Mustafa Cemilev türk dünyası halqlar cemaat teşkilãtlar vekilleriniñ körüşüvi munasebeti ile keçirilgen resmiy ziyafette iştirak etti.

11.05.20160:19

Qırımtatar meclis reisi, Ukraina halq deputatı Mustafa Cemilev Türkiyeniñ devlet naziri Faruk Çelik ile teşkil etilgen  türk dünyası halqlar cemaat teşkilãtlar vekilleriniñ körüşüvi munasebeti ile keçirilgen resmiy ziyafette iştirak etti.

 2010 senesi, 27 fevralde İstanbulda ‘Cevahir’ müsafirhanesinde olıp keçken bu ziyafette türk dünyasınıñ 2 biñge yaqın vekili iştirak etti: Balkan memleketleri, Avropa, Orta Asiya, Kavkaznıñ memleketleri.

Tedbir Türkiye cümhüriyetiniñ Nazirler Şurasınıñ erkãnında çetel türkler işleri boyunca Deportamentniñ meydanğa ketirilmesine bağışlanıldı.

 

Resmiy ziyafette qırımtatar halqını meclis reisi Mustafa Cemilev, meclis reisiniñ mesleatçısı, QHA informatsıon agentliginiñ general koordinatorı İsmet Yüksel,  Kiyevdeki qırımtatar cemaatlığınıñ temsili Arslan Umerov, Türkiyede qırmtatar meclisiniñ temsili Zafer Karatay, İstanbuldaki qırımtatar yardımlaşma ve medeniyet cemiyetiniñ reisi Celãl İçten, onıñ muavini Melih Cilsim, Ğarp Avropada qırımtatar yardımlaşma ve medeniyet cemiyetiniñ reisi Rafet Karanlık, Avropada qırımtatar meclis reisiniñ mesleatçısı Ahmet Yozay, Ankarada qırımtatar yardımlaşma ve medeniyet cemiyeti reisiniñ muavini Murtaza Esenkal, Ankaradaki qırımtatar yardımlaşma ve medeniyet cemiyetniñ baş hazinecisi Mustafa Şahin, Bursa qırımtatar yardımlaşma ve medeniyet cemiyetiniñ reisi Adnan Süyen, Eskişehir qırımtatar yardımlaşma , medeniyet ve sport cemiyetiniñ reisi Mesüt Yor, Qırım inkişafı cemiyetiniñ reisi Yümit Şilit , Kocaeli qırımtatar yardımlaşma ve medeniyet cemiyetniñ reisi İbraim Vefa Aracı, Tekirdag qırımtatar yardımlaşma ve medeniyet cemiyetiniñ reisi Fatih Erge.

Bütün türk dünyasınıñ vekilleri birer birer  alğış sözleri ile çıqışta bulundılar. Mustafa Cemilev ise öz çıqışında böyle söyledi: ‘ 1944 senesi qırımtatarlar Özbekistan ve Sibirge mecburiy alda köçürildiler. Kommunistik rejimi yıqılğan soñ biz vatanımızğa qaytmağa başladıq. Ebette, avdetimiz yengil degil edi. Hayatımıznı eñ başından başlamağa mecbur edik.  Biz bir çoq qıyınlıqlardan keçtik. Qaytqan soñ Qırımda türk-islam medeniyeti yoq etilgen , atta mezarlıqlarımız da yernen yeqsan etilgenini kördik. Biz bu ulu medeniyetni tiklemege, canlandırmağa tırışamız. 2009 senesi mayısta Bütündünya qırımtatar kongressini keçirdik. Kongressniñ işinde devlet naziri Faruk Çelik de iştirak etip, qırımtatar halqına qoltuttı, ruhumıznı köterdi. Oña ayrıca minnetdarlıqlarımıznı bildirem. Ondan da ğayrı Suleyman Demirelge de ayrıca teşşekürler bildirem. O Qırım içün yapqanlarını biz unutıp olamamız.’ Mustafa Cemilev bu deportamentniñ meydanğa ketirilüvi pek müim olğanını ve bunıñ ile bir sıra problemlerini çezmege imkãn olur degen ümütni bildirdi. Öz çıqışında Mustafa Cemilev böyle bir vaqianı ikãye etti: ‘1979 senesi meni Yakutiyağa apshanege yolladılar. O vaqıtta apshane eki qısımğa bölüngen edi. Birisinde ruslar, digerinde ise yakutlar. Men yakutlar olğan bölügine kettim. Olar ise meni körip taaciplendiler ve men yakut olmayıp ne içün mında kelgenimnen meraqlandılar. Men ise, insan öz tuvğanlarınen olmaq kerek dep ayttım ve Türkiye olarnı tuvğan, qardaş dep saya, men ise qırımtatarım ve türk halqqa aitim dep añlattım. Bundan soñ biz yakutlarnen dostlaştıq.’