Qırımtatar Milliy Meclisiniñ Qırım Yuqarı Şurası tarafından “umumqırım referendumı”nıñ ilân etilmesi munasebetinen beyanatı

11.05.20160:19

Rusiye orduları Qırımğa kirsetilmesinen meydanğa ketirilgen ğayet qattı siyasiy krizis şaraitlerinde Qırım Yuqarı Şurası, muhalefet deputatlarınıñ haberi olmadan, acele sürette keçirilgen nevbetten tış toplaşuvında “umuqırım referendumnıñ keçirilmesi aqqında” qarar aldı.

Referendumnı 2014 senesi 16 mart künü keçirmege planlaştırıla.

Bu qararnıñ talili onıñ huquq cehetinden aslı qıymetli olmağanı ve Qırım sakinleriniñ haqları ve menfaatlarını aslı közge almağanını numayış ete. Böyleliknen, qararda başta Qırım Rusiye federatsıyasınıñ terkibine Rusiye Federatsıyasınıñ subyekti olaraq kirsetilmesi aqqında aman aman ilân etilip, artından referendum 16 martta keçirilecegi aqqında haber berile.

Böyle areketlerinen Qırım Yuqarı Şurasınıñ bir çoq deputatları Ukraina qanunlarğa ters çıqıp, çoqmilletli Qırım sakinlerine ürmetsizligini kösterdiler.

Qırımtatar Milliy Meclisi Qırım Yuqarı Şurası tarafından mezkür qararnıñ alınmasını haqsız ve Qırım sakinleriniñ ekseriyetine ters kelgen, bundan da ğayrı, Qırımdaki kerginlikni arttırmaq maqsadınen mahsus yapılğan provokatsıya areketi olaraq tanıy.

Qırımtatar Milliy Meclisi neticeleri evelden bilingen haqsız “referendumğa” çağırtılğan bütün Qırım sakinleriniñ haqları qaba şekilde bozulğanınen bir sırada, ayrıca Qırımnıñ tamır halqı-qırımtatarlarnıñ haqları da bozulğanı qayd etti.

Qırımtatar Milliy Meclisi muhtariyetniñ sakinlerini “refenrendumğa” azırlıq ceryanına boykot köstermege çağıra:

  • Bölük ve qasaba saylav komissiyalarınıñ terkibine kirmemek,
  • Saylavcılar cedvelleriniñ azırlanılmasında iştirak etmemek, saylavcılar cedveline adıñıznıñ kirsetilmesine razılıq bermemek,
  • Saylavcılar cedveline adıñız kirsetilgen alda mıtlaq çıqarılmasını talap etmek.
  • Saylav künü saylav bölüklerine kelmemek ve evde saylamamaq.

Aynı zamanda Milliy Meclis Qırım sakinlerini provokatsıyalarğa qulaq asmamaq, tınçlıq ve barışıqnı saqlamağa çağıra. Evimizde aleket çıqarğan ve qalabalıq yapqanlarğa qarşı eñ küçlü silâ- çoqmilletli Qırımımızda raatlıq ve tınçlıqnı saqlamaqtır. Qırımnıñ barışıq kelecegi-bizim elimizdedir!

Qırımtatar Milliy Meclisniñ reisi Refat Çubarov.

6 mart. 2014 senesi