Olıp keçmegen körüşüv- memurlarnıñ dubaraları

11.05.20160:19

Qırımtatar meclis prezidiumnıñ arizası

2010 senesi 13 mayıs künü Kiyevde qırımtatar Meclis reisi Mustafa Cemilev Ukraina prezidenti Viktor Yanukoviçnen körüşti. Bu körüşüv devamında avgust ayınıñ başında Devlet başı, Ukraina prezidenti yanında qırımtatar halqnıñ vekiller Şurası ile körüşecegi aqqında añlaşılğan edi. Mezkür körüşüvde qırımtatar halqnıñ avdeti, abadanlaşması, haqlarınıñ tiklenmesinen bağlı eñ aktual meseleler muzakere etilmesi közde tutula edi.

Planlaştırılğan bu merasimge qırımtatar halqnıñ vekiller Şurası munasip azırlıq kördi. Amma körüşüv arfesinde Prezidentniñ qırımtatar halqnıñ vekiller Şurası toplaşuvını keçirmek ilk qararına ters kelgen areketler amelge keçirldi.

Böyle etip, qırımtatar halqnıñ vekiller Şurası toplaşuvı yerine ‘qırımtatar ealiniñ sakinlerinen körüşüv’ni keçirmege teklif etildi.

İşte bu deñiştirilgen körüşüvge qırımtatar Meclisiniñ yolbaşçılığı ve onıñ Prezidiumı tarafından yollanılğan iştirakçilerden ğayrı Qırımda nufuzlı olğan ve faal çalışqan qırımtatar cemaat teşkilãtlarnıñ yolbaşçıları degil de, öz skandal areketlerinen belli olğan içtimaiy-siyasiy qurumlarnıñ vekilleri de davet olunğan.

Olardan birisi Rüsiye ve Gurcistan arasında tartışma vaqtında Rüsiye Federtsıyasına qırımtatarlarnı ‘ukrain genotsıtinden qurtarmaq’ ricasınen muracaat etken edi, digeri ayrı islam toplantılardan qırım müsülman diniy idaresine alternativ bir strukturanı meydanğa ketirmege tırışa, daa birisi özüni öz- özünden dağılğan Ukraina müsülman partiyasınıñ vekili dep adlandıra, dörtüncisi ise SSSRde qırımtatarlarğa qarşı eziyetlerniñ eñ kergin vaqtında ğarp KHV-na ‘Qırımğa qaytıp mında yaşamağa istegen qırımtatarlarğa iç bir yasaq yoq..’ kibi provakatsıon bilgilerni darqatmasınen bellidir.

Qırımtatar meclis prezidiumı bildire ki, Ukraina prezidenti yanında qırımtatar halqınıñ temsiller Keñeşiniñ azaları böyle kibi şahıslar davet etilgen körüşüvde iştirak etip olamaycaqlar ve Ukraina Prezidenti Viktor Yanukoviçke körüşüvniñ deñiştirmek teşebbüsi kimge ait olğanını ögrenmek ve Ukraina prezidenti yanında Qırımtatar halqınıñ vekiller Şurası ile körüşüv tarihını tayin etmek ricasınen muracaat ete.

2010 senesi 03 avgustta

qırımtatar Meclis prezidiumnıñ

toplaşuvında qabul olundı.

Qırımtatar meclis prezidiumnıñ arizası

2010 senesi 13 mayıs künü Kiyevde qırımtatar Meclis reisi Mustafa Cemilev Ukraina prezidenti Viktor Yanukoviçnen körüşti. Bu körüşüv devamında avgust ayınıñ başında Devlet başı, Ukraina prezidenti yanında qırımtatar halqnıñ vekiller Şurası ile körüşecegi aqqında añlaşılğan edi. Mezkür körüşüvde qırımtatar halqnıñ avdeti, abadanlaşması, haqlarınıñ tiklenmesinen bağlı eñ aktual meseleler muzakere etilmesi közde tutula edi.

Planlaştırılğan bu merasimge qırımtatar halqnıñ vekiller Şurası munasip azırlıq kördi. Amma körüşüv arfesinde Prezidentniñ qırımtatar halqnıñ vekiller Şurası toplaşuvını keçirmek ilk qararına ters kelgen areketler amelge keçirldi.

Böyle etip, qırımtatar halqnıñ vekiller Şurası toplaşuvı yerine ‘qırımtatar ealiniñ sakinlerinen körüşüv’ni keçirmege teklif etildi.

