QMPÜ studentler şeerçiginiñ sıñırlarını kenişletecek.

11.05.20160:19

İstanbul tehnik üniversitetniñ mimarcılıq fakultetiniñ ocaları Nurtin Paker ve Hüsein Kahvecoğlu ‘Qırım-Aqmescit: üniversitet şeerçiginiñ dizayında yañı sıñırlar’ serlevası altında mimarcılıq leyhasını işlediler. Leyha taqdimi İstanbul tehnik üniversitetiniñ territoriyasında yerleşken Taşkışla şeerçikte keçecek.

Belli olğanı kibi İstanbul tehnik üniversiteti ve Qırım mühendislik pedagogika üniversiteti arasında işbirlik çerçivesinde Taşkışla şeerçiginde ‘Türk-slavãn yaşlar Merkezi’ programmasınıñ leyhalarına bağışlanğan sergi açılacaq. Sergide Aqmescitte studentler yataqhaneleri, sport merkezi, kontsert zalı ve oquv muessiselerniñ leyhaları taqdim etilecek.

Hatırlatamız ki, ağımdaki sene 10 mart künü Aqmescitte QMPÜ ve İstanbul tehnik üniversiteti arasında tantanalı şekilde işbirlik añlaşması imzalandı.

 

Biraz soñra QMPÜ-niñ rektorı Fevzi Yakubov bildirgenine köre, türk üniversiteti yataqhane qurulmasında yardım köstermege azır.

‘Bizim Universitetimiz Ukrainanıñ 200 eñ güzel oquv yurtlarından biri sayılsa bile, alã daa öz şahsiy yataqhane, aşhane ve sportzalına malik degil. İşbirlik añlaşması çerçivesinde İstanbul üniversitetiniñ rektorı yataqhane qurulmasında yardım etecegini işandırdı,’- dep añlattı F.Yakubov.

Böyle etip, 2010 s. 1 dekabr malümatlarına köre, QMPÜ-nde kündüz bölüginde 2903 student ve ğıyabiy bölükte 3283 student oqumaqta.