Avromeydanda M. Cemilevniñ çıqışı

11.05.20160:19

Qırımtatarlar, akimiyet tarafından tuttırılğan milliy bayraqlarımıznı eline alğan bir qaç on "tituşkalardan" ğayrı, daima Ukraina milliy-demokratik küçlerinen beraber olacaqlar.Bunı Ukraina deputatı, qırımtatar halqınıñ lideri Mustafa Cemilev 17-nci dekabr künü Mustaqillik Meydanında öz çıqışında bildirdi.

Aşağıda mezkür çıqışnı tolusınen ketiremiz.

Sayüılı dostlar, ürmetli vatandaşlarımız.

Men siziñ qarşıñızda faqat "Batkivşçina" fraktsiyasınıñ deputatı olaraq degil de, bütün qırımtatarlar tarafından saylanğan aliy vekâletli organı – qırımtatar halqınıñ Meclisi adından çıqışta bulunmaqtam. Emin oluñız ki, öz milliy ananelerine sadıq olğan qırımtatar halqı daima Ukraina milliy demokratik küçlerinen beraberdir. Bu yerde, yazıq ki, milletimizde akimiyet tarafından tuttırılğan bayrqlarımıznı eline alğan bir qaç on yüzsüz "tituşkalar" da mevcut. Bizde olarğa "sebatuşki" deyler. Avromeydan ve Ukrainanıñ Avropa yoluna çıqqanına Qırım müsülmanlarınıñ diniy idaresi de açıq qoltutmaqta.

Bugün Meydanğa eyecan, sayğı ve ümüt ile yalıñız bütün Ukraina degil de, bütün dünya baqqanını aytsam yalnışmam. Bugün siz bizim başından çoq felâket keçirgen devletimiz- Ukrainanıñ şerefi ve namusını qorçalamaqtasıñız. Devletimiz Avropa demokratik devletler sırasına kirecegi ya da evelki totalitar imperiyasını ğayrıdan tiklemek arzusınen yaşağan qomşu devletniñ ilâvesi olacağı bizim cesürligimizge bağlıdır. Üç afta evelsi memleket Açlıqnıñ 80 yıllığını qayd etti. Misli körülmegen bu vahşiy cinayet aqibetinde açlıqtan 5 million vatandışımız elâk oldı. Ebet, aradan çoq vaqıt keçti, amma közleriñizni yumıp bir tasavur etiñiz – beş million ceset, şu cümleden bir buçuq-eki million balaçıqlarnıñ cesetleri. Ne içün oldı bu? Ukrainlerniñ öz iqtisadiy ve siyasiy mustaqilliklerine tırışuvlarını toqtatmaq, "ukrain milletçiliginiñ belkemigini qırmaq" içün yapıldı. Çünki qudretli sovet imperiyasını Ukrainasız qurmaq mümkün degil edi. İmperiya ise onıñ halqlarına adsız-esapsız azap, meşaqatlar ketirip, bütün dünyada barışıqqa telüke oldı.

Suçsız, günahsız öldürilgen millionlarnıñ ruhları bugün bizlerge ümüt ile baqalar, çünki devlet akimiyeti başına kreml cellâtları tarafından ketirilgen iradesiz yolbaşçılar bizni demokratik Avropadan qoparmağa ve Ukrainanı öz tesiri altına almağa tırışalar. Men Avropa devletleri, Amerika ve Kanada diplomatları ve siyasiy erbaplarına Meydanımızğa ve Ukrainanıñ Avropa yönelişine destek köstergenleri içün teşekkür bildirem. Bunı kibi de sabıq sovet cumhuriyetlerinde, şu cümleden Rusiyede, sağ qalğan kommunist rejimi mahbüslerine Avromeydanğa qoltutqanları aqqındaki beyanatlarını kütleviy matbuat vastalarında tarqatqanları içün teşekkür bildirem.

Şusı quvançlı ki, bu Meydanda bulunğan insanlarnıñ büyük qısmını gençler, studentler teşkil ete. Demek, Ukrainanıñ kelecegi işançlı qollardadır.

Yaşlarımızğa şan-şerefler! Yaşasın Ukraina!