Ükümeti başında cinaiy kommunistik fırqa turğan devletke ilân etemiz: Qırımda Qıtay yatırımlarına yer yoqtır!

11.05.20160:19

Viktor Yanukoviç yolbaşçılığında Ukrainanıñ akimiyeti Vilnüste Şarqiy ortaqlıq sammitinde (28-29 noyabr) Avropa Birleşmesi ile assotsiatsiya aqqında Añlaşmanı imzalamaqnı red etkeni kibi vaqialardan soñ, prezidentniñ şahsen özü Ukrain devletiniñ tışqı siyasiy vektorını büs-bütün deñiştire bilecek ve er birimizniñ taqdirinde eyi iz qaldırmaycaq bir sıra areketler boyunca qarar aldı.

2013 senesi dekabrnıñ 4-den 5-ne qadar Ukraina Prezidenti resmiy ziyaret ile Qıtay Halq Cümhuriyetinde bulundı

. Anda yüksek seviyede bir sıra körüşüvler ötkerip, Ukraina içün bir qaç yatırım añlaşmalarını imzaladı. V. Yanukoviçnıñ Pekinge ziyaretiniñ neticelerine köre on vesiqa imzalandı. Olardan ekisi – Dostluq em de işbirlik aqqında añlaşma ve prezident seviyesinde ‘Beraberlik deklaratsiyası’dır, qalğan sekizi – müessiselerara vesiqalar.

Bu planlarda ayrıca diqqat Qırım yarımadasına ayırılğan edi. Ukraina akimiyeti ve Beijing Interoceanic Canal Investment Management Co. Ltd. Qıtay kompaniyası Qırımda teren suvlı limannıñ qurucılığı leyhasını yerine ketirilmesinde, ve aynı vaqıtta, Aqyarda balıq limanınıñ rekonstruktsiyası em de yüksek tehnologiyalar sanayınıñ iqtisadiy inkişaf saasınıñ yaratılmasında işbirlik aqqında memorandum imzaladılar. Ekinci devir ava limanı, verf, yermaynıñ işleme zavodı, SPG-niñ istisal bazasınıñ qurucılığına ve deñizde rekreatsion plâjlarnıñ meydanğa ketirilmesine masraf etilecek yatırımlarnı közde tuta.

2013 senesi sentâbr ayında malüm oldı ki, Qıtay köy hocalığı aşlıq ekinlerini asramaq içün çetel zeminlerinden faydalanuv boyunca siyasetiniñ çerçivesinde, Ukrainada 3 million gektarğa yaqın zeminlerni 50 yıllıq mudetke kiralamaq niyetinde eken. Leyha Dnepropetrovsk vilâyetinden başlap, Herson ve Qırımda devam etecek. Qırımda bu leyha 200 biñ gektarğa yaqın zeminlerni qavrap alacaq. Menbalardan belli olğanı kibi, Qırımda bu zeminlerde qıtaylı hızmetçilerniñ sayısı, aile azalarını köz ögüne almadan, en azından 200 biñ insannı teşkil etecek.

2013 senesi dekabrnıñ 17-de V. Yanukoviç Rusiye Federatsiyasını ziyaret etti. Ukraina ve Rusiye Prezidentleriniñ körüşüvi neticesinde rus gazınıñ fiyatı 1000 kubometr içün 400 dollardan 268,5 dollarğa qadar indirilmesi, ukrain avrobondlarınıñ satın alınması, Ukraina iqtisadiyatına kredit berilmesi ve ticarette qarşılıqlı ukrain-rus manialarınıñ yoq etilmesi aqqında bir sıra vesiqalar imzalandı. Rusiye Federatsiyası Ukraina akimiyetiniñ qıymetli kâğıtlarında 15 milliard dollarnı yerleştirmek mesuliyetligini boynuna aldı.

2013 senesi dekabr ayında Ukraina devlet başınıñ Qıtay ve Rusiye Federatsiyasına bu eki ziyareti neticesinde, devletniñ, Anayasa ve Ukraina qanuniyeti ile kefil olunğan, Avropağa integratsiya siyaseti büs-bütün devalvatsiyağa oğratıldı em de aman-aman qatalaqlana yazdı. Ukraina rehberliginiñ tışqı siyasiy faaliyetiniñ, Qıtay ve Rusiyeniñ miqyasıy yatırım siyaseti altında saqlanğan, yañı yonelişi memleket ve ukrain halqınıñ inkişafı içün tam belli olmağan, havflı istiqballerni yarattı.

