Qırımtatar tilinde virtual motivatsiya

11.05.20160:19

İnternet vastasınen tek çalışmaq, tanışmaq, eglenmek, oquvnı qolaylaştırmaq degil de, bir-de-bir şeyni teşviq etmek, bir şeyge qarşı narazılığını bildirmek, işini motivleştirmek, ya da demotivleştirmek de mümkün (resim ve onı izaatlağan yazı). Demotivator ve motivatorlarnıñ qırımtatar tilinde çıqmasını sabırsızlıqnen bekley edik. Beklegenimiz boşuna degil edi. İçtimaiy ağlarnıñ iştirakçileri QMPU-niñ 2 kurs studentleri Emine Osmanova ve medeniyet universitetiniñ mezunı Lâle Çobanovağa teşekkürlerini bildire bileler.

Demotivator ve motivatorlarnıñ manası nedir? Bu izaatlı resimler bir-de-bir şeyniñ, yani fikir, sağlam ayat tarzınıñ teşviqatınıñ vastası, özüne işanmaq, areketlerine siltem bermek bir yoludır. Olar añımıznı kenişletmege, meselerniñ yañı çezüv yollarını tapmağa yardım ete, müsbet duyğular bagışlay.

Motivator ve demotivatorlar arasında şimdilik tek bir qaç danesiniñ müellifi bar, qalğanları diger tillerden tercime etilgen . Amma qızlarnıñ aytqanına köre, olar öz ğaye ve fikirlerini akis etken meraqlı motivatorlarnı işlemege tırışacaqlar.

Yaznıñ başında yaşlar arasında populâr olğan Vkontakte içtimaiy ağında qırımtatar tilinde çoqtan beklenilgen diger tillerden tercime etilgen ve qırımtatar yazıcılarnıñ icadından alınğan ibareler peyda oldı. İçtimaiy ağda Alınmalar saifesi peyda oldı, bu saifede er istegenler er kün meraqlı ve aktual ibareler, fikirler, manalı cümlelerni oquy bile.

 

Alınmalar latince derc etilgeni içün, transliteratsiya neticesinde bayağı hatalar yer alğan edi. Qızlarğa içtimaiy ağında ğayet faal iştirak etken ve qırımtatar tilini yahşı bilgen Aleksandr Gorâinov yardım etti.

Alınmalardan ğayrı, vkontaktede qırımtatar tilinde daa bir qaç saife bar — Sevgi bir olsa da, eki yürekte yaşay, Külkünçli statuslar.

‘Bizler içün eñ büyük sevinç- içtimaiy ağlar iştirakçiniñ saifesi qırımtatar sözlerinen tolu olğanını körmektir’ — dep ikâye ete qızlar.

vk.com/demotivatorlar