Sayğılı qadınlar!
QMDİ ve “Kaymakan” KUM – “Qoranta” programması cerçivesinde qırımtatarlarnıñ başqa milletler temsilcilerinen evlenüvleri kibi aile meselelerni kontrol altına almaq qararı qabul etildi.
Qırım müsülmanlarınıñ menfatlarını ifade etken QMDİ İslam esaslarınıñ, nasıl şekilde olsa olsun, bozulmasına yol bermemek maqsadını qoydı.
Soñki on yıl devamında qırımtatarlarnıñ em hristian, em müsülman milletlerniñ vekilleri ile evlenüv adiseleri çoqlaşa.
Assimilâtsiya esnası halqımıznı bütünley qaplap aldı. Qırımtatarlarnıñ slavân ealisi ile evlenüvleri endi iç kimseni şaşırtmay, qararnen alğanda böyle evlenüvlerniñ sayısı 30%’ğa yaqın!
Din ve milliy farqlılığında esaslanğan milletlerara evlenüvler qırımtatar halqı assimilâtsiyasınıñ esas sebeplerinden biridir.
Dinlerara evlenüvler aqqında çoq şey aytılğan edi, amma soñki vaqıt qırımtatarlar tek slavân milletleri tarafından degil, başqa milletler – türkler, araplar, iordanlar ve başqaları tarafından da assimilâtsiya etileler. Bu halqlarnıñ temsilcileri, hususan erkekeler, Qırımda farqlı sebepler ile bulunalar – iş, oquv, missioner faaliyeti. Yarımadanıñ territoriyasında bir qaç vaqıt olıp, yabancı-müsülmanlar, aralarında yahşı insanlarğa er vaqıt rastkelmessiñ, yalan yolunen qadınlarımıznı beraber yaşamalarına celp eteler. Evlenüv manasınen qadınlarımıznen nikâh yapıp da, soñra kerekmese bu qadınlarnı ve peyda olğan balalarnı taşlağanlar da bar. Yabancı erkek tarafından bıraqılğan, öz munasebetlerni ZAGS qurumlarında qayd etmegen qırımtatar qadını ne yapa bile, onıñ balalarnı kim baqacaq, eger yabancı ülkeniñ vatandaşı olğan erkek öz vatanına ketip, qaytmacaq olsa? Ya yalan yolunen balalar yabancı ülkede qalsalar? Qadınlarımız ögünde öyle öyle sualler turğanını can-yürekten istemeymiz! Yaqında QMDİ ve “Kaymakan” KUM tarafından ilân etilgen “Qoranta” qırımtatar ailelerine yardım programmasına birinciden yabancılar tarafından bıraqılğan qırım qadınları seslendiler. Ayttı, aldattı, bıraqtı – QMDİ’ne kelgen itirazlarnıñ qısqa mündericesidir. Halqımıznıñ er şeyge inanğanları aqqında aytmaq mümkün, amma yalancılar qadınlarımıznıñ duyğularında oynaylar, sevgi aqqında aytıp, sadıq aqay olmağa emin eteler!
Bir sıra muracaatlarnı ögrenip, böyle adiselerniñ umumiy resimi körüne. Erkek iş adamı Qırımğa kelip, birinciden aile qurmağa isteyler. Bu oña nege kerek? Yardım ete bilecek yaqınları olsun dep, amma yaşayış köstergeni kibi, aile ayatında yardım degil de, işinde yardım içün! Böyle yabancınıñ qadını er vaqıt işdeş degil, sıq alda hızmetçi ola – terciman, çünki rusça bile – yabancı içün büyük meseledir. Bu yerde ise er şey birlikte – aile ve terciman, em de qırımtatar qadınını aldatmağa daa da yengil, türk tilini añlay, nikâh vaqtında Allah ögünde berilgen sözge inana.
Psihik meselelerge daa uquqiy meseleler de qoşula – aldatılğan qadın ve onıñ balalarına ne alimentler, ne mal-mülk berile. Qırılğan ayat… bütün bular tek Türkiye, Saudi Arabistan, İordaniyanıñ bir de bir vatandaşı öz işini becersin dep. Böyle alâ qalarğa razı olmaqtan evel, qızlarmıznı ola bilecek menfiy aqibetler aqqında tüşünmege çağıramız.
Şübesiz, QMDİ ve “Kaymakan” KUM yalancılarnı cezalamaq içün bütün ğayretlerni işletirler, amma çastsız evlenüv yanında bu pek küçük şeydir.
Onıñ içün yuqarıda aytılğan vaziyetke tüşseñiz, biraz bile şübelengende, sevgili qızlar ve qadınlarımız, lütfen, QMDİ’ne muracaat etiñiz, anda siz em diniy, em uquqiy taraftan tevsiyeler ala bilesiñiz. Eñ yahşısı Müftiyatqa seçken yabancı erkegiñiz ile keliñiz,biz siznen birlikte bu insannıñ aqiqiy niyetlerini ögrenmege tırışırmız, onıñ vesiqalarını teşkerirmiz.
Gizlilikni saqlarmız.
Ürmet ile, QMDİ.
Muracaat etiñiz: Aqmescit ş., Kurçatov soq. 4, tel. (0652) 274353.