UNUTMA

11.05.20160:19

Qırımtatar yaşlar teşkilâtları ve “Qırımtatar yaşalr merkezi”, “Qardaşlıq”, “Qırımtatar Vatanperver gruppası”, “Emel”, “Bizim Qırım” birleşmeleri, QMPU’niñ studentler birligi, “Nesil” dergisi “UNUTMA” aktsiyasını keñleştirmek maqsadı ile sürügünlik şaatlıqlarını toplamaq içün qırımtatar yaşlarını faal işke çevirmek teşebbüsi ile çıqışta bulundılar.

Yaşlar teşkilâtları öz internet resursları olğan qırımtatar gruppalarnı, birleşmelerni, cemiyetlerni, aktsiya sıñırlarınıñ keñleşmesi ve daa çoq içsanlarnı celp etmesi içün, öz saytlarında Ariza nümünesini ve sürügünlik şaatınıñ suallerini yerleştirmege çağıralar; nümünelerniñ elektron şekillerini avdet.org ve kirimtatar.com saytlarında tapmaq mümkün.

Bunınen beraber, er birimiz “Unutma” aktsiyası keçirilmesine öz şahsiy issesini qoşabilecegini unutmañız, — kâğıt, diktofon, videokamera, cep telefonğa sürgünlik aqqında şaatlıqnı yazıp, aktsiya teşkilâtçılarına yollamağa mümkün. Fotolar ile kelgen şaatlıqlar daa da qıymetli olurlar.

Öz aileñiz ve yaqınlarıñız, qomşularıñız ve facia aqqında şaatlıqnı özü toldurıp olamağanlardan başlañız. Başlarından bütün keçirgenlerini tafsilâtlı tarif etmege rica etiñiz, şu cümlede, bugün yanımızda olmağanlar aqqında. Bilgen, tarif etip olğan ve hatırlağanlar aramızda öyle de çoq degil, kün-künden de azlaşalar.

Arizalarıñız ve şaatlıqlarıñıznı 95017, АРК, г. Симферополь, ул. Шмидта, 2/Набережная, 27, Qırımtatar Milliy Meclisi adresine yollamağa ya da şahsen ketirmege rica etemiz. Zarfnı “Unutma” Umumhalq aktsiyası” yazısı ile belgilemege kerek.

Malümat içün telefon – 27-21-10