Qırımtatar Milliy Meclisniñ oturışı / Qırımdaki saylavlar neticeleriniñ qısqa talili

11.05.20160:19

Qırımtatar Milliy Meclisniñ oturışı

2011 senesi 7 yanvar künü Aqmescitte Mustafa Cemilevniñ reisliginde Qırımtatar Milliy Meclisniñ nevbetteki oturışı olıp keçti.

Qırımtatar Milliy Meclisniñ azaları Meclisniñ Saylav ştabı tarafından azırlanğan QMC YŞ, yerli ve köy şuralarnıñ deputatları, qasaba ve şeer başları saylavlarınıñ neticeleri aqqında esabatlarını teslim ettiler (aşağıda qısqartılıp berile).

Saylav ştabınıñ yolbaşçısı Refat Çubarov esabat ile çıqışta bulunıp, keçken saylav kampaniyanıñ bazı hususiyetlerine, hususan saylavcılarnıñ alçaq qatnaşuv seviyesini, Meclis azalarnıñ diqqatını celp etti.

“Qırımtatar saylavcılarnıñ qatnaşqanları pek faal olmağanı bizni quvandırmay. Böyle vaziyetniñ sebeplerini qıdırmaq kerekmiz, ilk evelâ, episi seviyedeki milliy öz-özüni idare organlarınıñ faaliyetinde. 2010 senesi 31 oktâbr saylavlarında vatandaşlarımıznıñ qatnaşuv seviyesi Qırımnıñ farqlı regionlarında farqlı olğanını köz ögüne alsaq, añlaşıla ki, regional ve yerli meclislerge insanlar içün aktual meselelerniñ çezüvinde öz işiniñ usullarını deñiştirmek kerek”, -qayd etti Refat Çubarov.

QMC YŞ, yerli ve köy şuralarnıñ deputatları, qasaba ve şeer başları saylavlarınıñ neticeleri aqqında malümatnı diñlep, Qırımtatar Milliy Meclisi yañı saylanılğan deputatlar faaliyetiniñ koordinatsiyasına yonelgen tedbirlerni öz ögüne alğan qararnı qabul etti.

Qırımtatar Milliy Meclisniñ oturışı devamında ayrı sual olaraq Aluşta ve Canköy regional meclislerniñ saylavlarğa azırlıq vaqtında faaliyetleri baqıldı.

Bu sual oturış iştirakçileri arasında canlı muzakere doğurdı, bunınen beraber Meclis azalarnıñ çoqusı ciddiy teşkiliy tedbirler keçirilmesini talap ete edi.

Böyleliknen Canköy rayonında saylav kampaniyasınıñ neticeleri Narodnıy Ruh Ukrainı Canköy rayon teşkilâtınıñ yolbaşçısı Bucurov Abibullanıñ ambitsiyalarına bağlı olğan olsa, Aluşta regional meclisniñ reisi ve bazı azaları Qırımtatar halqınıñ Qurultayı ve Meclisniñ saylav suallerindeki qararlarını red ettiler.

Aluşta ve Canköy regional meclislerniñ saylavlarını ğayrıdan keçirmek qararı çıqarıldı.

Narodnıy Ruh Ukrainı partiyasınıñ Qırım teşkilâtına NRU Canköy rayon teşkilâtınıñ yolbaşçısını ğayrıdan saylamaq teklifinen muracaat etmek qararı da qabul olundı.

Meclisniñ oturışında Canköy, Aqyar, Aqmescit, Yalta regionlarnıñ yerli meclisler saylavlarınen bağlı sualler baqıldı. Aqmescit regional meclsini Aqmescit şeer ve Aqmescit rayon meclislerge bölmeg eteklifi de keldi.

Qırımtatar Milliy Meclisniñ azaları Meclisniñ topraq komissiyasınıñ yolbaşçısı Zevcet Kurtumerovnıñ Qırım sakinleriniñ, em qırımtatar, em başqa millet vekilleirniñ, teşebbüs yerleşüv qasabalarnıñ qanunlaştırılması aqqında malümatını diñlediler.

Zevcet Kurtumerovnıñ bergen malümatına köre, topraq aktsiyalarında 15 000 yaqın insan işitrak ete, şu cümlede 4000 – qırımtatar.

“Pozitsiyamızğa köre, toprağı olmağan er insan, Ukraina qanunına binayen, bu aqqını elde etmek kerek. Yazıq ki, soñki vaqıt bu qasabalarğa dair iç bir musbet qarar çıqarılmadı. Bizim tekliflerimizge akimiyet tarafından diqqat ayırılmay. Demek, akimiyet qurularında olğan qırımtatar deputatlarına bu mesele çezilüvi saasında daa da çoq çalışmaq kerek”, — dedi Zevcet Kurtumerov.

