Vitaliy Kliçkoğa
Vladimir Kliçkoğa
Büyük keder ile siz, aileleriñiz ve yaqınlarıñizniñ başlarına kelgen facia aqqında eşittim — baba, ömür arqadaş, qartbaba, acayıp insan, Ukraina vatanperveri Vladimir Rodionoviç Kliçko bu dünyanı terk etti.
Bu küneri, sizler içün pek kederli daqiqaları, çoqusı insanlar babañıznı şahsen bilmegen olsar bile, amma Ukrainanı ve ukrainlerni sportta ve içtimaiy-siyasiy faaliyette köstergen yüksek ahlâqlı pozitsiyañız yardımınen bilgenler sizge teren taziye bildireler.
Başıñız sağ olsun!
Qırımtatar Milliy Meclisniñ Reisi Mustafa Cemilev
18.07.2001s.
‘SimSitiTrans’nıñ Nazirler Şurasınen problemleri bar.
Qırım Nazirler şurasınıñ reis muavini- muhtariyetniñ iqtisadiy inkişaf ve ticaret naziri Yekaterina Yurçenko yerli öz -özüni idare etüv organlarına SimSitiTrans avtonaqliyat kompaniyasınen imzalanğan añlaşmalarnı üzmek vazifesini avale etti.
Bu vazifeni qırım akimiyetiniñ vitse- naziri vergi tölemesisiniñ tamlığını temin etüvi boyunca muşaverede avale etti. Qırım devlet vergi memuriyetiniñ reisi Lüdmila Yeltsova bildirgenine köre, ‘SimSitiTrans’ hadimlerine qanun ile tayin etilgen minimal aylıqtan daa az töley eken.
Yeltsovanıñ qayd etkenine binaen, şirket yılda 30 mln. grv para qazana, aylıq fondu ise sadece 200 biñ grv. teşkil ete. ‘Diger şirketler aynı şaraitlerde çalışsalar bile, tayin etilgen aylıqlar uyğun para töleyler. Biz siznen 2010 seneinden berli çalışamız, saylavlardan evel ve soñ sizge aytqan edik, siziñ yolbaşçılarıñız deputat olaraq saylandılar. Siz başqa şirketlerge örnek olmalısıñız.’- dedi Yeltsova. Bundan da ğayrı, Yurçenko vergi organlrına ‘SimSitiTrans‘ boyunca malümatlarnı prokuraturağa(savcılıqqa) bermege avale etti. ‘Siz 500, 700, 900 grv miqdarında aylıq töleysiñiz. İnsanlar sizde 900 grv. içün çalışqanlarına bir vaqıt inanmam. Savcılıq aylıqnıñ kerçek müidarını ayta bilgen insanlarnı tapar dep tüşünem. Malümatlarnı azırlañız.’- dedi nazir muavini.
Evelden haber etilgeni kibi, ağımdaki sene aprel ayında SimSitiTrans şirketinden passajırlerni alıp ketmek içün litzenziyanı lãğu ettiler. Bunıñ sebebi, 143 avtobuz havfsızlıq normalarına uymağanı eken. Söz Özbekistanda yapılğan ‘Uzotoyol M24,9 PE’ avtobusları aqqında yürsetile.
3 ay keçken soñ SimSitiTrans litsenziyağa haqlı oğanlarını tasdiqladı.
SimSitiTrans- Qırımda passajır taşıyıcılardan eñ büyüklerden biridir. Şirket Aqmescit , Aqyar şeerlerinde, Qırım ve Ukraina boyunca şeerler arası pasaajırlarnı taşıy, transfer, ekskursiya, yük taşıyıcı, devlet tehosmotr vazifelerini eda ete. Şirkette umumen 450 yaqın adam çalışmaqta.
SimSitiTransnıñ saibi- qırımtatarı olğan rusiye iş adamı Lenur İslãmov.
QMPÜ-nde dinşınaslıq mutehassıslarını azırlaycaqlar.
Kelecek sene tarih- filologiya fakultetinde yañı dinşınaslıq zenaatını açmağa planlaştıralar.
