Qırımtatar Milliy Meclisniñ resmiy sayt / Qırım ve qırımtatarlar aqqında

11.05.20160:19

“Marakand”da Meclisniñ resmiy saytını taqdim ettiler

2011 senesi 28 aprel künü “Marakand” kompleksiniñ konferents-zalında Qırımtatar Milliy Meclisniñ resmiy saytınıñ taqdimnamesi keçirildi. qtmm.org

Tedbirde Qırımtatar Milliy Meclisniñ Reisi, Ukraina halq deputatı Mustafa Cemilev, onıñ birinci muavini Refat Çubarov, Meclisniñ idare ve hızmetleriniñ yolbaşçıları, QMC’de Ukraina Prezidentiniñ Daimiy Temsilcisiniñ muavini İbraim Mamutov, QMC Cumhuriyet informatsiya komitetiniñ Reis muavini Şevket Memetov ve QMC Cumhuriyet informatsiya komiteti Reisiniñ muavini Aleksandr Çirkov, QMC YŞ Kâtipliginiñ informatsion-analitik idaresiniñ reberi Olga Sulnikova, QMC’de “Halqara cumhuriyet institutı” (IRI) programmasınıñ koordinatorı Konstantin Ploskiy, Qırımda BMT PRİK PR’nıñ yerli iqtidasiy inkişaf boyunca mutehassıs Emil Halitov, KİV temsilcileri, Qurultay delegatları ve cemaatçılıq iştirak ettiler.

Taqdimname ketişatında qayd etildi ki, Meclisniñ resmiy saytnıñ faaliyeti Meclisniñ er künlük işini, Qurultaynıñ sessiyalarını, qırımtatarlarnıñ yerleşüvi, aq-uquqları, tüklenüvi, Ukrainanıñ içtimaiy-siyasiy ve iqtisadiy ayatına integratsiyasınen bağlı müim vaqialarnı aks etmek içün hızmet etecek. Saytnıñ strukturasına “Qurultay”, “Meclis”, “Diaspora”, “Multimedia” bölükleri kire, em de farqlı sualler boyunca Meclisniñ idareleri ve hızmetlerine muracaat etmek imkânı olacaq. Ondan ğayrı, saytnıñ yapılmasında ayrıca “Unutma”, “Halqara forum”, “İçtimaiy teşebbüsler”, “Qırımtatar milliy areketi” kibi bloklarğa diqqat ayırılacaq.

Qırımtatarca (latin grafikasında), ukraince, inglizce ve rusça qullanılğanı içün, saytnıñ qullanıcıları arasında ukrain ve dünya KİV, Ukraina devlet akimiyeti qurumlarınıñ temsilcileri, halqara teşkilâtlar, siyasiy ve içtimaiy teşkilâtlar, siyasetçiler, ekspertler, studentlerniñ olması beklenile. Meclisniñ yolbaşçılığınıñ fikrine köre, latin grafikasında qırımtatar tili türk dünyası içün da saytnıñ “qapularını” açar. Saytnıñ faal qullanıcılar sırasına başqa ülkelerde yaşağan qırımtatarlar da kirecekler.

Qırımtatar Milliy Meclisniñ adından Meclisniñ Matbuat hızmeti saytnıñ açılmasında büyük yardım köstergen Ukrainada “Halqara cumhuriyet institutı”na, (AQŞ) regional yolbaşçısı Gans Hristofor Holzenniñ şahsında, ve “Qırım inkişafı vaqfı” Hayriye teşkilâtına, Prezidenti Rustem Umerovnıñ şahsında, teşekkür sözlerini bildirdi.

___________________________________________________________________________

crimeantatars.org

Aqmescitte CrimeanTatars.org saytınıñ taqdimnamesi keçirildi. Saytta ATR telekompaniyası ve “Meydan” radiosı tarafından azırlanğan Qırım ve qırımtatarlar aqqında malümatlar yerleşecek, haber ete QHA.

“Sayt üç til versiyada çalışacaq – rus, qırımtatar (kirill ve latin grafikasında) tillerinde. İlerde ukrain tili de işletilecek”, — qayd ete leyhanıñ koordinatorı, “Meydan” radiosınıñ muarriri Naciye Femi.

Onıñ sözlerine köre, saytnı eñ çoq Ukraina, Rusiye, Türkiye, Romaniya, AQŞ, Kanadadan ziyaret eteler. Bunınen beraber kün-künden auditoriya daa da keñiş ola.

Ondan da ğayrı, saytnıñ saifeleri ve gruppaları belli içtimaiy ağlar Vkontakte, Facebook, Twitter’de de barlar.

“Resursnıñ ilerideki inkişafı keyfiyetli kontent ile toldurmanen ve sayt qullanıcıları içün imkânlarnıñ keñişletmesinen bağlıdır”, — qoşa leyhanıñ tehnik hadimi, ATR’nıñ sistem memurı Girey Seydametov.

Bu resurs “İnternewsNetwork” Halqara içtimaiy teşkilâtnıñ qol tutuvı ile “U-media”nıñ “Qırımda bağımsız KİV’nı pekiterek” programmasınıñ çerçivesinde işletildi.

Leyhanıñ koordinatorı qayd etti ki, ileride, belki, ATR telekanalnıñ on-line yayınları kirsetilecek.

Şunı qayd etmek kerek ki, endiden Qırım ve qırımtatarlarnen meraqlanğan er kim İnternet yardımınen malümat tapmaq, ATR ve “Meydn”nıñ yayınlarını baqmaq mümkün. Ondan ğayrı, bu saytnen ATR ve “Meydan” yayınlanmağan yerlerde yaşağan insanlar da qullanıla bileler.

Qayd eteyik ki, CrimeanTatars.org saytı 2011 senesiniñ başından çalışmaqta.