Zafer Karatay- yılnıñ prodüseri

11.05.20160:19

Türkiyedeki TRT devler televizion kanalınıñ prodüseri Zafer Karatay İstanbuldaki Marmara Üniversitetiniñ türk matbuat ve medeniyetiniñ klubları tarafından tesis etilgen jurnalist Kemal Çapraz adına İnformatsıon yarışnıñ mukãfatını qazandı. Karatay ‘Cengiz Dağcı’ filmi içün ‘Benimsel kino saasında yılnıñ eñ güzel prodüseri’ mukãfatına nail oldı.

Tantanalı taqdirlev merasimi 29 dekabrde olıp keçti. Studentler ve matbuat hadimlerini meraqlandırğan bu tedbirni türk matbuacılıq Birleşmesiniñ kãtibi Bayram Akcan açtı.

Zafer Karatay teşkilãtçılarğa öz minnetdarlığını bildirip, Kemal Çapraz ile tanış olğanı aqqında ikãye etip, Çapraz, öz namuslığı, iradesi, vaqıt ve şaraitlerge baqmadan qalemini satmağanınen örnekli jurnalist olğanını qayd etip, böyle kibi yarışnı teşkil etken yaşlar arasından Çapraz kibi jurnalistler yetişip kelecegine ümütni bildirdi.

 

Kemal Çapraz 1964 s. Kastamonu vilãyetiniñ Araç rayonında dünyağa keldi. Mektepni bitirip, İstanbul üniversitetiniñ jurnalistika fakültetine oqumağa kirdi ve onı 1987 senesi bitirdi. Bundan soñra aynı üniversitetiniñ aspiranturasını ‘Qırımtatar matbuatı ve İsmail Gasprinskiy’ mevzusında ilmiy iş yazıp bitirdi.

Kemal Çapraz 1985 senesi jurnalistikanen faal oğraşmağa başlap, türk millet ve devletlerniñ, şu cümleden Qırımnıñ da şekillenmesine bağışlanğan eserlerinen bellidir. Kemal Çapraz ‘Türkiye’, ‘Orta doğu’, ‘Qurultay’ , ‘Türk diplomatik’ kibi türk gazetlerinde çalıştı ve maqaleleri ‘Orkun’, ‘Tarih’, ‘Qardaşlıq’ , ‘Qırım’ kibi qırımtatar dergilerinde derc etildi. Soñ devirde ‘Ufuq’ gazetasınıñ muarriri oldı.

QHA