«Subyan» aleminde

11.05.20160:19

14 iyün künü “Marakand” musafirhanesiniñ salonında Qırım muhendislik pedagogika üniversiteti, pedagogika ve psihologiya fakulteti pedagogika kafedrası, qırımtatar ve türk filologiya fakulteti qırımtatar ve türk tilşınaslığı kafedrası, “Armançıq” bala dergisi tarafından teşkil etilgen mektepkece oqutuv muessiselerinde ve qoşma tasil berüv merkezlerinde qırımtatar tilinde talim-terbiye bergen terbiyecileri arasında “Subyan” usuliy işleriniñ yarışı olıp keçti

ğaliplerden biri Leylâ oca öz talebelerinen

13 iştirakçi arasında 4 nominatsiya boyunca eñ güzel işler qayd olunıp, fahriy yarlıqlar ve bahşışlar ile taqdirlendi. Qırımnıñ çeşit rayonlarında çalışqan terbiyecilerniñ usuliy işlerine, şu cümleden Oraza ve Qurban bayramlar, Bayraq künü mevzusında tedbirler, nutuq inkişafı boyunca dersler, em de bala şiirleri, eglence daqqaları, sayımlarni belli oca, tasil hadimlerimizden ibaret ürmetli juri azaları tarafından talil olunıp, yüksek qıymetke nail oldılar.

Tantanalı tedbirni “Qırım” ansambliniñ artistleri Asiye Saale, Emine Mustafayeva, yaş yırcımız Raziye Seytablayeva gür seslerinen ve vatanperver yırlarınen musafirlerniñ keyfini ve ruhunı köterdiler. Ufaq qardaşlarımıznıñ tatlı ana tilimzde şiirler oquğanları da kimseni pervasız qaldırmadı.

Yarış neticeleri ilân etilgen soñ bütün iştirakçiler ve musafilernen birlikte ulu muteffekirimiz İsmail Gasprinskiyniñ eykeline çiçekler qoyuldı. Tedbir “Marakand” qavehanesi tarafından donatılğan güzel sofralar başında hoş subetler ile devam etti.

“Subyan” yarışı terbiyeci ve ocalarğa icad etmek içün bir siltem ve ilham bağışlaycaq ve böyleliknen oquv ceryanını mukemmelleştirilmesine yardım etip, milliy tasilimizniñ inkişafına büyük isse qoşacağına ümüt besleymiz ve bütün iştirakçiler adından leyhanı kerçekleştirmege teşebbüs köstergen, yardım etken er kimge büyük minnetdarlıq bildiremiz.