‘Leyha daa Leonid Küçma zamanında işlenilgen edi, amma onı amelge keçirmek içün sermiyalar yoq edi. Al-azırda leyha daa soñunace işlenile, biz onu tezce kerçekleştirmege isteymiz’.- añlattı QMPÜ-niñ tarih fakültetiniñ dekanı Refik Muzafarov. Dinşınaslıq zenaatına 2012 senesinden ogretmege başlaycaqlar.
Kurtseitovnıñ aytqanına köre, mezkür zenaat boyunca magistraturağa ‘Felsefe’ diplomına saip olğan talebelerni qabul etecekler. Bundan da ğayrı, al-azırda bu zenaat boyunca ögretecek ocalar azırlanıla.
QHA.
Tomas Melia: ‘ Qırımtatar halqı qırım cemiyetiniñ emiyetli unsurıdır’.
AQŞ devlet kãtibiniñ muavini Tomas Melianıñ fikrine köre, qırımtatarlar Qırım cemiyetiniñ emiyetli unsurı sayılır.
Ayrıca da, devlet kãtibiniñ muavini şunı da qayd etti ki, mında USAID amerikan agentligi grajdan cemiyeti ve kütleviy haber vastalarınıñ inkişafına ve gumanitar yardımına doğrultılğan büyük leyhalarnı amelge keçirmekte: ‘Meselã, keçken sene mında hastahaneler içün teminat ketirilgen edi,bu da mence Ukraina bizim içün ne qadar qıymetli olğanını isbat ete.’
‘Söz kelimi, Qırım ziyaretimniñ maqsatlarımdan biri- safdaşlarımız, grajdan cemiyetiniñ liderlerinen, çeşit KHV-nıñ jurnalistlerinen körüşmektir. Men qırımtatar Meclis yolbaşçılığınen de körüştim. Fikrimce, qırımtatar halqı Qırım cemiyetiniñ emiyetli unsurı sayılır. Men Qırım Nazirler şurasınıñ reis muavini Yurçenko hanımnen körüşip, Qırımnıñ iqtisadiy inkişafı boyunca qırım akimiyetiniñ planlarını muzakere ettik.’
‘Qırım üslübi’ yañı katalognı üç tilde çıqardı.
‘Qırım üslübi’ leyhası yañı katalognı büyük tirajnen çıqardı. Bu aqta QHA-ne ressam, çölmekçi, kilim toqumacılıq ustası, dizayner, Ukraina halq ustalar Milliy birliginiñ azası Mamut Çurlu bildirdi.
Onıñ aytqanına köre, yañı katalog rus, ukrain ve ingliz tillerinde çıqarılğanı içün başqalarından ayırıla. Katalogta 30 ustanıñ icadı aqqında tafsilãtlı malümat berile ve olarnıñ eserleri taqdim etile.
M.Çurlunıñ qayd etkenine köre, rus tilinde artıq 3 biñ nusha çıqarıldı. Bundan da ğayrı, bir ay içersinde ukrain ve ingliz tillerinde de 3-er biñ nusha derc etmege közde tutula.
‘Keçken katalog yarım yıl evel çıqqan edi. O vaqıttan berli leyha iştirakçilerniñ sayısı artı, eserleriniñ keyfiyeti güzelleşti….mence, bu güzel bir katalog oldı, onıñ dizaynı ve poligrafiyası keyfiyetlidir.’-dedi usta.
Kiriş metinniñ muellifi- tarih ilimler namzeti Yelena Soboleva, diger metinlerni ise Mamut Çurlu özü yazdı.
Mamut Çurlunıñ aytqanına köre, katalog USAID leyhasınıñ yardımı ile çıqtı ve 3 biñ nusha- ediye neşiridir.
Malümat: ‘Qırım üslübi’ leyhası 2005 senesi Mamut Çurlu tarafından tesis etilgen edi.Leyhanıñ maqsadı- muhtariyette qırımtatar halqınıñ qadimiy ananeviy medeniyetine esaslanğan zemane süsleme sanatınıñ eserlerini yaratmaqtır.
Ageyevge Aqmescitte bala parkını meydanğa ketirmege teklif ettiler.
