UNPO Cemilevni Saharov adına mukâfatına taqdim etmege istey

11.05.20160:19

Temsilcilikleri olmağan halq ve milletler teşkilâtı (UNPO), Brüsselde 17 mart künü keçirilgen Avropa parlamentindeki diñlevler ketişatında, Qırımtatar Milliy Meclis reisi Mustafa Cemilevni Saharov adına mukâfatına taqdim etmek niyeti aqqında ilân etti, bu mukâfatnı er yıl Avropa parlamenti bere, haber ete Deutsche Welle. Hatırlatayıq ki, diñlevlerniñ teşebbüsçisi UNPO ve Litva Avropa deputatı Leonidas Donskis oldılar. O, tevsiye etti ki, mukâfat Cemilevge berilse, onı dünyanıñ Nobel mukâfatına taqdim etmek. Leonidas Donskis qayd etkeni kibi, Avropa o qadar öz meselelerinde qapala, küçük halqlar aqqında unuta. “Bu vaqia azlıqlar taqdiri, unutulğan halqlar, Ğarp avropa unutqan halqlar aqqında laf etmege imkânını berir. Er diñlev – bu hatırlatma ve zenaatdaşlar diqqatını bu halqlarğa celp etmek imkânıdır”, — Deutsche Welle’ge dedi Avropa siyasetçisi.

Qayd eteyik ki, diñlevler ketişatında Cemilev Avropa parlamenti öz rezolütsiyası ile qırımtatar halqınıñ sürgünligine, Ukraina halqınıñ açlığını insanlarğa qarşı cinayet olaraq belgilegeni kibi, qıymet kesmek kerekligini qayd etti. Öz nevbetinde, Donskis saya ki, vesiqada qırımtatarlarınıñ tarihiy ve medeniy özgünligine, tilleri saqlanmasına aqları belgilenmek kerek. Ondan da ğayrı, Avropa deputatı Ukraina devleti bu meselege añlayış ile yanaşacağına ümüt ete. “Qırımtatarlar nasıldır fantom, uydurma degil de, büyük facianı başından keçirgen tarihiy halq olğanını er vaqıt hatırlamaq kerek”, — qayd etti Litva Avropa deputatı.

 

Malümat. Andrey Saharov adına “Fikir serbestligi içün” mukâfat 1988 senesi Avropa Parlamenti tarafından tesis etildi. Mukâfat er yıl dört saada berile: insan aqları ve onıñ esas serbestlikleriniñ qorçalavı, demokratiya ve qanun üstünliginiñ pekitilmesi, halqara qanuncılığına ürmet, azlıqlar aqlarınıñ qorçalavı.

QHA