Qırımtatar meclis reisi Mustafa Cemilev 2010 senesi 2 mart künü dostu, huquqqoruyıcı, Andrey Saharov Fondnıñ idare reisi ‘Memorial’ rüsiye cemiyetiniñ reisi ve insan haqları institutınıñ prezidenti Sergey Adamanoviç Kovalövni 80 yıllığı ile hayırladı.
‘Bütün hayır işleriñiz ve eyilikleriñiz 10 adam arasında bölünse, er biri aqqında o şerefli acayip ömür yaşadı dep aytmaq mümkün olur. Rüsiye demokratik qurulış tiklenilmegence Siz kibi insanlarnı parmaqlarda saymaq mümkün olğanı eñ büyük belãdır,’ –dep qayd ete Mustafa Cemilev öz hayırlav metininde.
Mustafa Cemilev Sergey Kovalövğa daa uzun mahsuldar ömür, o yaşağan memleketke ise eyilik, gürleşüv ve qomşular ile yahşı munasebetlerde bulunmaqnı tiledi.
Malümat içün:
Sergey Adamanoviç Kovalöv 1930 senesi 2 mart künü Sumı vilãyetinde Seredina- Buda şeerinde doğdı.
Keçmişte RF devlet Dumasınıñ deputatı, Rüsiye halq deputatlar qurultaynıñ deputatı. 1993-1996 seneleri- Rüsiye prezidenti yanında insan haqları boyunca Komissiyanıñ reisi.
Kovalöv- insan ve vatandaş haqlar Deklaratsiyasınıñ muelliflerinden biridir. Şimdi işletilgen Rüsiye anayasasınıñ ‘İnsan ve vatandaşnıñ haq ve serbestlikleri’ 2 maddesiniñ ve bir sıra federal qanunlarnıñ işlenilmesinde esas rolüni oynadı: ‘Siyasiy repressiyalar qurbanlarnıñ aqlanması’( 1991), ‘Fevqulade vaziyet aqqında’(1991), ‘Qaçaqlar aqqında’, ‘Mecburiy köç etkenler aqqında’(1993). 1994-1996 seneleri Kovalöv Rüsiye akimiyetniñ Çeçnãda areketlerini keskin tenqit ete edi. Cümhüriyette cenkniñ ilk künlerinden başlap, uruş areketler rayonında çalışa edi. Şimal Kavkazda ‘Memorial’ teşkilãtı ve bir sıra diger cemaat teşkilãtlarnıñ destegi ile meydanğa ketirilgen insan huquqları boyunca vekãletli Missiyasına yolbaşçılıq yaptı.
Meclisniñ matbuat hızmeti