Çankırı şeeriniñ başı İrfan Dinç Aqmescit şeer yolbaşçısı Viktor Ageyevge qırım paytahtında bala parkını qurmağa teklif etti.
İrfan Dinç Viktor Ageyevden Aqmescitte bala parklarınıñ vaziyetlerinen meraqlanıp, bu yerlerni ziyaret etmege imkãnları olmağanını qayd etti.
Öz nevbetinde ise Aqmescit başı bu meseleniñ problemli olğanını bildirdi. Problemlerden biri olaraq sermiya yetişmegeni seslendirildi, amma buña baqmadan şeer yolbaşçılığınıñ bala parklarını meydanğa ketirüvi boyunca 4 leyhası bar.
Aqmescit şeer başını diñlep, Dinç, şeerge evelden Çankırıda amelge keçiriligen leyhanı taqdim etmege ve onı amelge keçirilmesinde yardım köstermege azır olğanını bildirdi. Şartı- Aqmescit civarlarında 10 ga topraq olmasıdır.
Viktor Ageyev teklifni quvanç ile qarşılap, türk leyhasını Aqmescitte endi mevcut olğan parkınıñ tamirinde işletmege azır olğanını bildirdi.
QHA malümatlarına köre
Ay-Serez ve Voron televideniyesiz qaldılar
Sudaq rayonınıñ Ay-serez ve Voron köylerniñ sakinleri ana tilinde yayınlarnı baqıp olamaylar, çünki regionda “Qırım” devlet telekompaniyasınıñ (DTRK) yayınlanması toqtatıldı. “Avdet”ke Ay-Serezz köyüniñ yerli meclis reisi Zarema Emiraliyeva tarif etkeni kibi, bunıñ sebebi – Şelen köyünde programmalarnıñ yayınlanmasına aq bergen litsenziyanıñ olmamasıdır.
Böyle vaziyet, Emiaraliyevanıñ sözlerine köre, birinci kere peyda olmay. “2009 senesi bizge televideniyeni endi söndürgen ediler, ekinci saylavaldı prezident kampaniyası vaqtında keçken sene mart ayında kene de söndürdiler, şimdi biz kene de endi bir qaç aydan berli televideniyesiz oturamız. Şikâyetlerimizge cevap bermeyler. DTRK ise ana tilimizde yayınlar köstergen yekâne kanaldır”.
Mesele şunda ki, 2004 senesi president kampaniyası vaqtında bu üç köyge böyle litsenziya berilip, telekenal qoyulğan edi. Ağımdaki seneniñ mart ayında ise RTPT’de tüner parlanğanı içün kanal söndürlildi, tamir işleri yapılğan soñ ise, kanalnı qoymağa aşıqmaylar.
Künlerde yollanılğan şikâyetlerden soñ, Sudaq regional mecliske RTPT’den cevap keldi – litsenziya olmağanı içün bu köylerde telekanal yayınlanmay.
Sudaq regional meclisi Ukraina televideniye ve radio boyunca Milliy Şurasına Şelen köyünde “Qırım” DTRK programmalarınıñ yayınlanması içün litsenziya bermek ricası ile muracaatını yolladı.
Elmara MUSTAFA
Mustafa Cemilev Barışıq ve Azatlıq Kününde iştirak etti
19-21 iyül künleri Qırımtatar Milliy Meclis Reisi, Ukraina halq deputatı Mustafa Cemilev Şimal Qıbrıs Türk Cumhuriyetiniñ parlament Reisi Hasan Bozerniñ daveti ile Qıbrısta bulundı.
Meclis yolbaşçısı Mustafa Cemlevniñ Qıbrısqa ziyaretiniñ esas maqsadı – eryıl 20 iyül künü qayd etilgen Şimal Qıbrıs Türk Cumhuriyetiniñ Tınçlıq ve Azatlıq Kününiñ 37-yıllığına bağışlanğan resmiy tedbrilerde iştirak etmek.
Tantanalı tedbirlerde Türkiyeniñ baş naziri Recep Tayıp Erdoğan da iştirak etti.