Türkiyeniñ nufuzlı aliy oquv yurtlarında oquycaqlar

11.05.20160:19

Türkiyeniñ nufuzlı aliy oquv yurtlarında oquycaqlar

2010 senesi 13 sentãbr künü ‘Marakand’ kompleksniñ konferents zalında Türkiye Cumhuriyetiniñ devlet aliy oquv yurtlarında oqumaları içün ‘TCS-2010’ programması boyunca keçken 21 studentniñ qabul etüvniñ tantanalı merasimi olıp keçti.

Er yıl qırımtatar Meclisi, ‘Maarifçi’ assotsıatsıyasınıñ destegi ve Türkiye halq tasil Nazirligi vekilleriniñ şahsiy iştiragı ile Türkiye Cumhuriyetiniñ aliy oquv yurtlarında tasil almağa istegen qırımtatar yaşlar arasında ‘TCS-2010’ devlet imtianı keçirile.

Bu sene imtianlar neticesine binaen Türkiyeniñ altı devlet aliy oquv yurdu qırımtatar tilinde serbest laf etken 21 studentni 12 zenaatqa qabul ettiler. Qayd etilgen üniversitetlerden ‘Selcuk’, ‘Ankara’, ‘Trakiya’, ‘Anadolu’, ‘Erciyez’, ‘Bilkent’ kibi oquv yurtlar mimarcılıq- qurucılıq, muhendis-qurucılıq, edebiyat, ingliz tili ve edebiyatı, jurnalistika, informatika, tıbbiyat, istisal kibi fenler boyunca talebelerni qabul ettiler. Ağımdaki seneniñ oktãbr ayından studentler oqumağa başlaycaqlar.

Tantanalı merasimde qırımtatar meclis reisi Mustafa Cemilev, Mecliste tasil ve medeniyet idaresiniñ reisi, ‘Maarifçi’ assotsıatsıyasınıñ reisi Safure Kacametova ve studentlerniñ ana-babaları da iştirak ettiler.

S.Kacametova aytqanına köre, oquv 5 yıl devam etip, birinci sene studentler terenden türk tilini ögreneler. Oquv yurdunı bitirgen soñ studentler isteseler ve ebette imtiandan keçseler, magistratura ve ileride aspiranturada da tasilini devam ete bilirler.

Yılda üç kere ‘Maarifçi’ assotsıatsıyası Qırım cemaatçılığını Türkiyedeki oquv yurtlarında tasil esnası ile bağlı esabatlar ile tanış ete.

Mustafa Cemilev ve Safure Kacametova aytqanlarına köre, studentler ve olarnıñ ana-babaları talebelerniñ kelecekleri aqqında qasevet etmey bileler, çünki Ukraina Tasil Nazirligi, Türkiye Cumhuriyetini diplomları keçirli olğan devletler arasına kirsetti.

Mustafa Cemilev, talebelerge oğurlı yollar, oquşta sabır ve quvet tilep, Türkiye devlet aliy oquv yurtlarından er bir studentke qabul olğanını tasdiqlağan davetnamelerini teslim etip, yaşlar türk ve ingliz tilde tasil alğanları olarğa kelecekte iş tapmağa yardım etecegini qayd etti. Bundan da ğayrı, Cemilevniñ aytqanına köre, Türkiye halq tasil Nazirliginiñ aliy tasil idaresi 2009-2010 oquv yılına türktilli yaşlar içün Türkiye üniversitetlerinde devlet esasında stipendiyalar ayırdı ve er bir oquv yurdunıñ yataqhanesinde bedava yaşaması ve aşamasını közde tuttı. ‘Qırımdan Türkiyege kelgen talebelerniñ yañı yerlerde alışılmaları, yerleşmeleri ve inkişaf etmelerine aman- aman er bir şeerde bulunğan qırımtatar yardımlaşma ve medeniyet cemiyetleri- dernekler faal iştirak eteler.’-dep qayd etti Mustafa Cemilev.

 

Öz nevbetinde, studentlerniñ ana-babaları adından merhum qırımtatar şairi-Yunus Kandımnıñ ömürarqadaşı Sabriye Kandımova Qırımtatar meclis reisi ve ‘Maarifçi’ assotsıatsıyasınıñ vekillerine qırımtatar yaşlarına Türkiyede tasil almağa destek köstergenleri içün minnetdarlıq bildirdi.

_______________________________________________________________________________________

Yaqınşarq üniversitetinde (Near East University) tasil almaq içün dört qırımtatar talebesi ketti.

Meclis ve Yaqın Doğu üniversiteti arasında tasil saasında işbirlik añlaşma esasında, Kiprniñ ileride ilmiy, tehnik ve tasil munasebetleriniñ qurulması aqqında Qırımdan er yıl bedava oquv içün 3-ten ziyade talebeni qabul etecek.

2010 senesi yarışnıñ neticelerine köre, Yaqınşarq üniversitetine Nikosiya şeerine 4 qırımtatar talebesi ‘İqtisadiyat ve idare’, ‘Halqara munasebetler’ fakultetlerine oqumağa kettiler. Stipendiya ve bedava yaşayışını añlaşmağa binaen Kipr üniversiteti temin ete.

Meclis reisi Mustafa Cemilev qırımtatar studentlerine muvafaqiyetler tiledi. Öz nevbetinde talebeler böyle nufuzlı aliy oquv yurtunda tasil almaq imkãnını bergeni içün teşekkürler bildirip, mezkür oquv yurtunda alğan bilgilerni Vatanına faydalı şekilde işletmege söz berdiler.

Hatırlatamız ki, 2009 senesi qırımtatar Meclis reisi Şimal Kipr Türkiye cumhuriyetinde ziyaret ile bulunğan vaqıtta qırımtatar meclisi ve Yaqınşarq üniversiteti arasında işbirlik aqqında protokol imzalanmasınıñ tantanalı merasimi olıp keçti.

Mezkür vesiqada Yaqınşarq üniversiteti Qırımdan er yıl 3-ten az olmayıp talebelerni qabul etecekleri, esas fenler ingliz tilinde berilecegi de közde tutulğan. Studentler Meclis tarafından teşkil olunğan imtianlar esasında saylanılacaq. İleride bedava oquvğa qabul olunacaq talebelerniñ sayısı artacaq.

Bundan da ğayrı, işbu protokol ile Qırım ve Şimal Kipr Türkiye Cumhuriyeti arasında medeniy bağlarnıñ qaviyleşmesi, medeniyet tedbirler, çeşit sergilerniñ keçirilmesi belgilendi.