Ukraina prezidenti Viktor Yanukoviçniñ Mustafa Cemilev ile körüşüvi

11.05.20160:19

 

Ukraina prezidenti Viktor Yanukoviçniñ

Ukraina Prezidenti yanındaki Qırımtatar halqı keñeşiniñ reisi

Mustafa Cemilev ile körüşüvi

 

2010 senesi mayıs 13 künü Kiyevde qırımtatar halqı vekilleriniñ Keñeşiniñ Ukraina Prezidenti yanındaki reisi, Qırımtatar Milily Meclisniñ reisi, Ukraina halq deputatı Mustafa Cemilevniñ Ukraina Prezidenti Viktor Yanukoviçnen körüşüvi olıp keçti.

Körüşüvde Milliy Meclis reisiniñ birinci muavini Refat Çubarov, QMC Nazirler Şurasınıñ reisi Vasiliy Cartı ve Ukraina Prezidenti Memuriyetiniñ başı Sergey Lövoçkin de iştirak ettiler. Körüşüv başında Viktor Yanukoviç bu körüşüvge azırlanuv ketişatında Ukraina Prezidenti seviyesinde çezile bilecek meseleler cedvelinen tanışmaq imkânına malik olğanını qayd eterek, bu meselelerni al etmek içün birlikte çalışuvnıñ emiyeti aqqında ayttı.

Ukraina Prezidenti Viktor Yanukoviç öz sübetdeşlerine muracaat etip, o, muzakere neticesinde alınğan qararlarnı er vaqıt eda etmege tırışqanını qayd etti. Bu işte, dedi o, adamlarnıñ menfaatlarını közde tutqan esas meselelerni ayırıp, olarnı qarardan ziyade siyasiyleştirmemek müimdir.

Qırımtatar Milliy Meclis reisi Mustafa Cemilev Ukraina Prezidentiniñ teklifini yerine ketirerek, Prezidentniñ bivasta destegini talap etken eñ müim meselelerni añıp keçti ve olarnı qısqadan harakterizledi. Bular aşağıdaki meselelerdir:

 

— Ukraina Yuqarı Radasında cedvelge alınıp, qırımtatar halqınıñ aq-uquqlarını tiklevge doğrultılğan qanunlar qabul etilmeli;

—  Ukraina Nazirler Şurası vatanğa qaytayatqan qırımtatarlarnı yerrleştirüvniñ 2011-2015 senelerine qararlaştırılğan devlet programmasını tasdiqlamalı;

— Merkeziy akimiyet ve cumhuriyet (Qırım Muhtar Cumhuriyetinde) akimiyet organları qırımtatar halqınıñ vekâletli organı sayılğan Qırımtatar Milliy Meclisinen daimiy ve sistemli munasebetler qurmalılar, bu ise mevcüt meselelerni, şu cümleden Vatanına qaytıp kelgen qırımtatarlarğa topraq ayıruv meselelerini de bayağı semerelice çezmek imkânını berir;

— Qırımtatarlarnıñ devlet akimiyeti ve idare organlarındaki nufuzına ait meselelerni çezmeli.

Bundan ğayrı Mustafa Cemilev Ukraina Prezidentiniñ diqqatını Bağçasaray muzey-zapovednigine milliy status berilmesiniñ, Bağçasarayda yan-yanaşa turğan diniy turğan diniy abideler ve aziz yerlerniñ sıñırları aqqındaki meseleniñ adaletli sürette çezilmesiniñ müimligine, em de Bağçasaraydaki muzey-zapovedniginiñ erkânına keçirerek, aynı vaqıtta arheologik ve tamirlev işleri içün para ayırmaq zarurlığına celp etti.

Ukraina Prezidenti Viktor Yanukoviç muzakere olunayatqan meselelerniñ bazı bir soyları boyunca artıq ait avaleler bergenini ve Prezident Fermanınıñ leyhası azırlanğanını ve o, şu Fermannı körüşüv yekünlengen soñ imzalaycağını qayd etti.

“Diger bütün meselelerni, keliñiz, men Qırımğa barğanda tafsilâtlıca baqıp çıqayıq. Qırımtatar halqı vekilleriniñ Ukraina Prezidenti yanındaki Keñeşini toplarmız, maallelerde adamlarnen körüşirmiz ve men eminim, er bir meseleniñ munasip çezimini taparmız, — dedi Viktor Yanukoviç. – şimdilik ise Prezident Memuriyetiniñ Başı em de Qırım Nazirler Şurasınıñ reisinen birlikte iş körip, özara añlaşuvğa keliñiz, devlet yolbaşçısı seviyesinde çezile bilecek meselelerni azırlañız”.

Körüşüv bir saat qadar devam etti.

 

Meclisniñ matbuat hızmeti