Niyas İzmaylov:Eñ büyük ğalebem – hastalıqnıñ yeñilmesidir

11.05.20160:19

Saqat adamlarğa acıp baqamız, bazılar depressiyalar içine dalğanda, balalıqtan tserebral paraliçnen hasta olğan 25 yaşındaki Niyas İzmaylov dünyada eñ küçlü insanlardan biri ola – bodibilding boyunca dünya çempionı.

Niyas 18 yaşında olğanda sportnen oğraşmağa istedi, amma zornen yüre edi. Lâkin küçlü, yahşı beden saibi olmaq istegi onı Canköy trenajör zalına alıp bardı. Ana-babasınıñ qoltutuvı, öz ıntıluvında ğayrı, sağlam sportçu arqadaşlarınıñ yardımı büyük stimul oldı. Birinci idmanı (trenirovkası) çoq vaqıtqa aqlında qalacaq: arıq, zornen yürgen oğlançıq trenajör zalına keldi. Anda endi tecribeli, öz işini bilgen sportçular çalışa edi. Olacaq çempion biraz çekindi, ve şimdi ayta ki, atta qorqqan edi. İdmancı (trener) yerinde yoq edi, oğlan biraz vaqıttan soñ kelecek oldı. Amma yigitler onı qaldırdılar ve idmanlarını neden başlamağa kerek olğanını añlattılar. Şimdi Niyas onıñ ğalebelerinde kollektiviniñ issesi de bar olğanını ayta.

— Birinci idmandan soñ bedenim pek ağırtqan edi. Amma zalğa kelip, sıcaq müitke kirgende, öz istegimde emin edim, ve sportnen oğraşmağa başladım. Ağır ve alışılmağan meşğuliyetlerge baqmadan, begendim, ve özüme ayta edim: şimdi qıyın, amma soñra qolay olur.

Sport – qurtulış

İsrarlı idmanlardan soñ Niyasnıñ sağlığı eyileşmege başladı, özя yahşı ve tez yürmege başladı, ayaqlar küçlüce oldı.

— Ağır olğanda, idmanlarda boldurğanda, özüme: bizni öldüremegen şey, bizni daa da küçlü yapa dep aytam.

Niyas er saba çapqalay, onıñ öz rekordı – 10 km.

Niyas ğalebelerge ana-babası ve büyük irade küçü yardımınen irişip oldı. Anasınıñ aytqanına köre, balalıqta onıñ ömür boyu töşekten turmaycağını aytqan ediler, üç kere ölüm sıñırında edi, çoq operatsiyadan keçti. Amma ana-babası oña qol tuttılar, ve endi o, tek qorantasınıñ ğururı ve torunlarınıñ kumiri degil de, bütün memleketniñ ğururıdır.

O çoqusını özü ögrendi: bir-de-bir şeyni tüşüngende, idmancılarğa muracaat ete edi, olar özleri bilgenini oña ögrete ediler. Niyas em paraolimpiya sportçular, em sağlam sportçularnıñ yarışlarında iştirak ete. Birinci yarışlar ağır atletikadan olıp, Rivnede keçirilgen edi. Anda köz hastalıqları olğan sportçularnen yarışqan edi. Şimdi endi çoq ğalebelerden soñ öyle printsipi bar: mükemmelikniñ sıñırı yoq. Ğalebe lezetini duyıp, çempion daa büyük ğalebelerge ıntıla.

Böyle küçlü adam neden qorqqanını sorağanda, Niyas tüşünip, tek Allahtan, dedi.

Kumirlerni, Niyasnıñ sözlerine köre, o, körünişine ya da beden küçlügine köre saylamay. İnsannıñ tabiatı, iç dünyası müimdir.

— Çoqusı ağır atletler Arnold Şvartseneggerni nümüne olaraq sayalar. Onı kumir olaraq tasavvur etip olamayım, çünki şahsen onı bilmeyim. Şahsiy tanışuv menim içün pek emiyetlidir: belki, adamnıñ bedeni küçlü, amma ruhu zayıf. Nasıl nümüne ola bile o zaman? Onıñ içün böyle hayal kumir menim içün degil. Sportnen oğraşmağa tek başlağanda, nümüne olaraq idmancılarnı saya edim.

Acıma degil – qoltutuv

Balalıqtan berli etrafındaki adamlar onı acımağa tırışa ediler.

 

— Aqlımda, balalığımda adamlar meni acıp, qanfet bere ediler, daa bir şeyler. Ebet, yüregime hoş kelmey edi. Adamnıñ beden zayıflığı olğanı, ayatnıñ diger taraflarında zayıf olğanını köstermey. Onıñ yaşamaq ve sağ qalmaq imkânları başqalarında kibi.

Amma öz ğalebelernen Niyas bir-de-birine öz küçüni isbatlamaq istemey edi. Küçüni daima duya edi, sportnen oğraşmağandan evel. Bu işte oña yaqınları yardım ettiler – doğmuşları, dostları. Saqat adamlar ruhtan tüşip, özüne qarşı acıma doğursalar, Niyasnıñ fikrine köre, böyle yolnı olar özleri saylaylar.

— Birinci adım – psihologik, soñra ise, maña köre, er kesniñ yardım qolunı uzata bilecek doğmuşları ve dostları bar.

Tek bodibilding degil…

Niyas tek bodibildingnen oğraşmay. Pauerliftingden başlağan edi, sağlam sportçular arasında keçirilgen armlifting yarışında ise Ukraina rekordını elde etti ve sport ustasına namzet unvanına nail oldı. Eki aydan berli Niyas armrestlingnen oğraşa, mayıs ayında Lehistanda (Polşada) olıp keçecek Avropa armsport çempionatına azırlana. Bu sport çeşiti de begene, çünki yarışqan adam öz strategiyasınen, ğalebe qazanmaq isteginen kele.

Niyas İzmaylov tek sportnen sıñırlanmay, tasilni de emiyetli saya. Şimdi Qırım gumanitar universitetiniñ içtimaiy pedagogika ve ameliy psihologiya fakultetiniñ 4 kursunı bitire.

Ayatınıñ 1/3’ni idmanlarda, çempionatlarda keçire. Ondan da ğayrı, sportçu ana-babasına evde yardım ete. Onıñ içün, Niyas aytqanı kibi, şahsiy ayatına vaqıt qalmay. Qızlarnıñ iç dünyasına emiyet bere, milliy ananelerde terbiyeni, alçaqgöñüllikni begene.

Şimdi endi Niyasta idmancılar istidadı körüne, nasiatnen yardım ete, sportnen oğraşmağa istegen oğlanlarğa qol tuta. Özünden daa büyük qazançlarğa irişe bilecek talebeni östürmege arz ete.

Yapqan işini sevgeni içün, sportta muvafaqiyetli ola.

— Ayatta öz yerimi tapmağa ve bu yerde eñ büyük qzançlarnı elde etmege daima istey edim. Bir-de-bir ğalebeni ayırca qayd etip olamayım; er birine irişmek içün uzun yoldan keçtim ve er birisi özcesine qıyındır. Amma, belki, eñ büyük ğalebem – hastalığımnıñ yeñilmesidir.

Niyas olacaq sportçularğa maqsatlarına irişmege yardım etecek bir qaç tevsiye berdi.

— Maña köre, eñ esası – birinci adım yapmaq, öz qorqularını yeñmek. Tek yapıp baqqan soñ, ne yapa bilecegini, etraftakiler bunı nasıl qabul eteceklerini köresiñ. Utanmaq kerekmey – yapıñız, areket etiñiz.

Subetleşken: Azize ABLA