Qıtay ve Rusiyeniñ Ukraina iqtisadiyatına ‘yatırım siyaseti’ geosiyasiy maqsatlarnı közde tuta. Bu maqsatlar sabıq Sovetler Sotsialistik Cümhuriyetler Birleşmesiniñ kommunistik qurumınıñ darqalmasından soñ şekillenip başlanğan, geosiyasiy nizamda deñişmelerge, ögünden büs-bütün belli olmağan, bir siltem bere bilir. Bu leyhada Qırım yarımadasına Qara deñiz bölgesiniñ muim strategik qısmı olaraq merkezleştirlgen bir diqqat ayırılğanı ayrıca telâşlandıra.

Teren inamıma köre, bu leyhanıñ strategik maqsadı bu sanki qıtay yatırımları vastası ile Qırımda Rusiye menfaatlarınıñ strategik maqsatlarınıñ yerine ketirüv imkânlarını küvetlendirmektir. Bu yerde Qıtay, Kremlde oturğan esas müelliflerniñ yalıñız ittifaqdaşıdır. Bu leyha yerine ketirilse ve başlanğıç devirde, Qıtaynıñ Şarqiy Ukraina ve Qırımda mevcutlığınıñ faktorı tasdıqlansa, Ukraina darqalması ğayesiniñ yalıñız vaqıtqa aceti olur.

Neticede Ukrainanıñ Şarqiy qısmı ve, hususan, Qırım Rusiye ya da, belki de, rus-qıtay geosiyasiy menfaatlar saasında omürlik qalırlar. Sovetler Birleşmesi darqalğan soñ fezasında işte böyle tamam ile beklenilgen ve aqiqaten yerine ketirile bilecek siyasiy tandem, Rusiye-Qıtay bağında esas siyasiy konstruktsiya olaraq, bu qocaman konglomerat bölgesiniñ devletlerini birleştirir. Avropa degerleri ve demokratiyanıñ tantanası aqqında ise asıl da unutmaq mümkündir. Çünki bu yerde boyle degerler tanış olmamaqtan ğayrı, olarğa duşmanca baqalar. Ukraina da işte şu mega-geosiyasiy leyhanıñ bir qısmı olmaq mümkün.

Ukraina akimiyetiniñ işte bu qararına, Ukrainanıñ mustaqilligi ve territorial bütünligine, onıñ Avropa Birleşmesine kiriş planlarına aqiqiy telüke yarata bilecek, tamam ile havflı ve siyasiy ceetten mümkün olmağan bir qararğa kibi baqmaq kerek.

Boyle alda Qırımda ‘qıtay yatırımlar’ leyhası avtomatik tarzda, qırımtatar halqınıñ Qırım yarımadasınıñ tamır etnosı olaraq yaşamasına büyük bir havf şekillendire.

Strategik ceetten leyhanıñ maqsadı Ukrainanı Avropa Birleşmesinden ayırmaq, darqalması alında ise Şarqiy Ukraina ve Qırımnıñ yañı doğulğan tandem – Qıtay Cümhuriyetiniñ kommunistik qurumı em de neosovetler Rusiyeniñ ‘sarsılmaz menfaatları’ saasına kirsetilmesini kefil etmektir. Halqlarnıñ umumavropa ailesi ve onı teşkil etken degerlerniñ ayırılmaz bir qısmı olğan Ukraina içün bu yañlış ve ğayet telâşlı bir qarardır.

Artıq künümizde Ukrainanıñ demokratik küçleri, Maydannıñ Halq Şurası şahsında yañı siyasiy küç, qırımtatar halqınıñ Meclisi bütünley Ukrainada, ve hususan Qırımda Qıtay yatırımları mümkün olmağanı aqqında resmiy şekilde bildirmek kerekler, çünki bu resurslarnıñ celp etilmesi üküm kommunistik qurumınıñ cinaiy mefküresine ait devletniñ mevcutlığını kuvetlendirüv usulıdır.

Ali HAMZİN