Qırımtatar Milliy Meclisniñ

Matbuat hızmeti

Qırımdaki saylavlar neticeleriniñ qısqa talili (qısqartılıp neşir etile)

Qırım Yuqarı Şurası

Qırım Yuqarı Şurası deputatları saylavlarında 1522000 saylavcıdan 729 648 işitrak etti. Böyleliknen, Qırım saylavcılarnıñ iştiragi 47,9% teşkil etti.

Qırımtatar halqınıñ Qurultayı tarafından tevsiye etilgen namzetler içün 51 253 saylavcı öz reyini berdi, saylavlarda iştrak etkenlerniñ 7,02% (teñiştirmek içün, “Milli Firka” tevsiye etken namzetler içün 7 268 insan rey berdi, 0,99% ).

QMC YŞ deputatları olaraq Qırımtatar halqınıñ Qurultayı tevsiye etilgen namzetlerden 5 deputat seçildi – Refat Çubarov, Leonid Pilunskiy, Enver Abduraimov, Remzi İlyasov, Aziz Abdullayev.

Aziz Abdullayev Qırım Nazirler Şurasınıñ reis muavini vazifesine tayin etilgeni içün, deputatlıq vazifesinden vazgeçip, onıñ yerine Safure Kacametova tasdiqlanacaq.

Narodnıy Ruh Ukrainı partiyasından namzetler QMC YŞ deputatları saylavlarında 15 okrugda işitrak ettiler, amma iç birisinde birincilikni qazanamadılar.

 

Aynı vaqıtta Partiya regionov tarafından qol tutlğan Bezaziyev Lentun ve Gafarov Edip QMC YŞ deputatları olaraq saylanıldılar.

Rayon ve şeer şuraları

Qırımnıñ rayon ve şeer şuralarına 123 qırımtatar saylanıldı. Olardan 101 deputat (82,11%) regional ve yerli meclisler tarafından tevsiye etilgenler, 11 (8,9%) – Partiya Regionov Ukrainı, 4 (3,2%) – USDP (“Milli Firka”), 7 (5,6%) – başqa partiyalardan.

Köy ve qasaba şuraları

Köy ve qasaba deputatlarına 859 qırımtatar seçildi.

Qırımtatar Milliy Meclisniñ Qararı

Qırım Muhtar Cumhuriyetiniñ Yuqarı şurası deputatları, yerli şuralar ve köy, qasaba, şeer başları saylavlarınıñ neticeleri aqqında

Qırım Muhtar Cumhuriyetiniñ Yuqarı şurası deputatları, yerli şuralar ve köy, qasaba, şeer başları saylavlarınıñ neticeleri aqqında malümatnı diñlep,

Qırımtatar Milliy Meclisi qarar çıqardı:

1. Malümatnı diqqat altına almaq.

2. Qırımtatar Milliy Meclis Prezidiumı regional ve yerli meclisler tevsiyesi ile saylanılğan yerli şuralar deputatlarınıñ faaliyetleriniñ kontroli ve talili boyunca teşkiliy-esap vesiqalarnıñ şekilleirni tasdiqlamaq ve regional meclisler adına yollamaq.

Becerilüv müddeti – 20 yanvar 2011 senesi.

Mesuliyetli – Çiygöz Ahtem.

3. Regional ve yerli meclislerge Qırımtatar Milliy Meclis Prezidiumı tarafından tasdiqlanğan müddetler ve şekillerge köre regional ve yerli meclisler tevsiyesi ile saylanılğan yerli şuralar deputatlarınıñ faaliyetleri aqqında yazılı esabatlarınıñ teslim etilmesini teminlemek.

Mesuliyetliler: Ahtem Çiygöz, regional meclislerniñ reisleri.

4. “Qurultay-Ruh” deputat fraktsiyasına QMC Yuqarı Şurasında “Qırımtatar halqınıñ Qurultayı, regional ve yerli meclisler tevsiyesi ile saylanılğan Ukraina YŞ, Qırım YŞ, yerli şuralar deputatları, köy, qasaba, şeer başlarınıñ muşaveresi aqqında” nizamnameni işletmek ve Qırımtatar Milliy Meclis Prezidiumınıñ tasdiqlanmasına teslim etmek.

Becerilüv müddeti – 20 yanvar 2011 senesi.

Mesuliyetliler: Refat Çubarov, Remzi İlyasov.

5. Qırımtatar halqınıñ Qurultayı, regional ve yerli meclisler tevsiyesi ile saylanılğan Ukraina YŞ, Qırım YŞ, yerli şuralar deputatları, köy, qasaba, şeer başlarınıñ muşaveresini 2011 senesi fevral ayında çağırtmaq.

Mesuliyetliler: Refat Çubarov, Remzi İlyasov, Ahtem Çiygöz, regional meclislerniñ reisleri.

Qırımtatar Milliy Meclis

Reisi Mustafa Cemilev

07 yanvar 2011 senesi, Aqmescit ş.