Qırımtatar Milliy Meclisniñ ukraina vatandaşlarına, qırım sakinlerine muracaatı!

11.05.20160:19

Sayğılı vatandaşlar!

Qırım ve bütün Ukraina içün ğayet ağır bu künlerde biz sizge muracaat etip, añlaycaq ve destek kösterecegiñizge ümüt etemiz. Eminmiz ki, Qırımnıñ er bir sakini yarımadamıznıñ kelecegini qayğırmaqta ve şimdiki krisizten barışıqnen çıqmaq zarurlığınıñ mesuliyetini duyadır.

Bugünde biz eñ-evelâ şunı talap etemiz:

· Millet ve din mensüpligine baqmadan bütün yarımada sakinleriniñ havfsızlıq kefaletleri;

· İnsan haqları, Qırımnıñ etnik ve din cemiyetlerniñ kollektiv haqlarını temin etmek;

· Ukrainanıñ territorial birliginiñ saqlanılması.

Bu maqsatlarğa yetmek içün biz barışıq siyasiy ve diplomatik imkânlardan faydalanamız:

· Yerli akimiyet organları ve territorial cemiyetlerniñ faal azalarınen birlikte Qırımnıñ er bir mesken yerinde cemiyette tertip — nizamnı temin etmege tırışamız;

· Er bir cemaat- siyasiy teşkilât ve topluluqlarnen işbirlikte bulunamız;

· Nufuzlı halqara teşkilâtlar ve ileri ketken dünya memleketlerine Qırımda qan tökülmemesini, Ukraina territoriya birliginiñ saqlanılmasını temin etmek ricasınen muracaat ettik;

· Ukraina ükümetine mümkün olğanı qadar tez sürette Qırımdaki kerginlikni meydanğa ketirgen bir sıra meselelerni çezilmesine ğayret köstermek ricasınen muracaat ettik.

Bütün Qırım sakinlerini bu ağır vaqıtlarda tınçlıq- amanlıqnı, biri -biriñiznen, qomşu, dostluq munasebetlerni saqlamağa, provokatsıyalarğa tabi olmamağa çağıramız.

Eminmiz ki, çoqmilletli qırım cemiyeti iç meselelerini özü çeze bilir, em de er angi radikal ve ekstremist mizacını taşığan telükelerge qarşılıq kösterip olur.

Ğayretlerimizni birleştirip, Qırım Muhtyar Cumhuriyeti içün menfaat ve haqlarını ecnebiy küçlersiz talap etip olurmız.

Qırımtatar Milliy Meclisi