İşte bu deñiştirilgen körüşüvge qırımtatar Meclisiniñ yolbaşçılığı ve onıñ Prezidiumı tarafından yollanılğan iştirakçilerden ğayrı Qırımda nufuzlı olğan ve faal çalışqan qırımtatar cemaat teşkilãtlarnıñ yolbaşçıları degil de, öz skandal areketlerinen belli olğan içtimaiy-siyasiy qurumlarnıñ vekilleri de davet olunğan.

Olardan birisi Rüsiye ve Gurcistan arasında tartışma vaqtında Rüsiye Federtsıyasına qırımtatarlarnı ‘ukrain genotsıtinden qurtarmaq’ ricasınen muracaat etken edi, digeri ayrı islam toplantılardan qırım müsülman diniy idaresine alternativ bir strukturanı meydanğa ketirmege tırışa, daa birisi özüni öz- özünden dağılğan Ukraina müsülman partiyasınıñ vekili dep adlandıra, dörtüncisi ise SSSRde qırımtatarlarğa qarşı eziyetlerniñ eñ kergin vaqtında ğarp KHV-na ‘Qırımğa qaytıp mında yaşamağa istegen qırımtatarlarğa iç bir yasaq yoq..’ kibi provakatsıon bilgilerni darqatmasınen bellidir.

Qırımtatar meclis prezidiumı bildire ki, Ukraina prezidenti yanında qırımtatar halqınıñ temsiller Keñeşiniñ azaları böyle kibi şahıslar davet etilgen körüşüvde iştirak etip olamaycaqlar ve Ukraina Prezidenti Viktor Yanukoviçke körüşüvniñ deñiştirmek teşebbüsi kimge ait olğanını ögrenmek ve Ukraina prezidenti yanında Qırımtatar halqınıñ vekiller Şurası ile körüşüv tarihını tayin etmek ricasınen muracaat ete.

2010 senesi 03 avgustta

qırımtatar Meclis prezidiumnıñ

toplaşuvında qabul olundı.

________________________________________________________________________________________

Ukraina Prezidenti V.Y.Yanukoviçke

Qırımtatar meclis reisi M. Cemilevge

Qırım Nazirler Şurasınıñ reisi V.G.Cartığa

Qırımtatar cemaatçılığına

Belli olğanı kibi, 2010 senesi 3 avgust künü Qırımda qırımtatar halqnıñ vekiller şurasınıñ Ukraina prezidenti Viktor Ynukoviçniñ iştitagi ile toplaşuvınıñ keçirilmesi planlaştırılğan edi.

Amma közde tutulğan toplaşuv yerine Ukraina Prezidenti, qırımtatar halqını temsil etmek haqqına saip olmağan, qırımtatar cemaatçılığında ürmet ve nufuz qazanmağan bir qaç teşkilãtınıñ qırımtatar azalarınen körüşti.

Biz, qırımtatar cemaat ve içtimaiy-siyasiy teşkilãtlarınıñ vekilleri, evelden planlaştırılğan toplaşuv yer almamasına ğayret köstergen ayrı memurlarnıñ areket ve usullarına öz menfiy munasebetimizni, razı olmağanımıznı bildiremiz.

Böyle memurlarnıñ areketlerinen qırımtatarlar tarafından demokrtaik saylavlar usulunen saylanılğan qırımtatar milliy öz- özüni idare etüv organları Qurultay ve Meclisniñ akimiyet ile körüşüvine yol bermemege tırışqanları açıq aydındır.

Şahsiy menfaatları peşinden yürgen, qırımtatarlar tarafından saylanılğan öz- özüni idare etüv organlarınıñ faaliyeti çerçivesinde çalışmağa istemegen bazı qırımtatarlar, mecburen, ya da öz istekleri ile qırımtatar halqınıñ birligini dağıtmaq istegen küçlerniñ qolunda silã olıp qalğanları pek acınıqlıdır.

İşbu arizamız ile qırımtatar Meclisine öz destegimizni numayiş eterek, Ukraina Prezidentine qırımtatar halqınıñ vekiller Şurasınıñ tam terkibi ile toplaşuvını keçirmek ricası ile muracaat etemiz.

QTMP ‘Adalet’, OKND, Qırımtatar tarihçiler Assotsıatsıyası, ‘Maarifçi’ assotsıatsıyası qırımtatar cemaat ve içtimaiy- siyasiy teşkilãtlarnıñ vekilleri.

