Çünki biz aqlımız

11.05.20160:19

Biraz tüşünip tınçlandım, qırımtatarlar, ve umumen bütün qalğan normal qırımlılar şimdiki vaqıtta ne yapmaq kerek olğanları hususında fikirlerimni bildirmek qararına keldim.

Birinciden, panikağa tüşmemek. Kapslok ve nida işaretleriniñ sayısını eksiltmek. Haberlerni filtrden keçirmek, er şeyni telâşlanmadan qabul etmek ve yarım saatta bir kereden ziyade repost etmemek.

Ekinciden, panikağa tüşmemek. Şimdi olğanlar bizim, yani normal, qanunlarnı riayet etken vatandaşlarnıñ selâhiyetinden tıştır. Telâş ve qasevetlerimiz bizge ve yaqınlarımızğa tek zarar ketire. Silâlı asker bizim episi telâş, qasevet ve açuvlarımıznı közde tutqandır. Ve, elbette, olar çoqtır, em de olarnıñ tehnikası, silâsı, uçaqları ve tankları bardır. Ve, elbette, olar endi şeerlerimizdeler.

Üçünciden, faal areketler becermemek. Aynı şu silâ olarnıñ yekâne delili, itibarı ve Rabbisidir. Olarnıñ fikirlerini deñiştirmege tırışmaq ve, Allah saqlasın, toqtatmaq tek silâ ile askerlerimizniñ sayısı olarnıñqından artqaç olğan vaqıtta elimizden kele bilir. Lâkin şimdi bizde ne biri, ne digeri yoqtır, em de olmasın.

Dörtünciden, biz bundan da beter allarnı başımızdan keçirgenimiz aqqında unutmañız. Bügün ana-babalarımız hatırlatqanı kibi, 90-ıncı seneleri alımız bundan biñ qat beter edi. Iş yoq, para yoq, olğan para kül olıp ketti, ev yoq, ümüt pek az. Amma dayandıq, er şeyni keçtik, evler qurdıq, balalarımıznı oquttıq, arabalar satın aldıq.

Esas sual: ne yapmalı?

Zapt eticiler em silâ, em insanlarnıñ miqdarı, em de azırlıq ceetten bizge köre artqaçlar. Lâkin biz etraftaki dünyanı kerekli tarzda qabul etkenimiz ve suvuqqanlığımıznı saqlap qalğanımız qadar yeñilmemiz.

Delilsiz davalarğa qoşulmañız, asıl da davalarğa kirişmeñiz. Tek eñ çaresiz alda, özüni yalıñız qorçalamaq içün qoşula bilesiñiz.

Qasaba, soqaq, evleriñizde tanış, dost ve qomşularıñız ile birleşiñiz. Er daim bağ tutıñız, imkânı olğanı qadar etraftaki territoriyada nevbet alıp baruv cedvelini tiziñiz. Çaresi olğanı qadar cami, kilse ve diger ibadethanelerniñ qaravullığını temin etiñiz. Elbette, artıq millet, din ve qavedeki şekerniñ miqdarına köre ayırılmaqnıñ manası yoqtır. Bizni işğal ettiler, biz içün esas şeylerni tayın etmek kerek.

Ve yekün çekerken. Er şey yahşı olur. Belki, yaqın arada degil, belki ağır em de kederli olur, amma ep bir er şey yahşı olur. Çünki biz aqlımız.

Emir ŞEVQİ