Meclis yañı akimiyetni tanımay

11.05.20160:19

Qırımtatar halqınıñ meclisi, muhtariyetniñ yañı akimiyetini qabul etmegeni ve onıñ temsilcileri ile iç bir añlaşmalar alıp barmağanı aqqında resmiy şekilde haber etti.

Qırımtatar halqı meclisiniñ başı, Refat Çubarovnıñ bildirgenine köre, ‘şubeli tarzda şekillengen Nazirler Şurası’ qanuniy olmaq içün ‘yalıñız ayrı insanlarnı degil de, bütünley qırımtatar halqını yüksek vazifeler vastası ile satın almağa’ tırışa.

‘Bazı siyasetçiler endi edepten tış vadeler seslendireler ve ükümetni tertip etmek tırışalar’, — dep qayd etti Meclis reisi.

Hatırlatayıq ki, Qırım parlamentiniñ, silâlı adamlar tarafından zapt etilgen binasında, deputatlar Anatoliy Mogilövnıñ akimiyetini istifağa çıqardılar ve Nazirler Şurasınıñ yañı terkibini şekillendirmege başladılar. Muhtariyetniñ yañı premyer vazifesine ‘Russkoye yedinstvo’ fırqasınıñ liderini tayın ettiler.

Qırım deputatı Rustam Temirgaliyevniñ bildirgenine köre, qırımtatarlarğa vitse-premyer, milletlerara munasebetler ve sürgün etilgen vatandaşlarnıñ işleri boyunca cümhüriyet komitetiniñ reisi vazifelerini, bir qaç nazirler muavinleri ve cümhüriyet komitetleriniñ reisleri vazifelerini ve aynı zamanda parlament komissiyasını teklif etmege azır ekenler.