1-7 iyül künleri Türkiyede Silivke şeerinde Sredizemnomor deñiz yalısında ‘38 Silivke medeniyet Halqara aftası’çerçivesinde TÜRKSOY halqara teşkilãtı ve Mersin şeer yolbaşçılığınıñ destegi ile türktilli memleketlerniñ birinci etno-estrada muzıkasınıñ Halqara Konkursı keçirildi. Mezkür yarışta Azerbaycan, Özbekistan, Tacikistan, Turkmenistan, Kazahstan, Tatarstan, Başkortostan, Bulğaristan, Qırğızstan, Türkiye ve Qırımdan iştirak ettiler.
Yaş estrada icracılar festivalniñ maqsadı- yañı istidatlarnı keşf etmek, türk dünyası etnomuzıkasını teşviq etmek, medeniyetlerimizni birleştirmektir.
Jüri reisi belli qırğız bestekãrı- Muratbek Begaliyev edi.
Tedbirde Türkiyeniñ nufuzlı siyasiy erbapları, Mersinge yaqın şeerlerniñ yolbaşçıları Türksoy teşkilãtınıñ baş kãtibi Düsen Kaseinov bulundılar.
Qırımnı Elnara Küçük ve Marlen Settarov taqdim ettiler.
Festival bir qaç etaptan ibaret edi. Marlen Settarov ‘Bağçalarda kestane’, ‘Qırım qızı’, ‘Uçma da qarğa’, ‘Balıqçıyım’ kibi yırlarnı yüksek seviyede icra etti. Marlen Settarovnıñ icrasında ‘Yüregimni sen aç maña’ yañı yırı da yañğıradı.
Festivalniñ ekinci künü Elnara Küçük ‘Top gül’, ‘İmkãn ber’ kibi yırlarını icra etti.
Festivalniñ üçünci künü ise şeer yolbaşçılarınıñ ricası ile Elnaranen Marlen ‘Ey,güzel Qırım’nı beraber yırlap, kimseni pervasız qaldırmadılar.
Festival çerçivesinde 5 iyül künü ‘Başarı Belgesi’ yır yarışı keçirildi. Yarışta Elnara Küçük ‘Qamışa’ qırımtatar yırını ve zemane yırlarından ‘Yabancı’ türküsini icra etip, ‘Türksoyniñ mahsus mukãfat’ını qazandı.
Er kün festival Zara, Güksan Özgen, Hadise kibi belli türk estrada icracılarınıñ kontsert programmasınen yekünlene edi.
Elnara Küçük ve Marlen Settarov maddiy destek içün ‘Winta’, ‘Şeñ’, ‘Marakand’ şirketlerine, Edem Dudakov ve Eskender Karametovğa ayrıca minnetdarlıq bildireler.
Riana Adabaş azırladı