon siyaseti Departamentniñ direktorı Yevgeniy Perebiynis bildirdi.

“Olarnıñ istegen qararlarını almağa aqları bar. Qırımtatarlar şimdiki Qırımda ğayet ağır vaziyette bulunmaqtalar. Qırımtatarlar Ukraina birliginiñ tarafdarları olıp, Qırım işğalini ve aqsız keçirilgen referendumnı tanımağanını bilemiz,”-dep qayd etti Perebiynis.