Qarasuvbazar Ayova (AQŞ) ştatınıñ şeeri ile qardaş ola bile

11.05.20160:19

“Qırım” siyasiy talil ve prognozı merkeziniñ reberi Eskender Bariyev Ayova ştatınıñ yolbaşçılığı ile dostane munasebetler qurulması boyunca añlaşmalar alıp barmaqta. Belki, yaqın vaqıtta Qırımnıñ ve Amerika ştatınıñ şeerlerinden birleri qardaş-şeerler olurlar.

Soñki yerli saylavlarnıñ neticelerni köz ögüne alsaq, Qarasuvbazarnıñ qardaş-şeer olmaq imkânı bar. Şeer başı vazifesine Albert Kangiyev saylanıldı. Eskender bey qayd etti ki, bu leyha kerçekleşmesine bütün ğayretlerini sarf etecek. “Birinciden, bu, medeniyetler deñeşüvi olacaq, em de içtimaiy sualleriniñ muzakeresi. Qarasuvbazarda çoq qırımtatar yaşay ve bu pek müim faktordır. Ekinciden, 11-16 yaşındaki qırımtatar ve Ayova ştatındaki balaları arasında mektüpleşme qurulması aqqında añlaştım. Öz tarafımdan balalarımıznıñ cedvelini adresleri ile azırlarım”, — tarif ete Eskender Bariyev. Bu mektipleşme, onıñ fikirine köre, qırımtatar balaları içün ingliz tilini ögrenmek içün yahşı bir sebep olur.

Belli olğanı kibi, Ayova ştatında Podolsk rus şeerinen qardaşlıq munasebetleri qurulğan.

 

11-25 oktâbr künleri Eskender Bariyev 50 insandan ibaret olğan ukrain delegatsiyasınıñ terkibinde “Open World” programması boyunca AQŞ’da bulundı. Programmada Ukraina şeerleriniñ başları, olarnıñ muavinleri, iqtisadiyat idarelerniñ, vilâyet ve rayon memuriyetleriniñ müdirleri. Programma çerçivesinde olar Vaşington şeerini ziyaret ettiler, anda AQŞ ilim ve siyaset temsilcilerinen körüştiler, hususan, Ukrainada AQŞ’nıñ endi eks-elçi Uilyam Teylor ile. Şimdi mister Teylor Dünya İnstitutınıñ yolbaşçısıdır, dünyadaki siyasiy esnaslarnı ögrene. Körüşüv devamında Eskender Bariyev çıqışta bulundı, Ukrainanıñ vaziyeti aqqında, soñki adiseler munasebeti ile Ukrainada qırımtatarlarnıñ vaziyetleri aqqında tarif etti.

Programma çerçivesinde episi iştirakçilerni beşer etip bir qaç delegatsiyalarğa böldiler. Hususan, Eskender Bariyevniñ delegatsiyası Ayova ştatınıñ Kaunsil-Blafs şeerine bardı. Delegatsiya şeer başı ile, Pottavatami rayon şurasınıñ deputatları, Ayova ştatınıñ senatorları, federal seviyedeki AQŞ’nıñ kongressmenleri ve senatorları ile körüşti.

Yerli deputatlar sayısı Eskender beyni ayrette qaldırdı – umumen beşer insan: 5 – şeer şurasında, 5 – rayon şurasında.

Ayova ştatında (AQŞ) mektüp yazıp, arqadaş tapmağa, ve bu leyha boyunca sual bermege istegenler Eskender Bariyevge 050-360-78-53 telefonı boyunca muracaat ete bileler.