Ukraina Prezidentiniñ gumanitar ve içtimaiy-siyasiy sualler boyunca Mesleatçısı Anna German “Qırım” qırımtatar gazetası ve ukrain "Кримська світлиця" gazetasınıñ meselelerini çezmege vade etti.
German bu aqqında 3 avgust künü “Naş produkt” haber agentliginde online-konferentsiya vaqtında ayttı.
“Men ister edim ki, Qırımda em ukrain tilinde, em qırımtatarlarnıñ tilinde gazeta olsun. Yazıq ki, şimdi bu meseleler çezilmediler. Men Vasiliy Cartığa em ukrain, em qırımtatar matbuatına qol tutmaq ricasınen muracaat etecem. Biz içün bu pek müimdir, daa bir kere maña onı hatırlatqanıñız içün, sağoluñız”, — dedi Anna German.
Qırımtatarlarnıñ gazetası aqqında sual “Svoboda” (“Azatlıq”) radiosınıñ muhbiri Vladimir Pritula tarafından Facebook içtimaiy ağında bu konferntsiyağ bağışlanğan saifede berildi. Amma eki rus tilinde olmağan gazetanıñ qapatılması – Cartığa degil de, Ukraina medeniyet naziri Mihail Kulinâkke berilelecek sual, degenlerine German ayttı: “Medeniyet naziri şimdi Qırımda, biz onı taparmız ve sübetleşirmiz”.
“Qırım” gazetasınıñ baş muarriri Bekir Mamutov bu vaizyetni öyle izaatladı: “İlk evelâ, zenaatdaşımız Vladimir Pritulağa israrlığı içün teşekkür bildirmege ister edim. Ne birinci, ne ekinci sualine qulaq asılmadı, tek üçünci kereden yüksek vazifeli memurnıñ diqqatını etnik matbuatqa celp etip oldı. Ebet, onıñ musbet fikrinen memnün olmaq mümkün. Amma German hanımnıñ pozitsiyası ne vaqıt “Qırım” gazetasınıñ taqdirine tesir etecegini körermiz. Biz başından ümüt ete edik ki, bu sual nasıl olsa da çezilir. Bu mesele Prezident Mesleatçısınıñ diqqatını celp etken soñ, ümütten kesilmeyik”.
Hatırlatayıq ki, 100’den ziyade ukrain ve Qırım ziyalıları Ukraina Prezidenti Viktor Yanukoviçke “Qırım” qırımtatar gazetasına destek köstererek açıq mektüp yolladılar. 2011 senesi “Qırım” gazetası devlet büdjetinden para ayırılmağanı içün, gazetanıñ çıqarılması toqtatıldı. Amma yaqında bir sıra iş adamları ve neşriyat yardımı ile gazeta kene de çıqmağa başladı.
Qırımğa Rusiye informatsion basqı aqqında sualge dair Anna German ayttı ki, Qırımda iç bir vaqıt, şimdi kibi, öyle stabil vaziyet olmağan edi, ve milletlerara davalar yarımadada başqa yoq. “Qırımda tınçlıq Vasiliy Cartınıñ qazançıdır. Prezident pek doğru yaptı. Ve Vasiliy Cartı Qırımğa kelgeninen 20 yıldan berli sozulğan meselelerimizden qutuldıq”, — qayd etti Anna German.
Zarema Server