“Qırımtatarca” üslüp

11.05.20160:19

Bir-birine uymağan şeyler

Teri kurtka – sport ştanları, sport kostümi – klassik ayaqqabı, şort – uzun yeñli kölmek ya da sviter, kostüm ya da palto – sport ayaqqabı. Cedvelni daa çoq devam etmege mümkün.

Ştannıñ yañlış uzunlığı – eñ sıq rastkelgen hata. Bazıda erkeklerniñ közü yaramay körgenini tüşünesiñ. Ştanları ya da yerde sürüleler ya da pek qısqalar. Küzgüge baqıñız. Va daa – ştanlarnı kiyip baqqanda, skemlege oturıp baqıñız. Böyle etip, kerekli uzunlıqnı añlap olursıñız.

Kelişmegen çoraplar erkek aqqında çoq şeyler ayta bile. Birinciden, çoraplar ştanğa kelişmek kerekler, ayaqqabqa degil. Ekinciden, çoraplar uzun olmalı. Ayaqnı ayaqqa qoyğanda, çıplaq ayaq körünmemeli. Üçünciden, beyaz çoraplar TEK sport içün. Eñ sıq yapılğan hata – beyaz çorapnıñ sport kiyimlerden ğayrı başqa urbanen kiyilmesidir. Şortnen de çorap kiyilmey!

Eskender Akmollayev

İnsannıñ kiygen urbası onıñ tabiatına, ayat tarzına ve daa başqa individual hususiyetlerge uyğun kele. Özüm aqqında aytsam, men, belki, böyle “qaidege” riayet etem: ayatta ciddiy bir insanım, urbağa kelgende de öylem. Klssik üslüpni begenem, boyunbağnı ise aqiqiy erkekniñ ayırılmaz hususiyeti olaraq sayaö

Asan ve Usein Sattarovlar

İlk evelâ, qayd etmege ister edik ki, bütün aytqanlarımız tek bizim şahsiy fikirimizdir. Biz tek körgenimizge degil de, İtaliya, Hindistan ve Rusiyede çalışqanmızğa da esaslanamız.

 

… Birinciden aytmağa ister edik ki, moda ve kino saasında bayağı tecribemiz, bilgilerimiz ve tanığan adamlarımız bar! Şahsiy fikirimizge binayen, üslüp duyğusı az kimde olğanını ayta bilemiz. Mecmualarğ baqıp, eline tüşkenini kiyseñ, ya da paalı tükânğa barıp, çoq paalı şeyler alsañ – bu, üslüp duyğusı degil…

Eñ esası – anlamaq kerek ki, insannı urba degil de, İNSAN URBANI YARAŞTIRA! Bunı az olsa da bilgen insanlar, meni añlarlar.

Modağa kelgende ise, o, er afta deñişe. Bu munasebet ile Koko Şanel aytqan edi: “Moda modadan çoqa, üslüp – iç bir vaqıt”!

Urbada Casual üslübini seçemiz – üslüpli urba, pek oñaytlı. Bu üslüpte ZARA, TOPMAN, Levi’s kibi brendlerni begenemiz. Garderobımızda paalı brendlerniñ şeyleri de bar, amma olarnı hususiy bir yererge, tedbirlerge kiyemiz.

Öyle tüşünemiz: “Etrafta deñişkeni müim degil, içinde saqlanğanı müimdir. Özüni deñiştirmeyip, dünyanı deñiştirirsiñiz”. Ve soñunda bizden tevsiye: dülber olmağa isteysiñizmi? Özüñizge sadıq qalıñiz.

Riana ADABAŞ

Подготовила Риана АДАБАШ