Yaş qırımtatar yırcısı, çeşit muzıka yarışlarnıñ laureatı ve gran-pri saibi Dilâra Mahmudova “Astana – türk dünyasınıñ medeniy paytahtı 2012” kontsertinde iştirak etti. “Avdet”ke yırcınıñ özü haber etkeni kibi, Astana şeeriniñ (Qazahistan) Barışıq Sarayında fevral 24-25 künleri olıp keçken kontsert dünyanıñ 11 memleketinden 250 iştirakçini topladı.
Tantanalı tedbirni Qazahistannıñ medeniyet ve informatsiya naziri D. Mınbay ve TÜRKSOY’nıñ Muvaqqat koordinatorı, Türkiye Cumhuriyetiniñ medeniyet ve turizm naziri E.Günay açtılar.
Böyleliknen, sanada Türkiye, Azerbaycan, Başqırtistan, Tataristan, Hakasiya, Qırğızistan, Qazahistandan yırcılarnıñ yırları yañğıradı. Kontsertte belli qazah yırcısı Roza Rımbayeva kontsert iştirakçilernen beraber (olarnıñ arasında D. Mahmudova da bar edi) yır icra etti.
Yaş yırcınıñ sözlerine köre, kontsertke Qazahistannıñ qırımtatar diasporasınıñ temsilcileri de kelgen ediler.
“Yıl açılışına tesadüfen tüştim: kontsertniñ baş rejissörı menim çıqışlarım internette kördi, mennen bağlanıp, iştirak etmege davet etti,” – dedi yırcı.
Malümat içün
2010 senesi İstanbulda olıp keçken Türkiy devletler yolbaşçılarınıñ X sammitinde TÜRKSOY’nıñ teklifine köre, Halqara teşkilâtnıñ azaları olğan memleketlerden biriniñ şeerini türkiy dünyanıñ medeniy paytahtı olaraq ilân etildi. Birinci olğan Qazahistannıñ paytahtı Astanada 2012 senesi devamında türkiy dünyanıñ medeniyet, ilim ebapları körüşecekler. Kelecek 2013 senesi musafirlerni Eskişehir (Türkiye) şeeri qabul etecek.
Elmara MUSTAFA