Aqmescitte meşur Qırım ressamınıñ 65 yıllığına bağışlanğan sergi açıldı

11.05.20160:19

İyünniñ 3-de Qırımtatar sanat müzeyinde Ukrainada nam qazanğan ressam, Qırım mükâfatınıñ laureatı Ramazan Üseinovnıñ 65 yıllığına bağışlanğan sergisiniñ açılış merasimi olıp keçti.

Ramazan Üseinovnıñ 24 işini manzara, janrlı sanalaşmalar, süret ve atta felsefiy kinayeli ikâyeler teşkil etmekteler. Ressamnıñ icadında esas ğaye – ayatnı tasdıq etken optimizmdir. Şunıñ içün onıñ eserleri seyircinen toqtamadan subet, bilgi ve tecribesini teslim etüv, ana toprağınıñ ruhiyligi ile üzülmez bağdır. Olar parlaq, pozitiv ve renklidir.

Ressamlıq sisteması, müellifniñ şahsiy timsaliy ve şiiriy uslübiy hususiyetlerini şekillendirip, onıñ emotsional alını ifade ete. Resimleriniñ obrazları hususiy qaidelerge köre yaşamaqtalar. Olar kerçekten ayrı bir alda bulunalar, çünki sıq-sıq uçqan alda kösterileler. İfadelilik ve uyğunlıqqa müellif, renk fonu kontrastlarınıñ, ifadelengen obyektniñ aydın tayın etilgen silueti ile özgün bir ressam oyunı yardımınen barıp yete.

Ressamnıñ özü qayd etkeni kibi, işler soñki 5 yıl içinde yapılğan edi.

– Ananeviy olaraq yübiley sergilerini yapam. Ressam içün salonda öz işlerini körmek – pek emiyetlidir, çünki o öz degerlikleri ve nuqsanlıqlarını köre… Ve soñra seyircilerniñ fikirlerini eşitmek pek muimdir, — dep qayd ete Ramazan Üseinov.

Zenaatdaşları bildirgeni kibi: ressamnı bilmeden işlerini körgende, olarnıñ müellifi 65 yaşlı ressam degil de, genç bir insandır dep tüşünmek mümkün.

Malümat içün. Ramazan Üseinov öz icadiy faaliyetini Orta Asiyada başladı. 1971 senesi Taşkentteki P. Benkov adına cümhüriyet ressamlar oquv yurtını bitirdi. Ressamnıñ eserlerini Moskva, Taşkent, Samarqand, Buhara, Nukus, Aqyar ve Aqmescit müzeyleri aldılar. Ve aynı vaqıtta Avropa, Asiya em de Amerika ülkelerinde özel kollektsiyalarda bulunalar. Bundan da ğayrı, onıñ eserleri Özbekistan devlet sanat müzeyinde, Aqmescit ressamlar müzeyinde, Cümhüriyet qırımtatar sanat müzeyinde, Ukrainanıñ milliy sanat müzeyinde, em Özbekistan, Rusiye, Türkiye, AQŞ, Ukraina, Almanya, İndistannıñ özel kollektsiyalarında bulunalar.