 

_________________________________________________________________________________

Ukraina prezidenti

V.F.Yanukoviçke

Açıq mektüp

Belli olğanı kibi, 2010 senesi 15 mayısta Milliy Meclis azaları Ukraina Prezidenti Viktor Yanukoviçnen körüşüvi devamında 2010 senesi 3 avgustta Prezidentniñ iştiragi ile qırımtatar halqınıñ vekiller Şurasınıñ toplaşuvını keçirmege planlaştırıldı. Böyle etip, körüşüv formatı munasip seviyeli salãhiyetlerge saip iştirakçilerniñ dialogını közde tuta edi.

Körüşüv formatını iştirakçileriniñ temsilcilik salãhiyet seviyesinden cemaat teşkilãtları ile sübet seviyesine birtaraflı deñiştirilmesi Milliy Meclisniñ temsilcilik vazifeleriniñ seviyesini alçaltmaq ve halqnıñ siyasiy strukturasını berbat etmek maqsadını taşıy.

Tamır qırımtatar halqınıñ milliy öz -özüni idare etüv sistemasını dağıtılmasına doğrutılğan ğayretlerini közetip, Ukraina akimiyeti tarafından Milliy Meclisniñ halqara standartlarına binaen tamır halqlar izaatına cevap bergen alãmetlerinden biri olğan temsilcilik vazifeleriniñ seviyesini yoq etilmesine doğrulğan siyaset amelge keçirilgenini tasdiqlaymız.

Yuqarıda aytılğanınıñ esasında, ‘Arqadaş’ adlı Huquqqoruyıcı cemaat teşkilãtı qırımtatarlarınıñ temsil organı olğan Milliy Meclis ile birdemligimizni bildiremiz.

Arqadaş huquqqoruyıcı

cemaat teşkilãtınıñ idare reisi İSMAİLOV A.P.

________________________________________________________________________________________

Olıp keçmegen körüşüv- memurlarnıñ dubaraları

2010 senesi 3 avgustta Qırımda qırımtatar vekiller Şurası ve Ukraina prezidenti Viktor Yanukoviçnen keçirilmegen körüşüvinden soñ KHV-da Meclis tarafına temelsiz, mantıqsız qabaatlar töküldi.

Şu künü, 3 avgustta, Meclis azaları, olardan bağlı olmağan şaraitlerden dolayı bu körüşüvde iştirak etmekten red etmege mecbur oldılar. Bunıñ sebepleri ağımdaki sene 3 avgust tarihında Meclis prezidiumnıñ arizasında beyan etilgen.

Añlatılmasını talap etken daa bir sual: Tavriya üniversitetinde keçirilmesi közde tutulğan Ukraina prezidentiniñ rehberligi altında Qırımnıñ strategik inkişafı boyunca muşaverede Meclis azalarınıñ bulunmamasıdır.

Şunı qayd etmeli ki, muşavere teşkilãtçıları Meclis azalarını davet etmediler. Mecliske QMC Nazirler şurasınıñ reisi Vasiliy Cartıdan davetler, Ukraina prezidenti memuriyet başınıñ muavini Oleg Rafalskiyden telegramma yollanıldı. Bu davetler körüşüv künü, merasim başlağanından 30 daqqa keçken soñ(s. 10.32.) Meclis azalarına kelip yettiler. Telegrammağa binaen, Meclis azaları ‘Ukraina prezidenti V.F.Yanukoviçniñ qırımtatar ealisiniñ vekilleri ile körüşüvge’ davet etile ediler.(s. 11.30) Bundan şunı añlamaq mümkün ki, qırımtatarlarınıñ temsil organı- Milliy Meclisiniñ iştiragı bu Qırım içün ğayet emiyetli muşaverede evelden planlaştırılmağan edi.

Bu hoş olmağan vaziyetni birisiniñ provakatsıon mevamı olaraq qabul etmek kerekmi, aceba?

