Nuriy efendi Mustafa oğlu

11.05.20160:19

Taziye

29 martta ağır hastalıqtan soñ halqımıznıñ arasında belli olğan diniy erbap, 1994-99 seneleri Qırım müsülmanlarınıñ müftisi

acı Nuriy efendi Mustafa oğlu

81 yaşında vefat etti.

Onıñ nesiliniñ başına tüşken fena musibetlerniñ episini, şu cümleden ösmürlik çağında deşetli cinaiy sürgünlikni körgen Nuriy efendi 1960 seneleri Öbekistannıñ Andijan vilâyetinde milliy areketke qoşuldı. Birinciler sırasında qorantasınen Ana-Vatanına qaytmağa tırıştı. Onıñ tam aqlı ve adaletli niyetlerine o devirdeki zulum sovet rejimi kerçekleşmege bermedi. Neticede Mustafayevler qorantası 20 yılğa yaqın Novoalekseyevkada yaşamağa mecbur oldı. O zamanda da Nuriy efendi milliy işlerden çette turmadı.

Qırımda müşkül inqiraz yılları ğayrıdan ömür başlamaq, ebet, pek ağır oldı. Lâkin buña baqmadan, Nuriy efendi, bir sıra diger vatandaşlarımıznen beraber, dinimizni ğayrıdan tiklemesine faal kirişti ve keñiş cemaatımızğa özüni tanıttırdı.

Qırım müftisi saylanılğan soñ, o bu mesül ve şerefli vazifede muvafaqiyetli çalıştı. Camilerimizniñ qaytarılmasına, Allahnıñ yañı evleri qurulmasına, diniy bilgiler teşviqatına, halqımıznıñ arasında ahlâq ve iman esasları pekinmesine öz sezerli issesini qoştı.

 

Nuri efendi hatıramızda em teren dindar, em vatanperver, milletsever insan, em dinimizniñ bilgili teşviqatçısı, em de özüne has özgün edebiy istidat saibi olaraq qalacaq.

Onıñ qorantasına, balalarına, torunlarına, soy-aqrabalarına teren taziye bildiremiz ve baş sağlığı tileymiz.

Allah rahmet eylesin.

Milliy Meclis azaları

Qırım müsülmanlarınıñ Müftiyatı qayğı ile bildire ki, 1995-1999 seneleri Qırım müsülmanlarınıñ müftisi olaraq faaliyet köstergen hacı Nuriy Mustafayev ağır hastalıqtan soñ, 2011 senesi, mart 29 künü vefat etti.

Bu munasebetnen merhumnıñ qorantasına, soy-aqrabaları ve dost-eşlerine teren taziye bildiremiz.

Allah rahmet eylesin!