QMDİ Aluşta şeerinde eski musulman mezarlığınıñ territoriyasında kenef qurmağa başlağan ‘Krımavtotrans’ Aluşta bölüginiñ yolbaşçılığına qarşı cinaiy iş açılmasını rica ete.
Mezkür vaqia munasebetinen QMDİ Aluşta prokuraturasına, seer şurasına, İçki işler nazirligi Baş idaresiniñ Aluşta şeer bölügine (İİN Bİ Aluşta ŞB) muracaat etti. Soñki zamanlarda bu mesele şeer şurasında eki defa köterilgen edi. Toplaşuvlardan birisinde seer başı Stanislav Kolot da iştirak etti. Mezkür toplaşuvlar neticesinde qurucılıq işlerini toqtatmaq qararı alınğan edi. Amma ‘Krımavtotrans’ şirketi qurucılıqnı devam ete. Al-azırda qurucılıq meydanı bütünley qoralandı.
Qırım müftiligi ‘Krımavtotrans’nıñ Aluştadaki bölügi dinlerara ve milletlerara kerginligini qozğatqan areketler yapa dep saya. Acethaneniñ qurucılığı seer yolbaşçılığınen añlaşılmadı, topraq da zarur vesiqalar olmadan qullanıla.
Qırım müftiligi bundan da ğayrı, Aluşta seer yolbaşçılığına QMDİ-niñ mal-mülküne eski musulman mezarlığı olğan topraq arsasını ‘Dürbe’ qoyulması içün berilmesini rica etti. Hatırlatamız ki, aprelniñ 13-ünde Aluştada eski musulman mezarlığında yüz bergen vandalizm aktına qarşı miting keçirildi. Al-azırda anda Aqmescit-Aluşta-Yalta avtoyolu, avtostantsiya, tükân sıraları, qavehane, barlar bar. Yaqında avtovokzal memuriyeti bu yerde ayaqyol qurmağa qarar aldı. Evelden kenef qurulacaq yerde arheologik araştırmalarınıñ neticesinde insan kemikleri tapılğan edi. Yerli faal sakinlerniñ teşebbüsi ile qazuvlar keçirilgen yerlerde dört servi teregi saçılğan edi. Avtovokzal memuriyeti ise olarnı başqa yerge oturttı.