İsmail-bey Gasprinskiy
(1851-1914)
Ey, sen, qara gecelerni
yarıp kelgen ulu zat, —
Türkiy halqlar dünyasınıñ
ümüt bergen küneşi!
Bu alemde yaşamaqçün
qalmağanda bir fursat,
Berdiñ iman, berdiñ
işanç, berdiñ aqıl keñeşi.
18 martta Qırımda qırımtatar maarifçisi, yaıcı, oca, terciman ve cemaat erbabı İsmail Gasprinskiyniñ 160 yıllığına bağışlanğan tedbirler başlandılar. Tedbirniñ teşkilâtçıları – Aqmescitniñ şeer şurası ve “Maarifçi” qırımtatar tasil hadimleri assotsiatsiyası.
Sabadan ulu maarifçiniñ abidesine çiçekler qoyuldı. Bu yerde cemaatçılıq temsilcileri, Milliy Meclis vekilleri, deputatlar, akimiyet vekilleri, medeniyet erbapları, universitet ocaları ve studentler de bulundılar. Ulu maarifçini hatıra sözler ile Qırımtatar Milliy Meclis Reisiniñ birinci muavini Refat Çubarov, QMC Nazirler Şurasınıñ reis muavini Aziz Abdullayev, Qırım MC Milletlerara munasebetler ve sürgün etilgen vatandaşlarnıñ meseleleri boyunca cumhuriyet komitetiniñ reisi Edem Dudakov, Qırım Yuqarı Şurasınıñ deputatı Safure Kacametova, “Bütünukraina informatsion-medeniy merkez”niñ reisi Vladislav Yermakov, QMPU qırımtatar ve türk edebiyatı kafedrasınıñ müdiri İsmail Kerimov ve başqaları añdılar.
Refat Çubarov Qırımtatar Milliy Meclis adından öz selâmlav sözünde tedbirde bulunğanlarğa ve teşkilâtçılarğa minnetdarlıq bildirdi. “Ecdatlarımız nenen oğraşqanlarını bilmek kerekmiz, olarnıñ yollarından keçmek içün. Şimdi ne qadar ağır olsa da, ne qadar çoq meselelerimiz olsa da, İsmail Gasprinskiy kibi ulu insanlarnıñ yapqan işlerini qullanıp, ögge ketmek, bilgilerimizni mukemmelleştirmek kerekmiz”, — dedi Çubarov.
Soñra İ.Gasprinskiy adına Qırımtatar kitaphanesinde “İ.Gasprinskiyniñ mirası” adlı kitap-vesiqalı sergisi açıldı.
Elmara MUSTAFA