Esabat ve nezaretten qorqmağa keregi yoq

11.05.20160:19

Server Seytumer, Mamut-Sultan yerli meclisiniñ azası

Bu künde, milliy öz- özüni idare etüv organları milliy bayramlarını ve diger merasimlerini keçirmek içün sermiya tapmağa ögrengen olsa, yerli milliy bücetlerniñ şekillenüvi aqqında serbest söz yürsetmek mümkün. Menimce, bu sualni Qurultay sessiyasında da baqmaq kerek.

Milliy bücetni eñ başta göñülli ödevlerden şekillendirmek mümkün, çünki bizim bücet tolduruv qaidelerimiz yoqtır. Zaten biz yerli öz -özüni idare etüv organları ögünde qırımtatarlar kütleviy yaşağan yerlerde vergi paralarından bir qısmını işletilmesi aqqında meseleleni qoymaq aqqımız bar. Bundan da ğayrı, topraq vergisinden bir qısmını da qullanılması aqqında söz yürsetmek mümkün, ebette bu qanunğa qarşı olmasa. Biz yerli akimiyet ile bücetniñ toldurılması, soñra da onı qullanması boyunca beraber çalışmalımız. Biz esabat ve nezaretten qorqmamaq kerekmiz.

Misal olaraq, Mamut-Sultan yerli meclis territoriyasında 2010 senesine, olsun tek 10000 biñden ibaret olğan bücetni qabul etmek mümkün. Sermiyalarnıñ büyük qısmı, menimce, milliy tasil ve medeniyetniñ desteklenmesine masraf etilmesi kerek. Bu büyük olmasa bile, amma kerçek bir paralardır.

Bundan da ğayrı, bizim daa bir potentsılaımız bar- bayağı çoq iş adamlarımıznıñ olğanıdır. Olarnıñ yardımınen bazı iqtisadiy problemlerni çezmek içün iş adamlarınıñ assotsıatsıyasını meydanğa ketirmek mümkün olur edi. Er bir iş adamı belli bir yerde iqtisadiy faaliyetinden qaysı çeşiti daa zarur olğanını bile. Bunıñ içün hayriye degil de, toplav fondunı teşkil etmek mümkün, onıñ sermiyaları da  yerli küçük biznes ve iş yerleri içün işletmeli. İqtisadiy öz- özüni idare etüvniñ ilk adımlarından soñ daa büyük leyhalar ve halqara fondlarnıñ celp etilmesi aqqında da meseleni ortağa çıqarmaq mümkün olur.

 

Yerli meclisler bir de bir maliye yardımnı beklememeli, çünki o aslı yoq ve er alda da olmaz. Olar öz yerli bücetini şekillendirmege ögrenmeliler. Böyle bücet bir çoq problemlerni çezmege yardım eter.  Amma bu meselede bücetniñ zarurlığını yerli cemaat añlamalı ve bu vazifeni eda etilmesinde yerli faalçiler-meclis azaları ve deputatlar birleşmeliler.  Yazıq ki, Mamut-Sultan köy şurasınıñ deputatları arasında birlik olmağanı qırımtatar cemaatınıñ bir sıra proplemlerini çezmek içün keder ete. Azlıqta olıp, bazı deputatlar bir mevamını tutmağa istemegenini, ya da bilmegenleri içün biz öz quvetlerimizni darqatamız.

Çezilecek problemler şimdilik pek çoq.  Eski-Saray qasabasında soqaqlarda yarıq yoq, mezarlıq soñunace horalanmağan. Bu meseleler çezilmegeniniñ esas sebebi- işniñ yahşı teşkil etilmemesidir. Bir de bir leyhanı amelge keçirmek içün, başta onıñ maqsadını ve amelge keçirüv vastalarını tayin etmek, masraf cedvelini tizmek ve qabul etmek, sermiya menbasını tapmaq ve tek bundan soñ leyhanıñ kerçekleştirilmesine keçmek kerek. Lãkin ekseriyetnen er şey aksine ola, başta bir şeyler qurmağa, soñra ise teşkiliy ve maliye meselelerini çezmege başlaymız.

Bizim musbet misallerimiz de bar. Yerli deputatlar  öz qasabalarında güzel iş alıp bardılar, meselã, Qamış-Qora ve Tahta-cami massivleri yarıqnen tamin etildi. Amma bu misaller qanun degil de, daa çoq istisnadır.