Yazıq ki, muhtariyet akimiyetiniñ Mecliske munasebetleri açıqtan menfiy faktlarnı tasdiqlaylar. Misal olaraq, bu seneniñ aprel ayında QMC Nazirler şurasınıñ reisi Vasiliy Cartınıñ imzasınen Qırım cumhuriyet mektepten tış oquv yurtunıñ mudiri vazifesine Qırımtatar Meclis reisi tarafından teklif etilgen namzet tayin etilecegi aqqında qarar alınğan edi. Lãkin, meraqlı bir şey, bu qarar Qırım akimiyetiniñ memurları tarafından diqqarsız qaldırıldı. 2010 senesi 23 iyül künü Mustafa Cemilev bu sual boyunca tektar mektüp ile Vasiliy Cartığa muracaat etti, amma bu muracaat alã daa cevapsız qala.

Qırımtatar Meclisiniñ tış bağlar bölügi.

________________________________________________________________________________

Sebeplerini añlamağa ister edik

2010 senesi 5 avgustta Meclis ofisinde Bütündünya qırımtatar kongressiniñ prezidenti, qırımtatar Meclis reisiniñ birinci muavini Refat Çubarov ve Meclisniñ tış bağlar bölüginiñ yolbaşçısı Ali Hamzin Ukrainada Avropa Birligi temsilciliginiñ başı, elçi Joze Manuel Pintu Teyşeyranen ve onen beraber kelgen yerli ve regional inkişaf leyhalarnıñ rehberi Entso Damianinen körüştiler.

Ukrainada AB Temsilciliginiñ yolbaşçısı 3 avfgustta Aqmescitte Ukraina prezidenti Viktor Yanukoviçniñ reisligi altında yer alğan Qırımnıñ strategik inkişafı boyunca muşavereniñ neticelerine dair öz teessuratları ile paylaştı. Joze Manuel Pintu Teyşeyra qayd etkeni kibi, mezkür tedbir yüksek teşkiliy seviyede keçip, Ukraina ve Qırım akimiyetleriniñ Qırımnıñ ertaraflı inkişafı boyunca ciddiy niyetleri olğanını numayiş etti.

Aynı zamanda Ukrainada AB Temsilciliginiñ yolbaşçısı, bu toplaşuvda Meclis azaları bulunmağanından yazıqsınğanını bildirip, böyle qayd etti: ‘ Men, olıp keçken muşavereniñ bir iştirakçisi olur ekenim, toplaşuv reisi tarafından tedbirge davet etilgen Meclis azaları bulunmağanını ilãn etilgen soñ, bunıñ sebeplerini bilmege ister edim’.

Refat Çubarov ve Ali Hamzin Joze Manuel Pintu Teyşeyrağa Qırım iqtisadiyatına AB azaları olğan memleketlerniñ investitsiyalarını celp etivünde Ukrainadaki AB Temsilciliginiñ ğayretleri içün minnetdarlıq bildirip, evelden keçirilmesi közde tutulğan Ukraina Prezidentiniñ iştiragi ile Qırımtatar halqınıñ vekiller Şurasınıñ toplaşuvı ötkerilmegeniniñ sebeplerini tafsilãtlı añlattılar.

Refat Çubarov, Qırımtatar halqınıñ vekiller Şurası, Ukraina prezidenti kibi, evelden keçirilmesi közde tutulğan toplaşuv yüz bermegeninden yazıqsınğanlarını ve bu toplaşuvnı deñiştirgen memurlarınıñ areketlerine Ukraina Prezidenti lãyıq qıymet kesecegine ümüdini bildirdi.

Eki tarafnıñ fikrine köre, kelecekte böyle kibi añlaşmamazlıqlar akimiyet ile munasebetlerine ve cemiyetniñ amanlığına doğrulğan işbirligine keder etmemek kerek.

Refat Çubarov şunu qayd etti ki, 2010 senesi 3 avgustta Ukraina prezidenti qırımtatar halqınıñ haqları tiklenüvi boyunca bir sıra aktual meselelerine binaen öz mevamını bildirdi ve bu qırımtatarlar tarafından musbet qabul etildi.

Aynı zamanda, Refat Çubarovnıñ bildirgenine köre, ‘ ayrı memurlarnıñ öz menfaatları peşinden 2010 senesi 31 oktãbrde keçirilecek yerli saylavlarda Ukriana Prezidenti ve qırımtatar halqı arasında işançsızlıqnı doğurmağa tırışqanları qasevetke daldıra’. Bu sebepten, qırımtatar Meclisi Ukraina Prezidenti ve Ukraina devlet akimiyetiniñ organları ile sistemli ve mahsuldar munasebetler qurulması içün zarur tedbirler amelge keçirmege tırışmaqta.

Qırımtatar Meclisiniñ matbuat hızmeti